S.Korea ralkap hlun Lee Geun cu Ukraine ah Russia ralkap pawl do dingin a feh ve ih , thla 3 hnuah hriamhma thawn S.Korea a kirsal ih, Airport ah Korea Palik pawl cun an rak kai cih.
Lee Geun cun “Mit rori in a hmunih thilthleng ka hmuh tikah a hmunih feh dingin thutluknak ka rak tuah kha a dik tin ka cohlang. Ukraine Khawpi bik Kyiv ah ka thlegih, boruak a se tuk lawlaw. Ka thlen veten ralbawi ka sile silo in sut ih, ka si ka ti hnuah ka hoha dingmi pawlkom an din hngalih, raldonak hmunah kan feh cih.
“Hmaisabik ah Russia ralkap pawlin Ukraine raldonak mawtaw mawngtu an kah that lai ka hmu ih, ka riahse lawlaw. Cucu, ka mit rori ih kan hmuh hmaisabik a si.
‘Tu ahcun kan ram ka thleng zo ih, covid 19 daan vekin khum ka si hnuah ka thubuai buaipi a si ding tin in sim. Zingzoinak an neih hnuah daan ka pahbalmi an hmu asile hremnak in pe ding. Daan cu ka pahbal tla a si ding, asinan Ukraine mipi humhim dingin feh ka si ih,cucu a thupi sawn in ka ruat.
“Ukraine ah thla 3 sung ka caam ih, nasa ten ral ka do ve. Ukraine rammi sinak khal pek in tum nan, ka duh lo. Ziangahtile, rammi sinak lak cu a dik loin ka ruah ruangah a si. Tu ah ka hriamhma ngahmi tuamhlawm dingin Korea ah ratlung ka si ih, Ukraine ralkap sinak ID khal ka nei lai. Ka thinlung cun Ukraine ih kirsal a cak tuk.
“Ukraine ahcun tuah ding a tam tukih, buainak a tawp hrih lamlam lo. Ukraine ah kirsal ka duh, ziangahtile diknak hrang ral kan do a tul. Buainak a cem hrih lo ih, a thokfang lawng a si,” tin Ukraine ih a thiltonmi pawl a relsuak.
Lee Geun cu S.Korea Airport a thlen veten palik pawl in dik lo zetin ramri lan thuhla le Passport dik lo thubuai ruangah an kai hngal. Lee Geun in daan a rak pahbal taktak asile naa tukin hremnak peh theih a si.
Leave a Reply