Russia President Putin Kaih Theinak An Suah – Ukraine ram sungih nauhak pawl Rusisa ram ih hruailuh an si thu ah Russia president Putin cu mawhphurtu bikah puh a si ih, leitlun thuthennak zungpi ICC cun Putin kai dingin thu an suah.
Russia in Ukraine an do hnuah mipi sualnak nei tampi an thih phah zo ih, mithi lak khalah nauhak tampi an tel. Cumen siloin Russia cun Ukraine nauhak tamzet cu Russia ram ah an rak hruai lutih nauhak daan pahbal hmangin Putin cu ICC ah an rak hek. ICC cun thubuai zohfelnak a neih tikah Russia president Putin cu Ukraine nauhak pawl Russia ram ih hruailuh thu ah mawhphurtu bikah an retih kai dingin thu an suah.
Russia hin 2022, February 24 ihsin Ukraine an rak do zo ih, Ukraine ram sungin hmunram 4 an laksak zo. Doawknak hmunih nauhak pawl cu Russia lamah hruai luh an si ih, cucu leitlun ralkap daan kalh le nauhak tuah dan dankalh timi hmangin Putin thubuai an tuahsakmi a si ih, ICC in kai dingin thu a suahnak khal a si.
ICC in Russia president Putin kai dingin thu a suah nan, anmah ICC in a hranten palik an nei lo. ICC ahhin ram 123 an um nan, Russia, Ukraine, China le USA tivek pawl hi ICC ah an tel ve lo. Cutikah ICC in Putin an kaih theinak umsun ih lang cu ICC sungtel ram 123 ih Putin a um pang asile,cumi lawngah an kai thei in a lang.
Asinan, thubuai um thei vivo betmi cu ram khat le ram pakhat pehtlaihawknak ah ICC sungtel sikhalsehla anmah ram pakhat palik lawngih Putin kai duh lo tivek an um vivo thei lai. ICC Court in kai dingin thu an suahmi lakah an kaih taktak thei lomi tamzet an um. Russia cun ICC ih thusuak cu thuphan hlolak zianghman lo men a si ih, kan pom lo lawlaw, a takin a thleng lo ding tin leitlun an theihter ve.
China President Russia A Feh Ding – China president Xi Jinping cu Russia President Putin ih sawmnak vekin Russia ah a feh ding ti’n Russia lam cun thu an suah.
China president Xi Jinping hi March 20 ah China ram suahsan in Russia a feh dingih ni 2 sung a caam ding. Ni 2 sung ram pahnih president cun thureltlangnak an nei dingih cumi ahcun China le Russia tuantlang sinsin theinak ding lam thupibik ah rel an tum. AN thurelmi pawl a takih tuahsuak a si theinak dingah hminkhen ngan cih ding an si.
2019 kum ah China President Xi Jinping cun Russia a rak tlawng zo ih, ram pahnih president thureltlangnak an rak nei. 2022, February thla thokah Russia president Putin sawn China ah a tlawng ve ih, Beijing khawpi ah China president thawn tongaw in thurelnak an rak nei. 2022 kum ih an tonawk tum khalah ram pahnih cun remnak phunphun an tuah ih, tuantlang dingin hminkhen an rak ngan.
Russia in Ukraine an do hnuah Europe ram tamzet cun Russia suak Oil an lei duh nawn lo. Cutikah Russia cun China an bia ih tutak ah China hi Russia Oil lei tambik ram an si. China cun Russia Oil a leimi pawl cu man tamsawn in leitlun ramdang ah an rak zuarsawng ve. CHina le Russia hi Russia in Ukraine an do hnuah nasaten an tuantlang ih tuantlang tam sinsin tumin ram pahnih preisent be aw ding an si.
Leave a Reply