Russia in Ukraine an do hnuah Russia ram kiangkap ih um ramdang pawl cu an ram himnak hrang anmah te um hnakin tin NATO pawlkom ah luh an tum ih, cumi lakah ram pahnih Sweden le Finland khal an tel.
Sweden le Finland cun NATO pawlkom lut dingin dilnak ca an rak thehlut zo nan, NATO member sungtel Turkey ram cun an rak dokalh. NATO member si dingin member si zo ram zate ih pompinak a tul. NATO member si zo Turkey in Sweden le Finland dilnak an rak dokalh lawk ruangah Finland le Sweden cu NATO pawlkom ah lut thei loin an um.
Tu ahcun Turkey in Sweden le Finland ram pahnih remnak a tuahpi thei zo ih, NATO pawlkom ah Sweden le Finland an luh ding khal rem an ti zo. NATO member dang lakin Sweden le Finland khamtu dang an um nawn lo asile NATO pawlkom ah Sweden le Finland an lut taktak thlang ding.
NATO pawlkom ah Europe ram 28 tlunah US le Canada an telih, ram buainak ah khat le khat raldo bawm aw dingin lungkimnak nei pawlkom picang an si.
Hivekin NATO pawlkom in ramri an kauh rero tikah Russia lam an rak lungphang ve ih, ramdang pawl remnak tuahpi in ttan an la ve thlang. Cumi tlunah Russia cun an ramri ah NATO ralthuam tuahnak siseh ralthuam retnak tivek a um pang asile an kap siat hngal ding tin thu an suah.
Leave a Reply