UN Ah Myanmar Hrang Timor President A Ausuak

UN Ah Myanmar Hrang Timor President A Ausuak – A tufang UN Meeting an neih rero laimi ah East Timor president Jose Ramos cu Myanmar mipi hrang a supaw thei nawn lo ih, ziangruangah Ukraine vekin Myanmar mipi ralkap kan bawm lo? tin thusuhnak a tuah.

East Timor president Jose Ramos cun “Myanmar mipi pawl hi leitlun in kan ngaihsak lo ih, bawmtu neilo phatsatmi vek an bangin ka ruat ih, ka tuarpi tuk. Leitlun in Ukraine cu ralthuam le eiin phunphun in kan bawm rero ih, hivek cu Myanmar mipi pawlin an theithiam lo. Ziangruangah Myanmar ih buainak cu theilo bangin kan umsan men timi thusuhnak ka dong tam tuk thlang. Hivekin leitlun cun Myanmar mipi kan ngaihsak lo nan, Myanmar mipi pawl cu zalennak hrang ral an do peh rero ih, a thi rero men.

“Ukraine siseh Myanmar khal buainak ih tel pawlkom zaten le hotu zaten hmaiton in be aw ih thurel ding an si. Ralhrang pawlin ramsung buainak a si ih, tin an humawk ringring khal a theih lo. Myanmar ram buainak hi kan zoh ringring men asile ramri ih um ramdang pawl an puai thluh thei tlunah Myanmar ram buainak khal a sosang sinsin men ding a si,” tin a sim.

President Jose Ramos hi Daw Aung San Suh Kyi bangin zalennak hrang Noble Prize laksawng rak ngah zotu pakhat a si ve ih, leitlun remdaihnak duhtu pakhat a si. Ram fate sihman sehla UN thurelnak ah Myanmar thuhla relsuaktu Est Timor president parah Myanmar mipi tamzet cun lungawi thu an sim rero ve.

UN Ah Myanmar Hrang Malaysia An Ausuak Ve – UN meeting ih tel ve Malaysia Prime Minister Ismail Sabri Yaakob cun Myanmar ram buainak thawn pehparaw in UN Security pawl cangvai lo ih an um thei cu mak a ti tuk thu a relsuak ih, ASEAN in ralhrang pawl remnak kan tuahpimi 5 khal bal men ding a si tin a sim.

Ralhrang in rampi thuneihnak an lak pekah Myanmar mipi cun UN Security Council pawl an cangvaih ding an rak beisei tuk nan, tutiang cu UN lam a takin cangvaihnak an nei lo ih, ralhrang an mawhthluk rero men hrih. Hivek ruangah Malaysia lamin mak an titukih UN meeting ah an relsuak.

Malaysia Prime Minister cun “UN Securimty Council in tutiang ralhrang hremnak zianghman an pe thei lo cu riahsiat thlakza ngaingai a si. UN cun Myanmar ram buainak cu ASEAN kuath an pe. Hivek cu Myanmar ram buainak in UN Security pawl thlir felawk an tumin a lang. Tuitum Myanmar ram buainak hi Democracy lawng a silo, ralhrang pawlin minung daan khal an pahbal rero zo. Curuangah ram pakhat men ih tifel theih a si nawn lo.

“ASEAN in ralhrang pawl remnak 5 kan tuahpi nan, tuini tiang ralhrang pawlin pakhat hman an pitlin duh lo. Hivek cu riahsiat thlakza ngaingai a si ih, ralhrang in remnak 5 kan tuahmi pawl pitlin an tum nawn loin a lang. Curuangah, kannih ASEAN khalin Myanmar ram buainak ah hmuar nei nawn in cangvai ding kan si ih, kekar dan thar kan neih a tul.

“Tuih kan feh tumdan a dik lo, kan hlawhsam rero asile lamzin dang kan hawl a tul. November thla ih ASEAN meeting tiangtiang kannih Malaysia cun kan hngak thei lo. Curuangah Myanmar ram buainak thawn pehparaw in ASEAN khalin kekar dan thar nei ding kan si,” tin UN meeting ah Malaysia Prime Minister a tongsuak.

Iran Ih Buainak Ah Mi 31 An Thi Thlang – Iran palik pawlin Nunau kum 22 mi Amini an thah thu ah mipi an lungawi thei lo ih, lamzawh duhphorhnak an nei peh rero lai. Lamzawh duhphorhnak neitu pawl cu Iran ralkap pawlin ralthuam hmangin an thekdarh ruangah mi 31 an thi zo.

Iran fala Amini cu Iran nunau ceiawk daan a thlun lo tin Iran palik pawl cun an rak kai ih, Iran palik pawl kut ih a umlai ah Fala Amini a thi. Iran palik pawlin nunau pakhat a ceiawk dan men ruangah an hrem that timi cu Iran mipi in an tuar thei lo ih, lamzin ah suakhawm in khawpi tinkim ah lamzawh duhphorhnak an nei.

Tutiang boruak a dai thei hrih lo ih, lamzawh duhphorhnak neitu mipi pawl an sosang deuhdeuh. Ralkap le palik pawlin lamzawh duhphorhnak neitu pawl an kham thei lo ruangah ralthuam an hmangih buainak a sosang sinsin. Tu ahcun iran rampi in lamzawh duhphorhnak an nei thlangih ,an buainak a sosang deuhdeuh digin a lang.