UN Palai Thar Hriltu Ding An Ruat Fel

Thet Mon Myint In A Dinhmun A Rel – Ralhrang in rampi thuneihnak an lak veten mipi lamtang ih ralhrang uknak rak do rerotu lemcangthiam Thet Mon Myint ( Mai Zung Cer Mawi ) khal caan reizet a hloh hnuah September 14 zan ah mipi hrang tongkam a nei ih, buainak a tonmi phunphun pawl a relsuak.

Thet Mon Myint cun “Keimai ruahdan ahcun kum 40 ka kim tikah lemcang in kan cawl ding tin saduhthahnak ka nei. Ka cawl ding timi cu pumcawmnak hrang ka cawl ding tinak a si ih, ka duh tukmi sawmnak ka don ahcun a caan le dinhmun ih zir in lemcan phah khal ka tum.

“Culo ahcun kan sungte , ka fale pawl kan ngaihsak dingih,kan kilkhawi thlang dingih, ka duhmi pawl tuah in biaknak lamah pum ka pe aw thlang ding tin ruahnak ka rak nei. Asinan, tu ahcun lemcan peh theih nawn loin ka cawl bepbep. Kan cawlhnak san pawl cu hmaisabik ah covid 19 natnak, pahnihnak ah keimai bulpak natnak, pathumnak ahcun ram buainak ruangah an si. Hivek cu ka cawlh duhdan le ka cawlh tumdan a silo lalaw. Tu ahcun mipi khal ka lo pehtlaih thei nawn lo a si,” tin a mipi pawl a simthei.

Lemcangthiam Thet Mon Myint cu milar dinhmun in ralhrang uknak dokalhtu a si ve ruangah ralhrang pawlin kai dingin thu an rak suah ih, cumi ruangah a himnak hrang an sungin an relh ve. Tu ah khawiah a um timi khal mipi a simthei lo.

Thinzar Wint Kyaw Court Ah A Lang – Ralhrang in Myanmar nunau nunphung daan na pahbal tin an rak kaihmi Thinzar Wint Kyaw khal September 14 ah ralhrang Court ah a lang ve ih, ralhrang pawlin an kaih hnuah a hmaisabiknak hrang thusuhnak an nei.

Myanmar sexy model le lemcangthiam Thinzar Wint Kyaw cu Shan ralkap SSPP hrang lem a cangih, Shan ralkap fawm hruh in a zuk a darh hnuah ralhrang pawlin Shan in Yangon a tlunnak lamzin ah an rak kai. Kaih a si hnuah ralhrang pawl cun Thinzar Wint Kyaw cu Myanmar nunau nunphung daan na pahbal tin thubuai an tuahsak.

Thinzar Wint Kyaw in a taklawng zuk le amahten thamawknak video pawl cu Dollar in American webiste ah a zuar theu. Curuangah a umdan le thuamhnaw hruh duhdan cu Myanmar nunau nunphung daan a pahbal a si tin ralhrang pawl cun thu an rak suah.

Thinzar Wint Kyaw tlunah Myanmar sexy model dang Nan Hmwe San khal ralhrang pawlin Myanmar nunau nunphung daan na pahbal tin an kai ih, anih khal thubuai a tuahsak. Thinzar Wint Kyaw cu Court ih a feh hnuah Insein thawnginn sungah a luhpi hngal ih, Nan Hmwe San khal Dagon myotit Court ah a thuhla an relsak rero lai tin buaipitu pawl cun an sim.

Ralhrang An Kai Ngah – Makui ramthen Maing myone Taungsung khua kiangih vakkual ralhrang palik pawl cu September 14, sun nazi 1 hrawngah mipi ralkap pawlin an kap ih, ralhrang pakhat an kai ngah.

Mipi MVRF thuphuangtu cun “Yinan laihnak hmun halin ralhrang pawl an feh ih, kannih mipi ralkap pawl cun naiten kan va kap. Ralhrang palik zaten 8 hrawng an si ih, ralhrang pakhat kan kai ngah.

“Ralhrang dang 7 pawl cu an tlansuak man ih, ralhrang pakhat kan kaihmi hnenin G3 zunkhat, cerek 115, phone pakhat, tangka ting 1 tlun le card pakhat pawl kan laksak. Ralhrang tlansuak lakah hriamhma ngah an um ih, kan kaihmi pakhat khal hriamhma a ngah ruangah a tlan thei lo ih,kan kai ngah a si,” tin a sim.

UN Palai Thar Hriltu Ding An Ruat Fel – UN kumcem meeting cu September 13 in an thok zo ih, tu ahcun kum thar hrang ramtin ih UN palai thar nemhngettu ding pawlkom khal an ruat fel zo.

UN sungtel ram 193 pawlih palai thar dilmi cu US, China, Russia , Angola, AUstria, Guyana, Uruguay , Maldives le Zambia ram pawlin an hril ding. US, China le Russia ram pawl cu palai hriltu ding a hnget an si ih, culo ramdang pawl cu kum tinten an hril cop.

Ramtin ih UN palai dingah thehlutmi an nei cio ih, Myanmar ram thuhla khalah NUG le ralhrang in UN palai sinak an cuh aw, an thehlut veve. Cucu, UN palai hriltu ding pawlin an relcat thlang ding. Nikum ahcun UN palai hriltu ding pawlkom pawl cun Myanmar palai hrang hril harsa an ti ih, Myanmar palai hrang mithar hril loin a hlun an ring men.

Tui kum teh UN palai hriltu pawlin mithar an hril ding maw, a hlun U Kyaw Moe Tun an ret hrih ding maw? NUG palai an hril thlang ding timi cu theih a si hrih lo. U Kyaw Moe Tun hi NUG cun UN ih Myanmar palai dingah an thehlut nan, nikum ih UN palai thar hriltu pawl cun NUG thehlutmi le ralhrang thehlutmi an pom lo veve ih, U Kyaw Moe Tun cu NUG palai sinak siloin UN palai hlun a sinak sawnin an tuanvo an rak pe bet.

Tuitum ahteh UN palai thar hriltu ding pawlkom pawlin palai thar an hril pei maw timi cu mipi hngah reromi pakhat a si. Myanmar ramsung le ramleng ih um Myanmar mipawl cun UN hnenah NUG palai dinhmun in U Kyaw Moe Tun cohlang dingin le NUG cozah khal Myanmar cozah ah pom dingin dilnak an nei ih, hmun tinkim ah UN palai hrang lamzawhnak an nei.

Nikum UN palai thar an hril ding ttum khalah Myanmar mipi cun nasaten lamzawhnak an nei ih, UN hnenah NUG palai le NUG cozah pom dingin an rak dil. Asinan, UN palai hriltu pawl cun mithar hril loin mihlun an rak ret. Tuitum ah ziangtin thu a suak ding timi cu mipi theih cak zetmi pakhat a si.