Russia in Ukraine an do hnuah do aw phah cingin khat le khat biakawknak an nei phah rero ih, khat le khat remawknak tuah thei loin an um. Tukhalah Ukraine cun Russia lamih dilmi an cohlan thei lo thu an sim ih, a san cu an tongkam le cangvaih dan a mil aw lo tin a sim.
Russia in Ukraine khawpi Mariupol an lak fel hnuah Ukraine nisuahnak lam Donbas cu nasa ten an do ih Ukraine ram lakbet vivo an tum. Tu ah Donbas lamah doawknak a sosang tukih, Russia cun ralthuam thatha an hmang. Hivek in Russia in Ukraine nisuahnak lam an do ciamco tikah ,Ukraine cun Russia thawn an biakawknak an cohlang thei lo ih, kahcawlh thurel tivek, nan cangvaih dan thawn zoh cun san a um hrih lo tin an simthei.
Ukraine president Zalensky cun “Donbas ih mipi umdan cu ngaihtuah um tuk an si thlang. Russia ralkap pawl cun Donbas sungin Sloviansk khawpi le Donetsk khawpi lak an tum. Cucu, kannih Ukraine ralkap pawl in a tha thei bikin Russia ralkap pawl kan do rero ve.
“Biakawknak khal kan cawlhsan hrih, ziangahtile kahcawlh thu rel khal sehla a thu men a si ih, Russia ralkap pawlin in nor rero thotho. Tu ah Russia ralkap pawl cu tum dan dang nei in an cangvai. Doawknak picang hram an thok zo a si,” tin a sim.
Russia in thla 3 zik Ukraine an do hnu lawngah mariupol khawpi an la thei ih, tu ahcun Ukraine khawpi bik Kyiv lam pan duh nawn loin anmah Russia ramri ih Donbas lam an pan. Donbas sungin Donetsk le Luhansk cu Russia president Putin in zalennak a rak pek zomi an si ih, cucu Russia ralkap pawl in a takin thlenter an tum.
Donetsk le Luhansk ahcun Russia dinpitu pawl an um ih, a hlankhan in Ukraine ralkap pawl an rak do theu. Ukraine ram sung a si ih, Russia in an ram sungah umter an tummi hmunram pakhat a si.
Leave a Reply