Russia Ralthuam Retnak A Puak Durdo

Russia Ralthuam Retnak A Puak – Russia in 2014 kum ih an rak lakmi Crimea hmun pakhat a puak durdo lala ih, zingzoi a si tikah Russia lam ralthuam retnak le Rocket retnak hmun a si tin BBC cun a tarlang.

Kan dung khalah Crimea hmun pakhat a rak puak durdo zo ih, an zingzoi fel tikah Rusisa vanzam sakhan a rak si. Russia vanzam sakhan puak ahcun vanzam 8 hrawng a siat tin tlunsang ih zuktu pawl cun an pholang.

Tuitum cu Russia ralkap pawl umnak Crimea hmunram sung a puak vei hnihnak a si thlangih, tuitum puak ruangah ziangtluk Russia ralthuam a siat, Russia rocket ziangzat a siat timi cu felfai in theih a si hrih lo. Russia lam cun an ralthuam siatzat tivek an thup men theu ih, an phuang duh lo.

Crimea cu Ukraine ram sungih um ringring a sinan, 2014 kum ah Russia in ralthuam rinsan in an rak longih, an ramsung ah an tuah. Kukm reipi sung Crimea ah puak a um dah lo nan, Russia in Ukraine an do hnuah vei hnih a puak thlang. Ukraine lam cun Crimea ih Russia ralkap hmunpi puak thuhla ah thusuah an nei lo ih, daten an um men.

Asinan, kan dungah Ukraine president Zelenskyi in san umzet tongfang a rak sualsuak zo. Cumi cu “kanmah lawnglawng in kan tuar ringring men dnig a silo ih, Russia ralkap , Russia le Russia mipi pawl tuar ding zawngin kan cangvaih ve a tul. Cuvek lawngah doawknak a tawp thei ding a si,” tin a rak sim zo.