Ukraine President In Dilnak Russia In An Hnong – Thla 10 sung doaw thlang Ukraine le Russia khal be aw dingin an um rero nan, Ukraine president Zelensky ih dilnak Russia lamin an hnon tikah ram pahnih palai an be aw thei hrih lo dingin a lang.
Ukraine president Zelenskyi cun ram pahnih buainak ah remnak um dingin thil 10 a phutih, cucu leitlun dang pawl khalin pompi dingin a dil vivo hai. Asinan, Ukraine lamih dilnak cu Russia lamin an rak hnong cih hngal.
Russia cun “Ukraine thawn remawknak tuah ding cun hmunram 4 kan lak zomi hi relfel tengteng a tul. Hmunram 4 kan laksami hi Russia ram a si fel zo ruangah rel buai ding a si nawn lo. Hmunram 4 relsal an duh cun ziangtik hmanah kan pom dah lo ding a si,” tin thu an suah.
Ukraine president Zelensky ih dilnak ahcun remnak a um theinak dingah Russia in hmunram 4 an suahsan ding a si ih, 2014 kum ih Ukraine ram an rak lakmi Crimea ram khal an suahsan ding timi a tel. Himi pahnih hi Russia lamin an pom thei ve lo.
Russia cun 2014 kum ah Ukraine hmunram Crimea an rak laksak zo ih, tuitum an buai hnuah Ukraine hmunram 4 cu Russia ram a si tin an phuang zo.
Kalay CDM Sibawi An Kai – Sagaing ramthen kalaymyo pituh sizung ih sibawi pakhat cu CDM a tuah ruangah ralhrang pawlin an kai. Ralhrang pawl cun CDM sibawi Myint Moe Kyaw cu phone hmangin PDF pawl na bawm, na tuamhlawm theu tin an kai.
An sungte pakhat cun “Lamzin ih duty tuah ralhrang pawlin Bike mawng CDm sibawi Myint Moe Kyaw an rak cek ih, phone hmangin PDF na tuamhlawm tin an kai. Fiahnak fumfe khal an nei lo nan, CDM a tuah ruangah an kai siko.
“Ralhrang in rampi thuneihnak an lak hnuah sibawi khal Kalay Pituh sizung ah hna a tuan paih nawn lo ih, mipi lam a rak tang ve. Ralhrang in vei tampi hnatuan sal dingin an nor rero nan,ralhrang hnuai ih hnatuan a paih lo. Cutikah an kaih thei dan ding rori an tawlrel ih an kai a sibik,” tin a sim.
Ralhrang ralkap in rampi thuneihnak an lak hnuah ramsung hmun tinkim in ralhrang uknak dokalhtu CDM tuah tampi an um. CDM tuah lakin CDM 58 pawl cu ralrhang pawlin an kaih hnuah an hrem that zo ih , CDM 700 tlun an kai zo tin hminsin tuahtu pawl cun an sim.
Ralhrang In Mino 6 Hremnak An Pe – Yangon, Botathaung myone ih mino 6 an kaihmi pawl cu ralhrang in kum 12 ciar thawngtla dingin hremnak an pe.
Mino 6 pawl cu 2021 , August 10 ah ralhrang mipum 30 in ralthuam famkim thawn an umnak innpi ah an rak luhcilh ih an kai. Ralhrang pawl an ra timi an theih ruangah mino 2 cu innpi in an dawp ih leihnuai ah pahnih an thi. Mino 6 cu innpi sungah ralhrang pawlin an kai ih, dankalh ralthuam kol tin thubuai an tuahsak hnuah kum 12 ciar thawngtla dingin hremnak an pe.
innpi parin dawp that pahnih Mah Panti le We Zaw PHyo an si. Ralhrang in innpi sungih an kaih hnuah kum 12 ciar thawngtla dingin hremnak an pekmi pawl cu Ye Min Oo, Min Titsa Aung, We Yan Htet, Tiha Kuang Set, We Phyo Aung, Poe Kawh Kawh Khant pawl an si. Mino 6 tlunah Taxi mawngtu khal ralhrang in kum 7 sung thawngtla dingin hremnak an pe.
Leave a Reply