China In nasaten an hringhro, an soisel rero nan US House Speaker Nancy Pelosi cu August 2 zan 11 hrawngah Taiwan ah a ttum thotho ih, Taiwan hruaitu pawlin Airport ah an rak hmuak.
Taiwan ah Nancy a ttum a si ahcun kan thungrul hngal ding titu China cu an thinheng tukih cangan lai tiang ahcun a takin cangvaihnak an nei hrih lo. Asinan, China raldonak vanzam hrekkhat cu Taiwan ramri lan tiangin an zam tin leitlun thuthang cun an tarlang.
China cun August 3 in 6 tiang cerek ngai hmangin raldo zirnak an neih ding tin thu an suah ih, raldo an zirnak ding hmun China tipi ah mipi lawng feh lo dingin an theihter zo.
Nancy Pelosi cu Airport in a thlennak ding Hotel tiang tluangten a thleng zo ih, Hotel kotah China dinpitu thenkhat in US duhlonak an rak langter ve. Taiwan cun ram pakhat kan si ih, Democracy ram kan din ding tin ttan an suah, theitawk an zuam. Cumi cu China lamin an rak duh lo ih, Taiwan cu China sungih um, China thuneihnak hnuai ih um an si,Curuangah ramdang hrolh aw hlah uh an ti ve.
Nancy cun “Taiwan ka tlawnnak san cu Democracy an duhnak dinpinak hrang a si. An hruaitu pawl thawn thureltlangnak kan nei dingih, tuantlang dan ding pawl khal kan ruah aw ding. Leitlun in Democracy uknak le autocracy uknak ah duhhril theinak kan nei thluh. Curuangah Taiwan ih duhhrilnak cu kan zah ding a si,” tin a sim.
Taiwan ah ziangtik tiang Nancy a um ding timi cu a hlankhan in mipi theihternak a nei lo ih, August 3 ah Taiwan president le Taiwan ram hruaitu pawl thawn an tongaw ding. US cun Democracy ram si duh Taiwan an bom vivo ding thu leitlun theih ah an rak aupi rero zo ih, a tawp tiang Taiwan kan dinpi ding tin an sim.
China cun Taiwan thuhla ih US cangvaih dan ah US cu vei tampi ralrinnak an rak pe zo ih, tuitum khalah Nancy Pelosi cu Taiwan feh lo dingin an kham rero. Asinan, Nancy cun China thunuai ah kan um lo, Taiwan cu mahte uk aw ram an si tin Taiwan ah a ttum hrim. Hivek ruangah China raldonak lawng tamzet khal Taiwan ramri ah an um zo ih, cumi thei in US raldonak lawng khal Taiwan tipi lam an pan ve zo.
Kum reipi sung rak ngiar aw rero zo China le US karlak boruak a sosang zetih, China lam a takin an cangvaih hmaisa lo ahcun US cun China kah an tum lo. Asinan, China lam an cangvaih pang asile US khal daiten ummen an tum lo ih, China an thungrul hngal ding thu an rak suahpi rero zo. Russia le Ukraine buainak a reh thei hrih lo ih, US , Taiwan le China an buai bet asile leitlun mipi tamtuk kan buai phah ding tin leitlun mithiam pawl cun an sim.
Leitlun Politics thlirtu pakhat cun “China le US rori hi cu an kap aw lo men ding,ziangahtile sipuazi ah nasaten zuam aw an si ih, an kahawk cun an sipuazi a tlaniam thluh ding timi an thei veve. Asinan, Nancy Pelosi hi US ram ih thuneitu sangbik pathumnak dinhmun luah theitu a si ve tikah China lam an fimkhur zet.
“Thil um thei pakhat ih lang cu Nancy in Taiwan a suahsan hnuah China an cangvai pei maw? Taiwan an kap pei maw timi a si. China in Taiwan a kap a si ahcun US khal an tel cih dingih, leitlun a buai thluh thei. Curuangah kap aw lo hai sehla duh a um bik ko,” tin a sim.
Leave a Reply