Ukraine President US A Thleng – Russia in Ukraine an do hnuah avei khatnak hrang Ukraine president Zalenskyi khal Ukraine suahsan in ramdang a tlawng ih, a tlawnnak ram cu US a si.
A thok ahcun thuhla thup rero a sinan, a darh thotho tikah khatlam khatlam in thu an suah zo. Zalensky cun US a um sungah US president Biden khal a be dingih , US tlangsuak upa thurelnak hmun khalah thu a rel ding.
US hi Russia in Ukraine an do hnuah nasaten Ukraine bawmtu bik an si ih, tu khalah US cun $2bm in Ukraie bomnak pek bet an tum. US in Ukriane an bawm ding thu cu White House khalin an nemhnget zo.
US ralthuam tha sinsin in Ukraine bawmnak pek vivo an tumih,ziangtik hmanah kan lo thlauthlo lo ding tin Ukraine an tiam. Tuhrih ahcun US in an tongkam an hlensuak zet lai in a langih, Russia in Ukraine a do hnuah Ukraine bawmnak pe tambiktu cu US an si.
US in Ukraine an bawm ringring ruangah Russia lam an rak thinheng tuk ve ih, Ukraine an donak an bansan maimai lo ding thu a sim. UK khalin Ukraine an bawm peh vivo ding thu an sim ve.
Russia cun 2022, February 24 in Ukraine a rak do thokih, tuini tiang ram pahnih doawknak an cawlhsan hrih lo. UKraine lamin bawmtu an neih ringring ruangah Russia ralkap pawl an do vivo dingin a langih, anmah Russias ralkap pawl an ram ih an kir hmaisa sawn lo ahcun Ukraine lamin doawknak cawlhsan an tum lo. Tuhrih ahcun Russia lam khal dungsip an tum hrih lo ruangah do aw peh vivo dingin a lang.
Leave a Reply