Russia le Ukraine doawknak thla 4 kim zikah boruak a dai thei hrih lo ih, Ukraine nisuahnak lamah nasa ten an do aw hrih.
Tu ahcun Russia ralkap pawl cun Ukraine nisuahnak lamin Kherson le Melitopol ih um Ukraine mipawl cu Russia rammi sithei dingin Russia passport an pe rero zo. Hivek cu Russia president Putin in theitawk ih zamrang in fehpi deuhdeuh a tum.
Kherson khua ih mi 23 pawl khal kan dung zarhte ni ah Russia passport an ngah ih, zamzang ten Russia rammi sinak nei dingin an zuam bet tin anmah in an sim ve.
Kherson khawpi uktu cun “Khawpi sungih um mipi tamzet cu Russia rammi sinak duh lawnglawng an si ih, tu ah Russia Passport dil tampi an um. Russia Passport an ngah hnuah Russia rammi sinak dil bet ding an si,” tin a sim.
Russia cun 2014 kum ah Ukraine ramsung in Crimea tikulh a rak lak sak zo ih, leitlun pawlkom le ramdang khalin Ukraine an rak run ngam zo. Ukraine nisuahnak lam Donbas ramthen sung khalah Russia in hmunram lak vivo an tum ih, Donetsk le Luhansk ahcun Russia in thuthenzung tiang an nei zo.
Sim rero zo bangin Russia cun Ukraine rampum do ciamco a tum lawk nan, a tum vekin thil a fehpi thei lo tikah tu ahcun Ukraine nisuahnak lam Donbas ramthen sung lawng nasa ten Russia ralkap pawl in an do ih, khawpi tamzet ah hmunram tamsawn luahmi an nei rero zo.
Hivek dinhmun ah Ukraine lam cun Russia cangvaih dan cu leitlun dankalh rori a si tin an sim ih, Russia ralkap kutah kan pe aw dah lo ding tin ttan an suah ve. Tu ahcun Ukraine lam ralthuam an tlasam zet tin thuhla a um ih, leitlun pawlkom le ramdang hnenah anmah ralthuam pe dingin an dil bet rero. Hivek cingin Russia ralkap pawl do an si ih, an ram humhim vivo an tum.
Leave a Reply