US Parah China An Thinheng

Kum tinten an tuahmi leitlun harhdamnak pawlkom meeting ah US cun Taiwan telter dingin thu an bur ih, WHO meeting ahcun Taiwan cu tel dingin sawm an si zo. Hivek ruangah ,China cu US parah le WHO parah an thinheng ngaingai ih, Taiwan cu China ram sungih um a si tin an theihter.

China cun WHO meeting ah Taiwan tel ding rem an ti dah lo ih, nikum khalah China elnak vekin WHO meeting ah Taiwan sawm an rak si lo. Tuitum ahcun Taiwan khal tel ding an si tin US cun an dil ih, China cun US dilnak an dokalh cih nan, Taiwan cu WHO meeting ah tel dingin sawm an si.

US cun an thiamnak hmang tangkai in Taiwan cu zingzoitu dinhmun khalin WHO meeting ah telter ding kan si tin thu an rak bur ih,an hlawhtling. China le Taiwan an buai hlan 2009 le 2016 kum khalah Taiwan cu WHO meeting ah zingzoitu dinhmun in an rak tel dah nan, cumi cann ahcun China cu an pon a rak tam lo.

Tu ahcun China le Taiwan nasa ten an buai ih, ram an cuh aw. China in Taiwan cu kan ram sungih um mahte duhduh tuah thei lo an si an tilai ah Taiwan cun ram pakhat kan si, China in zalen ram kan si tin leitlun pawlkom le ramdang pawl cu anmah cohlang in an rak sawm rero ve. Hivek ruangah ram pahnih nasa ten buai an si ih, US cun nasa ten Taiwan a humhim.

China ramdang vuanci zung thuphuangtu cun “Kannih China cun WHO meeting kai dingin US in Taiwan an thunlut cu kan duh lo lawlaw. China le Taiwan cu ram pakhat a si ih, Taiwan cu China thuneinak hnuai ih um a si. Leitlun pawlkom siseh ramdang thawn pehtlaihawknak ah Taiwan cu China thuhnuai lawngin a tel thei ding a si,” tin a sim.

China le Taiwan ram buainak hi a kum tel a si thlang nan, tutiang cu China in a takin Taiwan a kap hrih lo. Russia in Ukraine a do hnuah China khalin Taiwan a do ve pang ding tin Mipi tampi an thinphang zet nan, tuini tiang cu a takin China lam an cangvai hrih lo. US ,Japan le S.Korea ram pawl cun China in Taiwan a do asile Taiwan run in China kan do ve ding tin thu an suah thluh zo.