Sipuazi Hremnak Ngai Poimawh Lo Putin

Russia in Ukraine An donak thla 4 a kim zik cuahco thlang nan, ram pahnih remawknak zianghman an nei thei hrih lo ih, an do aw peh rero lai hrih.

Russia in Ukraine a do ruangah nitlanak ram le US cun a phunphun in Russia an hrem ih, Russia sipuazi tawpter an tum. Asinan, nitlaknak lam le US ih hremnak cu an hrang buainak a si phah lo thu Putin a tongsuak.

Putin cun “NATO pawlkom le US cun leitlun cu an duh dandan in uk an tum ih,an hmunram karh vivo an tum. An thuneihnak hnuai ih um thei lo cu misual tin an phuang. Tu ah Russia hremnak pek cu an hnapi ah an ngai ih, veikhat hremnak menah Russia tlaksiatter thluh an tum. Asinan, kannih Russia cu zalen ram kan si ih, an hlawhtling har ding.

“Leitlun hi anmai thuneihnak hnuai lawngah ret thluh an tum ih, lalbik si an tum. An kuthnuai ih um pawl cu duhduh in an sor ih, hamthatnak laksak vivo an tum. US le NATO cun leitlun sipuazi tlunah thuneih thluh an tum. Asinan, cuvek a ngah nawn lo. US khal daiziar ih doawknak ah nehnak co an zum aw zetih, leitlun pathian ah ruat aw in ti ding nei lo hlawknak lawng ruat an si,” tin Putin cun NATO le US a kap.

Russia le Ukraine buainak ahcun thuthar ciamco a um thei hrih lo ih, Russia cun Ukraine nisuahnak lam Donbas ramthen sung lakfel lawlaw an tum. Cucu, Ukraine lamin theitawk in an rak humhim ve. Ukraine lam pekawk an tum lo ih, Russia in kan tumram kan thlen hlansung cu dung kan sip lo ding an tive.