US le China karlak tha lo laiah US cun Taiwan hnenah ralthuam a zuar bet ding thu an lungkim thluh zo ih, China an thinheng deuhdeuh.
US in Taiwan hnenih ralthuam an zuar dingmi pawl cu $120m man raldonak lawngpi le a tulsami ralthuam dang phunphun an si. Raldonak lawngpi cu Taiwan le China karlak ih China raldonak lawng pawl zuam theitu a si ding tin Taiwan lamin an sim ve.
Taiwan cun US hnenah ralhtuam dang lei bet dingin an dilmi a si ih, US cun Taiwan dilnak an rak cohlan sak zo. Taiwan cun US lamin an relfel zo bangin thla 1 sung rori ah raldonak lawngpi an ram Taiwan sungah lut rori dingin kan zuam ding tin an sim.
Taiwan cun “Kan ram tipi kapah China raldonak lawng an cangvai theu. Cumi ruangah kannih khalin tipi parih cangvaihnak hrang US hnenah raldonak lawngpi lei dingin thurelcat kan nei, tu ahcun kan ram ah raldonak lawngpi a thleng thlang ding a si,” tin mipi an theihter.
China cun “US ih cangvaih dan cu kan duh lo lawlaw ih, buainak tawtoktu an si. Hivek cu ram pahnih karlak ah buainak um dingin cangvaihnak phunkhat khal a si. US cun One China timi kan fehdan an theihthiam a tul. Ram buainak tawtok ding zawng khalin cangvai nawn hlah haiseh,” tin an rak simthei ve.
China In An Ram Zohthuptu Man An Khiah – China cun an ram humhimnak siatsuah ding zawngih cangvai ramdang thlingthlatu an hnenih hek theitu cu $15000 pek an tiam thu leitlun an theihter.
China cun “Kan ramsung in siseh ramleng khalin siseh kan ram siatsuah tum zawngih cangvai, kan ram himnak hrang thu poimawh theihsuak tumih cangvai, ramdang palai pawl sinak kan hnenih simtheitu cu Yuan ting 1 lole $15000 pek an si dingih, sunloinak capi khal an dong ding a si,” tin thu an suah.
Thuhla thlentu pohpoh China cun tangka pek an tiam nan, thuhla an thlenmi zirn tangka an pekmi a bang aw lo. Yuan thawng 10 in yuan ting 1 tiang thu poimawh petu hnenah tangka pek an tiam. Cumi tlunah China cun an ram phatsantu le an ram thuhla thup ramdang hnenih simtu pohpoh an hnenah simthei thluh dingin an ram mipi zate khal an theihter.
Thuhla theitu cun China cozah hnenah online hmangin maw, phone khalin sim a theih tin an tarlang. Hivek cu China in kum tampi sung an rak fehpi zomi a si ih, tu ah an ram him sinsin dingin khohsawn in fehpi an tum. 2017 kum khalah China ram Beijing uktu pawl cun an ram zingzoithu pawl an hnenah thlen theih a si thu mipi an rak theihter zo ih, mipum 5000 cun an thutheihmi pawl cozah hruaitu hnenah an rak theihter. Cupawl cu laksawng pek thluh an si tin an tarlang.
Leave a Reply