UN Security Council Ah Ralhrang Thu An Rel Ding

UN Ah Ralhrang Thu An Rel Ding – UN Security Council in ralhrang pawl thu an pekmi thawn pehparaw in ralhrang lamin an thlun maw? thlun lo timi cu UN Maynmar palai Noeleen Heyzer in March 13 ah UN Security Council ah simfiangnak a nei ding ti’n Myanmar UN palai U Kyaw Moe Tun cun a sim.

UN Security Council cun kan dungah lungrual in ralhrang pawl thu an rak pe zo ih, kaihmi pawl thlah zalen thluh dingin le mipi parah ralthuam hmang nawn lo dingin an rak theihter. UN Security Council cun March 15 tiang ralhrang pawl caan an pe.

U Kyaw Moe Tun cun “Kan theih zo bangin 2022, December 21 ah UN Security Council cun ralhrang pawl thu an rak pe. Hivek cu Myanmar thuanthu ah UN Security Council in avei khatnak lungrual zetin ralhrang pawl thu an pekmi a si. Thupek men cu duhthusam a silo nan, thupek an nei thei khal karbak pakhat a si ve.

“UN Security Council in ralhrang thu an pekmi hi March 15 ni netabik ah ret a si ih, cumi hlanah ralhrang lamin an thlun maw timi zohfelnak a um ding. March 13 ah ralhrang cangvaih dan an zoh dingih ziangtin an zohfel ding, ziangtin thu an rel ding timi cu felfai in theih a si hrih lo. A hlan ahcun UN in Myanmar palai hrang an retmi pawlin thuhla simfiangnak an nei theu. Ziangtin thu an rel ding ti cu kan thei hrih lo.

“Cucu, UN Security Council thawn pehpar aw in kan simtheihmi si sehla, culo thildang khalah UN nornak ka nei peh rero lai. Myanmar mipi humhim an tulzia khal ka sim ber rero zo. Cumi tlunah ralhrang pawl vanzam zamthei cin tuahsak ding khalin ka dil. Kannih cun theitawkin thu kan thlen rero nan, anmah lam cangvaihnak an neih lo tikah theitawk kan suah peh a tul. UN Security Council hrang khalah cangvaih vukvi a harsa timi cu kan theihthiampi tuk ve.

“Ziangtlukin anmah lamah an harsa asikhalle kannih tuanvo cu dil peh vivo ding a si ve. Curuangah ziangtikah a takin a thleng timi ka thei lo nan, ka hna a si bangin ka dil bet vivo ding. R2P hmang dingin, Vanzam zam theinak cin tuahsak dingin, ralhrang hnenah ralthuam zuar lo dingin, ralhrang hnenah datsi zuar lo dingin ka dil peh vivo ding a si,” ti’n a sim.