Sri Lanka President A Tlan

Ramsung buainak ruangah Sri Lanka president Rajapaksa cun Sri Lanka ram a suahsan ih, Maldives ram ah a feh.

Sri Lanka ram buainak ruangah mipi cun an president le Prime Minister tei pahnih cu an hna in bang dingin an nor, an phut ih, rampi huapin duhphorhnak an nei. Mipi in President inn le prime Minister inn an luhcilh hnuah President tei sungkua cu thupten ralkap hmunah an rak relh zo.

Ralkap hmun ihsin Airport an feh tumah mipi lamtang Airport hnatuan pawl cun an president cu rampi suahsan lo dingin an rak kham ih, ralkap pawl humhimnak in ralkap hmunah a kirsal. Cumi hnuah a tingaihnak thei nawn lo cun ralkap vanzam thawn Sri Lanka ram a suahsan ih Maldives ram ah an ttum.

President cun a nupi, fanau le amah kiltu ding mi pahnih a hruai ih, Maldrives khawpi ah umhmun an khuar hrih. Maldives ah um lanta an tum lo ih, ram thumnak feh an beisei hrih. Sri Lanka ram sumpai vuanci khal US ram ah a rak tlan zo.

Hivekin Sri lanka president a tlan suahnak san cu an rampi hrilawknak ah a nehtu pawlin thubuai an tuahsak ih,an kaih ding a phan ruangah tin an sim. President bik a suah ruangah Sri Lanka ram cu Martial Law phuan hrih a si ih, July 20 ah party tinkim telnak rampi president thar an hril ding.

Sri Lanka ram khal cithlah in ram uktu an rak hril theu ih, tuitum ah president bik a tlan ruangah kum tampi sung cithlah in ram uktu an rak pekawkmi khal a tawp thlang ding. President Rajapaksa hnuai ahcun an ram mipi in Gas lei ding an hmu lo , meisa a pek suak thei lo, datsi, yinan an harsa, eiin le sivai lei ding khal an haidaih aw tivekin an buai.

Cumi ruangah rampi huapin duhphorhnak nei an si ih, mipi in a thlatel in duhphorhnak an neih hnuah president le Prime Minister khalin an hna ihsin an ban ding thu an simfel zo. July 13 ah ka bangfel ding titu president bik cu a ban ni ah an ram sungah a um ngam nawn lo ih, a tlansuak fel zo.

Tu ah an rampi buainak a felfai hrih lo ih, duhphorhnak nei mipi pawl cu daiten um thlang dingin palik le ralkap pawlin an kham thlang.

Ralhrang Pawl in Saklam Chinram An Pan Bet – Sagaing ramthen kalaymyo in ralhrang ralkap pawl cun saklam Chin ramkulh an pan bet ti’n mithmutu pawl cun an sim. Ralhrang pawl cun mipi tomi vek mawtaw 6 an hmangih a sungah ralhrang pawl an khat thluh.

July 13, zinglam nazi 8 hrawngah ralhrang pawl cun Kalaymyo an suahsan ih saklam Chin ramkulh lamah an lut. Zinglam nazi 9 hrawng khalah ralhrang mawtaw dang 5 cun Kalaymyo suahsan in Chin ramkulh an pan bet. Kalay phunsang tlawng kiang 9maing check Gate khalah ralhrang pawl cun mipi sukso vak pawl nasaten an cek.

Khatlam ah ralhrang mipum 20 hrawng cu Falam in Kalaymyo lamah an feh ve. Falam peng Dokthek khua le Ramthlo khua karlak ih um ralhrang pawl cu Chuncung ramri an thleng thlangih, mipi ralkap pawl cun theitawk in an do rero phah. Chuncung le Dokthek khua karlak ih um Ralhrang pawl cu Falam in Hakha lam feh vivo tum an si.

Tahan Ah Nuhmei Dawr An Bauh – Kalaymyo Tahan veng Wesleyan biakinn sak, Letpanchaung lamzinpi ih um Pi Sangpuii ih dawr cu July 12 zan ah misual pawlin an bauhsak ih, a dawr sungih thilri an laksak.

Tahan ih um pakhat cun “Nuhmei a si ih, an ei hawlnakbik khal a si. Zangfah an um tukih, a poi lawlaw. Misual rukru cun ziang an thei awm silo.

“Tu cun Kalaymyo le Tahan ah rukru an tam tuk zo. Sun asikhalle inn kan kalh, dawr kan kalh timen in hnangam a theih nawn lo, ziangahtile tawh cepsiat dan an thiam tuk zo. Zan asile mipi kan vaksuak ngam lo ih, mirual hrang caantha ah a cang.

“Asinan, kan innhnenah rukru ,misual thawmvang kan thei asile khat le khat auh aw in ,bawm aw ton ding kan si. Cuti, mipi kan ttantlang lo ahcun rukru le misual torh ding an silo,” tin a sim.

Kanpetlet Ah Ralhrang Hmun An Kap – Chin ramkulh kanpetlet khawpi sungih ralhrang umhmun khuarnak hmunpi cu July 11 le 12 ah Kanpetlet CDF pawlin an va kap ih, ralhrang 2 an thi tin thu an suah.

Kanpetlet CDF cun “July 11 zinglam nazi 12 hrawngah kanpetlet khawpi penguk zungih umhmun khuar ralhrang ralkap pawl kan kap ih, zinglam nazi 3 tiang kan kap aw. Nazi 3 sung kan kah hnuin kannih cu himdamten dung kan sip.

“July 12, zinglam nazi 11 in nazi 2 tiang Kanpetlet khawpi peng fimzirzung ih umhmun khuar ralhrang ralkap pawl cu kannih CDF Kanpetlet in kan kap betih, ralhrang 2 an thi. Kannih lam cu himdamten dung kan sipsal thei a si,” tin thu an suah.

Champai Ah Thupte Thil Kuatmi Pawl Kaih Thluh An Tum – Champhai mawtaw neitu komkhawm cun Myanmar lamin Mizoram ih lut thilri pohpoh cek an tumih, daan lo ih lut pohpoh an kaih ding thu mipi an theihter.

July 14, zinglam nazi 6 in lamzin an cek ding tin thu an suahmi cu fehpi thok an tum. Hivekin an tuahnak san cu daan loin kuva ruh latu pawl lawng kham an si ih, thildang a phunphun daan lo ih laluttu pawl cu kham an silo tikah a dik lo an ti. Daan lo ih kuva ruh lakluh thu ah nasaten an buai zo ih, cumi ruangah daan lo ih bungrua lut pohpoh kaih an tum.

An ceknak ding hmun pawl cu Champhai palik Check gate le Dungtlang Palik Check Gate pawlah an si. Cozah thusuak siloin Champhai mawtaw neitu komkhawm thurelcat dan vekin feh tum an si ih, cozah lamin ziangtin an ti ding tikhal theih a si hrih lo.

PDF Pakhat In Ralhrang 15 A Thihcilh – Makui ramthen Yesagyo myone Tetaung khua phungki tlawng ih umhmun khuar ralhrang ralkap pawl cun phungki tlawng hmai ih feh PDF sungtel pakhat cu meithal in an kap ih, an kulh thluh. PDF lam cu amah pakhat lawng a si tikah tlansuahnak a um nawn lo timi a theih veten a kenmi bomb 3 cu ralhrang lakah a puakter ih amah rualin ralhrang 15 an thi. Ralhrang 7 cu a hmunah an thi ih, ralhrang 8 cu sizung ah an thi tin YesagyoPDF lam cun an sim.

Yesagyo PDF thuphuangtu cun “PDF tin hmin a pe aw zo nan, raldo zirnak khal a thehsuak hrih lo. Kanmah PDF pawl eiin kuattu a si tlunah khua kilhimtu pakhat a si. Tetuang khua ah ralhrang pawl umhmun an khuar timi a thei lo ih, bike mawngin Tetuang khua sung a feh. Cucu, Tetuang khua phungki tlawngih umhmun khuar ralhrang pawlin an hmuh tikah an rak kap ih, an kulh.

“A thok ahcun amah an kap ngah lo ih ,a bike an kah ngah tikah a bike a tlu. Ralhrang pawlin amah an kulh thluh ih, a luat nawn lo ding timi a theih veten a kenmi bomb pathum in amah naihte ih um ralhrang pawl a puah ih, a hmunah ralhrang 7 an thi. Ralhrang hriamhma ngah pawl cu sizung ah an fehpi ih, sizung ah ralhrang 8 an thi bet.

“Ralhrang hriamhma ngah pawl cu a zanzan in sizung an fehpi thei lo. Cutikah bese tuk pawl cu sizung thlen hnuah thi an tam. An zaten ralhrang 15 an thi tin kan thei. Ralhrang thi ruang pawl cu khuavan hnuah ralhrang mawtaw 3 in an phursuak. Amah PDF miraltha ih ruak cu ralhrang pawlin phungki tlawng kotah an urkang.

‘Ralhrang thihcilhtu kan miraltha cu upatnak kan pe. An sungte pawl himnak dingah a zuk siseh a hmin khal kan pholang ngam hrih lo a si,” tin a sim.

Nuclear Ah Tuantlang Tum Russia le Myanmar – Ralhrang hotu Min Aung Hlaing Russia a feh thu ah Russia cun Nuclear le tlunsang boruak thuhla ah Myanmar ralkap thawn nasa sinsin ih an tuantlang ding thu an sim.

Min Aung Hlaing cun Russia a um sungah Nuclear tuahtu pawl hmaiton in a be dingih, tlunlam boruak cangvaihnak ding thu khalah tuanvo neitu pawl a kawm ding timi cu Russia lam thusuak a si. Russia lam cun Myanmar ralkap thawn an tuantlangnak hngetter sin dingin Myanmar Cultural Central khal Russia khawpi Moscaw an din ih, onpuai khalah Min Aung Hlaing a tel ve ding.

Russia ralbawi pakhat cun “Myanmar ralkap thawn kan pehtlaihawknak cu a hlan hnakin a hngetkhoh sinsin ih, kan naih aw deuhdeuh. Hivek cu fimthiamnak, pehtlaihawknak, le thiamnak pawl ih kan tuantlang tumnak hngetter sinsintu khal an si,” tin a sim.

NUG palai pakhat Lin Thant cun “Ka theih dan ahcun ram pahnih remawknak felfai nei ih tlawng aw siloin bulpak thu ah thupten a fehduak in a lang. Min Aung Hlaing ih tumbikmi cu Russia thawn naih aw sinsin ih hnatuan tlang ding a siko.

“Ramdang ah ralhrang dinpitu an mal tukih, cumi ruangah ralhrang cun anmah dinpitu Russia an tlon rero. Hivek ruangah Myanmar ralkap khal ramleng in an hua deuhdeuh dingih, tuanpitu an nei lo deuhdeuh ding. Ziangahtile, Ukraine an do ruangah Russia cu ram tampi in an tuanpi nawn lo zo.

“Asinan, ralhrang ih duh bikmi cu Russia thawn hnget zetih hnatuan tlang ding a si ih, remnak thup tuahmi an nei ko ding. Ral dinhmun ah ziangtlukin remnak an tuah, an nei timi khal kan zingzoi rero hrih.

“Russia le ralhrang cu ralthuam le ral dinhmun ah rak tuantlang rero zo an si ih, ralhrang in rampi thuneihnak an lak hnu khalah khat le khat an tlawng aw rero zo. Russia mithiam hrekkhat khal Myanmar ah an feh leuhleuh tin kan thei. Curuangah ralthuam thuhla le tuantlang dan dingah manhlap zetin a feh khal a si thei,” tin a sim.

Ralhrang ralkap khalin Russia ih Min Aung Hlaing a feh thu an rak suah ve ih, cumi ahcun Russia Nuclear tuahnak ih hotu pawl a be dingih, boruak cet thilri tuanvo neitu pawl khal a be ding. Cumi hnuah Myanmar Cultural innpi lomnak ah a feh cih ding tin Ralhrang lam cun an rak tarlang ve.

Myanmar Politics thiam Than Soe Naing cun “Kei cun Nuclear thuhla khal ka zum lo ih, mipi hrinhronak men ah an ausuahpi siko ding. Myanmar Cultural onpuai hrang Russia a feh ding khal a silo dingih, a caan remcang ruangah a tel phah men sisawn ding.

“Cuhnak in thupi sawn cu Sri Lanka ram buainak vek tong lo dingin Min Aung Hlaing cun Russia hotu pawl a bia sisawn ko ding. Cucu, datsi, Yinan, Gas thuhla a si ih, Russia lo cu ralhrang in tlon ding an nei lo. Ziangahtile, ramdang pawl cun Russia bangin ralhrang an hrem ve. Russia khalin pek an rak tiamih ziangtin timi cu an phuang hrih lo a si,” tin a sim.

Twitter In Leitlun Milian Bik An Hek – Leitlun milian bik Elon Musk in Twitter a leisal lo ding thu a phuan hnuah Twitter lam an lungawi lo tukih, Elon Musk cu Court ah thubuai an tuahsak.

Twitter cun remawknak ziangkim tuah zo hnuah Elon Musk in Twitter a lei duhsal cu Twitter company tisiat a tumnak a si ih, remawknak umcia bangin a lei tengteng a tul tin Court ah zual an ko.

Elon Musk cun account lem le spam thuhla ah felfai sawn in fiahnak in pe dingah Twitter thuneitu pawl ka dil ih, in pe duh lo. Cumi ruangah Twitter leisal lo dingin umsal kan si tin a sim ve.

2022 ,April thla ah Twitter le Elon Musk cun Twitter lei ding aw dingin remnak an rak tuah. Asinan, sumpai an hlanawk fel hlanah Elmon Musk cun Twitter lam an rinum lo ruangah ka leisal lo ding tin thu a suahsalmi a si.

Tu ahcun Court an thleng zo ih, Court ah thu an rel thlang ding. Twitter in Elon Musk an hek thu ah Elon Musk cu a thinphang lo tukih, nehnak co dingin a um cia titu an um ve. Twitter lam cun remawknak bangin leiawk fel an duh.

Iran In Russia Hnenah Drone Kuat An Tum – Russia in Ukraine an donak ah Iran cun Russia lam bomnak pek an rak tum ve ih, Iran in Russia a bom tum dan cu raldonak Drone pek a si.

Iran ih tuahmi raldonak Drone thatuk cu Iran ralkap pawl in Russia ralkap pawl hnenah a hmandan an zirh hmaisa tumih, cumi hnuah kuat fel an tum. Tu ah Iran ralkap in Russia ralkap pawl Drone hman dan an zirhter zo maw? Iran in Russia hnenah drone a pe felzo maw timi cu felfai in theih a silo.

Russia le Ukraine doawknak ah ram pahnih cun Drone an hmangtangkai tuk. Cumi ruangah Ukraine khalin an hnenah Drone pe dingin ramdang pawl an rak dil rero zo. Russia in Ukraine donak ah ralthuam tampi an hmangral zo ih, Iran bomnak khal an cohlang ko ding tin US cun an sim.

Hivek dinhmun ah US cun theitawk in Ukraine kan bawm vivo ding tin thu an rak suah ve ih, Ukraine bawm hrih lo, Russia khal hremnak pe cuang lo Isreal le Saudi Arabia khal thurelpi dingin US president Biden cun tlawn a tum. Iran in Russia hnenah Drone pek an tum timi cu US thlingthlatu pawl ih thusuak a si.