US ram in kum 50 lai rampi huapih an rak fehpimi nauthlak siannak cu US Court sangbik Supreme Court cun rem a ti nawn lo ih, State tin hruaitu pawl ih tha tidan a si ding tin thu an suah.
US cun 1073 kum in nu in a tlin lo a si ahcun, nui’ dinhmun a that lo ahcun nauthlak sian a si timi an rak fehpi. Kum reopi sung an fehpi rero hnuah US president hlun Donald Trump cun nasa ten nauthlak siannak a dokalh ih, US Supreme Court ah thudik duhtu Judge a rak ret bet ciamco. Cumi ruangah tuvek in US Supreme Court cun dik zetin thu an suah thei a si tin mipi tamsawn cun an sim.
Hivekin US Supreme Court in nauthlak duh lonak thu an suah tikah US president hlun Donald Trum cu lungawi aupiang in caan a hmangih, US president tuan rero lai Biden sawn cun US supreme Court ih thusuak ruangah a riahsiat thu a rak tarlang ve.
Tu ihsin US ram sungah zalen zetin nauthlak sian a si nawn lo ih, State tin ih anmai State sung fehpi daan ding thu an suah ding. A hlan ahcun US Supreme Court ih siannak vekin zalen zetin nauthlak rak sian a si ih, State tin thuneihnak a um lo.
Tu ahcun nauthlak thuhla ah US state tin thuneihnak pek an si ih, State tamsawn cun nauthlak duhlonak an fehpi ko ding tin thu a um. US ramsung um hrang nauthlak thuhla ah rampi huap hman ding daan siloin umnak State tin ih pomdan sawn an fehpi ding.
Hivek ruangah nauthlak duh pawl cu lamzawh duhphorhnak an nei cih ih, nui dinhmun ih zir a sisawn, nu duhdan sawn a si ding, nui’ himnak ruahsak sawn ding a si tin an au.
Biden cun “Hivek cu nu pakhat lole nunau pakhat harhdamnak ngai poimawhlonak pakhat a si. Hivek ruangah nunau tampi cu thi thei dinhmun ah an um ringring zo. Hrekkhat tla cun nunau pawl an nunnak humhimnak hrang an tuahmi ruangah hremnak pek duh tiang an um thlang. Hivek a si ahcun nunau sualpi tuar khal hremnak pek duh tiang an um ding. kan ram le mipi hrangah thiltha lo zet a si.
“Nauthlak khamnak State ah nan um ih, nauthlak duh ruangah hmundang nauthlak siannak State ah nan feh asile a suak tharmi daan ih kham a silo. Cuvek caan ah State hruaitu pawlin na parah buainak an nei asile ,ka thuneihnak , kan cahnak le ka sinak hmangin theitawk ka lo zuampi ding a si,” tin mipi a simthei.”
Ralhrang In Tamu Ah Mi 3 An That – Sagaing ramthen Tamu myone ရန်လင်းဖိုင်ရွာ khua cu ralhrang ralkap pawlin June 23 ah an luhcilh ih, khuami 2 an that. Ralhrang pawl cu ခွန်မွန်းနွန် khua ah an feh peh ih, khuami pakhat an kaih hnuah an that bet tin ruang buaipitu pawl cun an sim.
Khuami pakhat cun “Ralhrang pawlin kan khua in inn hrekkhat an urkang ih,kan khua in an kaihmi mi pahnih le ခွန်မွန်းနွန် khua ih an kaihmi mi pakhat, an zaten kaihmi 3 pawl cu an that thluh. A ruang an hlonmi pawl cu kannih khuami pawlin kan va sar ih, kan vuiliam zo.
“A tufang Tamu peng Yanlinphaing khua kiangkap ah ralhrang ralkap le Tamu PDF pawl nasa ten an do aw ih, doawknak a um tinten ralhrang pawl cun mipi an telter ringring. Kan dungah ralhrang pawl cu biakinn ah umhmun an rak khuar zo ih, an doawk tikah biakinn a siat phah.
“Doawknak a um tikah kannih mipi pawl cu khua ah um ngam loin kan tlan theu. Cutikah ralhrang pawl cun PDF dinpi ah an ruat cih ih, khua sungin duhduh inn an urkang. Tlan lo sehla duhduh an kai ih, an that fawn, mipi kan umdan ding khal a har tuk. Ralhrang pawl ih tumtahmi cu doawknak a um tinten doawknak kiangkap ih khua mipi pawl tuarter a si,” tin a sim.
A tufang kalay le Tamu lamin karlak Yanlinphai khua kiangkap ah ralhrang ralkap le Tamu PDF pawl ni 2 peh in an do aw zo ih, doawknak ah ralhrang ralkap le Pyu Saw Htee komkhawm 25 an thi tin Tamu PDF cun thu an rak suah ve.
Ralhrang In Ralphaw An Hmanmi 4 An That Thluh – Sagaing ramthen Kanbalu myone Trinmaw khua ih mino 4 pawl cu ralhrang ralkap pawlin an kaih hnuah ralphaw ah an hmangih, lamzin hmaihruaitu an ret. Ralhrang in ralphaw ih an hmanmi mino 4 pawl cu thlah zalen duh nawn loin an that ih, an ruang pawl khal an hlon men. Cucu khua mipi pawl in an hmu ih, an vuiliam.
Khuami pakhat cun “Ralhrang in mino 5 an kai ih , 4 an that. Mino 4 pawl ih ruang cu tidai ah kan hmu zo ih, pakhat khawiah an ret, ziangtin an tuah timi cu kan thei lo. Ruang kan hmuhmi pawl ah a rak toih thlangih, kan vuiliam cih a si,” tin a sim.
Ralhrang in rampi thuneihnak an lak hnuah Sagaing ramthen sungah doawknak a sosang tuk ih,khatlam khatlam in an tuar. Sagaing ramthen sung ahcun taktak in an do aw ih, ralhrang thi khal an tam. Ralhrang thi an tam tikah ralhrang pawl cun duhtawk in mipi an that ve.
Sagaing ih um pakhat cun “Kannih sagaing ramthen sungah doawknak a sosang tuk lawlaw. Mipi ralkap pawl an thazang a cak ih, ralhrang dodan an thiam. ralhrang 20, 30 an thi tivekih thu an suahmi khal zum lo vekin rak um duh hlah uh, a takin ralhrang pawl an that taktak.
“Cumi rualrual in ralhrang thi an tam tikah ralhrang pawl khalin mipi siseh PDF khal thahmi an nei tam ve. Kan dung khalah mipi an kaihmi 30 lenglo ralhrang pawl cun a bur ih an that ih, khua an urkangmi khal a tam tuk zo. Doawknak rapthlak kan thleng ih, thisen a luang tuk tuk zo a si,” tin a sim.
Ralhrang in Sihni 3 An Kai – Sagaing ramthen Mungzua khawpi ah NLD palai kaihmi hrang sihni tuantu Moe Zaw Htun le sihni dang 2 cu ralhrang ralkap in an kai ih, sini dang 2 khal an umnak le thuhla theih a si nawn lo.
Sihni 3 pawl cu June 20 ah ralhrang ralkap pawlin an rak kai ih, sihni dang pahnih cu khawiah an ret, ziang an tuah, ziang an cang tivek tiangin an thuhla theih a si nawn lo. Kaihmi sihni 3 khal ziangruangah ralhrang pawlin an kai timi a san felfei in an thei hrih lo.
Sihni Moe Zaw Htun cu ralhrang ih kaihmi NLD palai Myint Naing le mungzua dohthlengnak hotu Wai Moe Naing pawlin thubuai buaipitu le an lamtang ih ding a si. Midang sihni pahnih an kaihmi khal dothlengnak ruangah ralhrang ih kaihmi pawl dinpitu tawlrelsaktu sihni an si ve.
Mungzua ih um pakhat cun “Kan dung kum 2021 June thla hrawngin ralhrang ralkap cun dothlegnnak ruangih an kaihmi pawl buaipi lo dingin sihni pawl ralrinnak an rak pe. Ahleice in pukmah 505 thawn thubuai an tuahsakmi pawl cu ralhrang in buaipi an duh lo. Hivek hnuah tu ahcun a takin an kai taktak thlang.
“Ralhrang in sihni 3 an kaih tlunah sihni dang 2 khal an thuhla kan theih nawn lonak a rei thlang. Tu ih an kaihmi sihni 3 khal ziangruangah an kai timi thu an suah duh lo. Sihni an si ih, ziangvek thubuai khal tawlreltu ding an si. Tu ahcun sihni pawl khal an him nawn lo a si,” tin a sim.
KIA Le PDF In Ralhrang 30 An That – Sagaing ramthen Banmuak myone ah kachin ralkap KIA, Bamauk PDF le Intaw PDF pawl cun a ni telin ralhrang an dotlang zo ih, ralhrang thi an tam tin thu an suah.
Bamauk PDF hotu cun “Ralhrang pawl kan lam pan in an ra ding timi kan theih ruangah lamzin in kan rak bawh. Cumi ahcun kachin ralkap KIA, Intaw PDF le kannih Bamuak PDF tin kan rak do. Umhmun thaten khuar in kan do tikah ralhrang 30 hrawng cu an thi in kan hmu.
“Ralhrang thi le hriam ngah an tam tikah ralhrang pawl cun ralthuampi vei 50 tluk an kapsuak. Cuvek dinhmun kan thlen ahcun kannih khal hmainor hrim loin kan himnak hrang dung kan sip.
“Intaw le Bamuak lamzin ah ralhrang rak do kan si ih, kan boruak a sosang tuk lai. Tu ahcun Intaw le Bamuak lamzin khal khar a si. Ralhrang thi an tam tlunah hriam ngah an tam ih, do aw peh vivo thei in kan um. A hlanah Intaw PDF le KIA in Intaw lamah nasa ten ralhrang ralkap an rak do rero zo.
“Curuangah, mipi kan cah duhmi cu June 25, zinglam nazi 6 tiang Intaw le Bamuak karlak lamzin zawh hrih lo dingin mipi pawl kan sawm duh. June 23 in lamzin tluanah kan do aw thok zo. Ralhrang pawl thi an tam tikah atthlakza in an cangvai thei, cucu kanmah in kan do vivo ding a si,” tin mipi sawmnak a nei.
Sagaing le Kachin kiangkap Intaw ah KIA le PDF cun June 20 lamin ralhrang ralkap pawl an do rero zo ih, tutak fang cu Bamuak le Intaw karlak lamzin ah KIA, Intaw PDF le Bamuak PDF pawl tangtlang in ralhrang ralkap pawl an do rero. Cumi ruangah mipi feh hrih lo dingin theihter an si.
Ralhrang in PDF Sakhan Pakhat An La – Makui ramthen Chauk myone sungih cangvai Kyauk Pan Daung PDF sakhan cu June 23 ah ralhrang ralkap pawlin an luhcilh ih, sakhan an lak tlunah PDF pakhat a thi, kaihmi 2 khal an um tin Kyauk Pan Daung PDF cun thu an suah.
Ralhrang mipum 100 cun ralthuam phunphun thawn PDF sakhan an luhcilh ih, a hmunah pDF sungtel Ko Htet ( kum 20 ) mi a thi. Theitawk in ralhrang pawl rak do rerotu PDF sungtel Ko Zin Min Soe ( kum 22 ) le Ko Ye Htun Naing ( kum 25 ) khal hriam an ngah ruangah an tlan thei nawn lo ih, ralhrang pawlin an kai.
Kyauk Pan Daung PDF hotu cun “Thuhla kan theih veten kan thlan cih ih, thimlak zanvar ten kan buai. Ralhrang pawlin Kanmah thilri in pe theutu an kai ngah ih, a zanzan in kan tlan thluh. Zinglam nazi 5 hrawngah ralhrang pawl an ra nawn lo ding ti’n sakhan ih kan thilri hrekkhat kan lak man lomi pawl la dingin kan feh.
“Ralhrang pawl an rat ding kan zum nawn lo hnu zinglam nazi 6:30 hrawngah ralhrang pawl an ra thlengih, ralthuampi thawn in kap ciamco. Cunah kannih khalin kuttuah meithal te thawn kan rak kap ciamco ih, dung kan sip phah. Kan sungtel pahnih cu hriam an ngah ruangah dung an sip thei nawn lo ih, kan run man fawn lo ralhrang pawlin an kai ngah. A hmunah kan sungtel pakhat a thi. Thilri pawl lasal dingin mi 12 feh kan si.
“Mi 12 le ralthuam famkim nei ralhrang mipum 100 cu a thlau aw tuk lawmmam. Sakhan sungin kan ralthuam hrekkhat meithal zun 18 le thildang neuhneuh khal kan la man lo ih, ralhrang pawlin an la thluh. Kan sakhan khal an urkang thluh a si,” tin RFA a simthei.
A tufang Makui ramthen sung khalah doawknak a sosang tukih, mipi ralkap komkham cun palik sakhan le ralhrang sakhan tiang an sim hluahhlo. Ralhrang sakhan in ralthuam tampi an lak sak theu ih, ralhrang pawl khalin PDF sakhan umnak an theihmi cu an sim rero ve.
Ralhrang 4 An Thi – Makui ramthen Yesakyo myone Aung Tapi khua le Tuang Oo khua karlak ih feh ralhrang ralkap pawl cu June 24,zanlam nazi 4 hrawngah PDF pawlin an do ih, ralhrang 4 an thi tin mipi an theihter.
Yesakyo PDF hotu cun “Doawknak ah ralhrang 4 an thih tlunah hriam ngah tampi an um. Kannih Yesakyo PDF lam khalin thilri kuattu pakhat kan can ve. Ralhrang pawlin an kap ngah ih a nunnak a cem fel. Kan ui lawlaw ih, upatnak kan pe a si,” tin a sim.
Makui ramthen khalah mipi ralkap le ralhrang rakap pawl doawknak a sosang tukih, ahleice in Yesakyo myone sungah mipi ralkap pawl an thazang a cak lawlaw.
AA In Ralhrang Bawi An Kai – A tufang Rakhine ramkulh sungah AA le ralhrang pawl khatlam khatlam in an kai aw ciamco ih, AA cun June 23 ah Rakhine ramkulh Sittwe khua ih um ralhrang bawi pakhat le a kuthnuai pakhat an kai.
A thok ahcun Myauk Oo lamah AA in ralhrang pawl an rak kai nan, tu cu Sittwe lam an thleng. Sittwe ih um ralhrnag bawi le a kuthnuai cu sun nazi 2 hrawngah AA pawlin an kai ih, ralhrang lamin an theih veten inn tin lutin AA pawl an hawl ciamco ve.
Sittwe ih um pakhat cun “Ralbawi pakhat le a kuthnuai pakhat an hlo ih, thuhla a darh veten khawpi sungah ralhrang pawl an khat cih. Khawpi luhnak an khar ih, inn tinah lutin an cek ciamco. Tutiang cu ralhrang lamin mipi kaihmi an neih le neih lo felfai in kan thei hrih lo a si,” tin a sim.
AA cun Rakhine ramkulh sungin Minpia, Mruak Oo, Yatihthaung, Buti thaung, Kyauk Phyu le Taung Kuk pawlin ralhrang an rak kai rero zo ih, cumi ruangah ralhrang cun khua khat le khua khat fehnak mawtaw zin siseh tipar zin khal June 24 in an khar.
June 20 , zanlam nazi 6 hrawngah Kyaukdaw ih beer in ralhrang palik 3 pawl cu AA in an rak kai zo ih, June 21 ah Mrauk Oo cek gate ih ralhrang 3 AA lamin an kai bet. AA cun June 16 ah Pukna Kyuan ih um ralhrang 2 an rak kai zo ih, June 22 khalah palik bawi le a kuthnuai pakhat cu Yanbe khua ah AA pawlin an rak kai zo.
Hivek ruangah ralhrang cun khuami tamzet an kai ve zo ih, kaihmi pawl an thlah hrih lo veve. Ralhrang pawl cun khuami an kaihmi pawl cu AA thawn pehtlaihawknak nei tin an puh.
AA thuphuangtu Khai Thu Khah cun Ralhrang tampi kaihmi kan nei ih, cumi lakah ralhrang bawi khal an tel. Hrekkhat ralhrang pawl cu kan kaih khal tul loin anmah ten kan hnenih ra beu khal tampi an um ve. Kan kaihmi ralhrang pawl cu ralhrang lamin khua mipi siseh AA an kaihmi hrekkhat pawl thawn thlengawk an duh asile thlengawk kan siang a si,” tin AA le media tonawknak an neihnak ah a rak rel zo.
Ralhrang in rampi thuneihnak an lak hnuah kap aw loin retzet um AA le ralhrang pawl cu thuneihnak cuh aw in Rakhine ramkulh sungah vei 5 hrawng an kap aw zo ih, Chin ramkulh paletwa peng sung khalah vei 2 an kap aw zo.
Cumi hnu ahcun tongkam in nasa ten an el aw ih, an hro aw ciamco. Tongkam ih an elawk hnuah an sungtel veve an kaihsakawk ciamco ih, AA le ralhrang karlak boruak a tha thei lo.
Pi 15 Inn Sungah Daw Suh An Khum – Daw Aung San Suh kyi cu amai inn ah kiltu nei in ret a si nawn lo ih, ralhrang hotu Min Aung Hlaing thusuak vekin Naypidaw thawnginn hmunsung ih inn pakhat sungah amah lawng khum a si thlang.
Ralhrang khalin Daw Suh Kyi thawnginn sungih an khum zo thu ca in an suah ih, mipi theihternak an nei zo. Ralhrang pawlin Daw Suh cu thawnginn sung inn pakhat ah amah lawng an khum nan, Inn cu pi 15 kau le sau lawng a si tin ralhrang thuthup a suak.
Daw Suh cu pi 15 inn ah amah lawng ret a si ih, umpi zohman a nei lo. Palik naunau 3 cun Daw Suh an kil ih, an umcilh. Palik nuneu 3 pawl cu Daw Suh ih hnenum siloin kiltu sawn an si.
Ralhrang thuthup cun “Daw Suh cu thawnginn sung inn pakhat ah a hranten ret a sinan,a umnak inn cu pi 15 sau le kau fang a si ti’n thawnginn sungih um pawl cun an rel. Amah kiltu palik naunau 3 an um ih, nitin a harhdamnak an ceksak ding. Ziangvek rawl an pe, ziangtin an buaipi tivek cipciar cu theih a silo,
“Daw Suh ih umnak inn cu a hranten an kulh betih, tlansuah lole runsuah theih lo dingin an fimkhur. Min Aung Hlaing in ziangtivek ciah in Daw Suh tuah a tum? timi cu felfai in kan thei lo nan, thawnginn sungin suah zalen maimai a tum nawn lo timi cu tulai ih kan thutheihmi larzet a si,” tin mipi media a simthei.
Daw Suh Suahmi A Lungawipi Ruangah Palik An Kai – Ayeyarwaddy ramthen Pathein khawpi ah palik pakhat cun Daw Suh Kyi suahni cu online in lungawipinak a nei ih, ralhrang pawlin amah an kai cih.
Daw Aung San Suh Kyi ih suahni cu June 19 ah a si ih, palik Thant Zin Oo cun Daw Suh suahni rori ah “Happy Birthday Ba, na nunkhua sau hramseh” tin lungawipinak a langter.
Palik Thant Zin Oo in Daw Suh suahni a lungawipimi cu ralhrang ramtang Han Nyein Oo in anmah ralhrang lamtang pawl thei dingin a pholang hngal ih, palik Thant Zin Oo khal June 20 ah ralhrang ralkap pawlin an kai cih.
Pathein ih um pakhat cun “Tutiang an thlah hrih lo. Palik Thant Zin Oo cu Pathein Palik sakhan ah an ret hrih ih, thu an sut rero, an hrem rero lai. A nupi fate pawl khal palik umnak hmunin an dawisuak zo. Daw Suh suahni a lungawipi ruangah kai an si,” tin a sim.
Leave a Reply