Russia cun Ukraine thawn an buainak ah Ukraine lam cun khat le khat remawknak hnakin EU sungtel si dingin an zuam rero sawn ih, kan karlak ah remnak a um thei lo ding. Khatlam ah Finland le Sweden khal NATO pawlkom ah luh an rak tum ve ih, an lut a si ahcun Ukraine hnuah kan do dingmi ram pahnih an si tin Russia lam cun thu an suah.
Russia cun thla 2 le hrek sung Ukraine a do zo nan, tutiang Mariupol khawpi lo bak felfai zetin Ukraine khawpi lak theimi an nei lo ih, tu ahcun Ukraine nisuahnak lam Donbas ah an do aw peh. Russia cun Donbas lak an tum. Khat le khat do aw cingin ram pahnih palai an be aw rero nan, remnak zianghman an nei hrih lo.
Russia cun “EU member si dingin Ukraine theitawk an suah rero ih, an cangvaih dan ruangah kannih Russia thawn remawknak ding lamzin a um lo. EU pawlkom cun buainak reipi awh seh timi tumtahnak thup an neih ruangah Ukraine cu ralthuam in an bawm rero.
“Thlanglam ram NATO sungtel le US cun Ukraine le Russia ram pahnih buainak cu reipi daih dingin an duh. Curuangah, Ukraine ralthuam pe rero an si. Hivek a si ruangah biakawk lamih remnak um ding cu lamzin a fiak tuk zo.
“khatlam ah Finland le Sweden ram pahnih khal NATO sungtel si dingin an zuam rero. NATO pawlkom ih Sweden le Finland an luh men ah tih ding zianghman a um lo, Russia hrang a him lo timi kan theih cin cun kan kap cih ding. NATO ah Sweden le Finland an lut fel ih, Sweden le Finland ah NATO lam ralthuam ret an tum veten kannih cu kan cangvai cih ding a si,” tin thu an suah.
Leave a Reply