White House Hmaiah Myanmar Mipi Duhphorhnak An Nei

White House Hmaiah Myanmar Mipi Duhphorhnak An Nei – American Washington DC ih president Biden umnak White House hmaiah Myanmar mipi cun Myanmar ram buainak thawn pehparaw in duhphorhnak an nei.

White House hmai ahcun Myanmar mipi pawl an pungkhawm ih ralhrang pawl hrang vanzam zam theilonak hmun tuahsak dingin dilnak an nei.

A tufang ramsung buainak ah ralhrang cun tlunzuang raldonak nasaten an hmangih mipi ralkap hrangah khamawk a ol lo. Ralhrang in tlunzuang raldo an hman cun mipi ralkap pawl cu a hlankhan in hmunhim ah an relh cia ih, duh vekin an cangvai thei lo. Curuangah US ih um Myanmar mipi pawl cu daiten ummen thei lo ih Biden hnenah ralhrang pawl hrang vanzam zamtheinak cin tuahsak dingin an dil.

Myanmar mipi ih dilnak thawn pehparaw in US lam cun thusuah an nei hrih lo. Ralhrang cun mipi ralkap donak rori ah tlunzuang raldonak an hmang ciamco ih, duhduh in bomb an thla. Ramsung buainak menah raldonak vanzam tivek hman a silo ih ralhrang in raldonak vanzam an hmang asikhalle zamtheinak cin in tuahsak hram uh tin Karen KNU khalin UN hnenah dilnak an rak thehlut zo ve.

Thantlang Ah Ralhrang 20 An Thi ih 6 An Kai – Chin ramkulh Thantlang khawpi sungih ni 60 sung ralhrang thawn doawknak ah ralhrang 20 an thi ih, ralhrang 6 nungdam in kaih an si tlunah ralhrang Helicopter pahnih kan kap ngah ti’n CDF Thantlang cun February 26 zan ah thu an suah.

CDF Thantlang cun “Kannih CDF Thantlang le CNA cun Tilim Operation hmin in thantlang khawpi ah ni 60 sung ralhrang kan do. 2022, December 29 zan nazi 10 ihsin ralhrang do kan thok. January 1 ah ralhrang palik sungih inn 5 kan nawkkang. January 29 ah ralhrang thilri phur Helicopter pakhat kan kap ngah.

“2023 February 1 ah Thantlang khawpi sung CB Bank ih um ralhrang 6 kan kai ih, meithal zun 8 kan laksak. February 8 le 9 ah Thantlang khawpi sungih ralhrang pawl umnak kan kap ih meithal zun 40 kan laksak. FEbruary 26 ah ralhrang thilri phur Helicopter pakhat kan kap ngah bet.

“Ni 60 sung ralhrang thawn kan doawknak ah ralhrang 20 an thi ih, ralhrang 25 tlun hriamhma an ngah. Ni 60 sung ralhrang thawn kan doawknak ah CDF Thantlang sungtel 4 le CNA sungtel 2 cun chinram hrang an nunnak an hlan. Ni 60 sung ralhrang thawn kan doawknak ah ralhrang tlunzuang raldonak vei 95 an hmang. Ralhrang ralkap cun tlunzuang raldonak thawn in kap peh ringring ih doawknak a sosan peh ding ruangah mipi pawl vah sukso fimkhur dingin kan lo theihter duh a si,” ti’n thu an suah.

CDF Thantlang sungtel cun “February 25 lawng hmanah ralhrang in tlunzuang raldonak in bomb 15 tluk in thlak.Cumi sungah CDF sungin pakhat le CNA sungin pakhat , miraltha pahnih cun chinram hrang an nunnak an hlan. Thantlang khawpi sungih ralhrang palik sakhan kan lak tikah ralhrang pawl an tuarna tukih niti rori’n Thantlang khawpi bomb an thlak thlang a si,” tin a sim.

Ralhrang in Mindat Ah Mi 4 An Kap That – Chin ramkulh Mindat peng sungah ralhrang cun duhtawkin ralthuampi an kap ciamco ih CDF sungtel pakhat le mipi 3 an thi ti’n CDF Mindat cun mipi theihternak an nei.

CDf Mindat cun “FEbruary 25, zan nazi 7 hrawngah Mindat ih ralhrang hmunpi cun duhtawkin Mindat peng sungah ralthuampi an kap ciamco ih inn pakhat a kang tlunah mi 3 an thi ih, nauhak pahnih hriamhma an ngah. Lamzin sukso ih feh CDF Mindat sungtel pakhat khal ralhrang ih kahsuakmi ralthuampi in a ngah ih a nunnak a cem a si,” tin mipi theihternak an nei.

Ram le miphun hrang nunnak hlantu Salai Bily Aung Thang hi raltlan cazin la dingin fehsuak a si ih cumi ah ralhrang kahsuakmi ralthuampi a ngah ih a nunnak a cem. Ralhrang in ralthuam rinsan in rampi thuneihnak an lak hlanah Pastor rak tuan rero a si ih, ralhrang in rampi thuneihnak an lak tikah ralhrang uknak do dingin CDF Mindat sungih rak lut a si ve tin an sim.

CDF Kutah Palik Senhnih A Pe Aw – Chin ramkylh Hakha khawpi sungih palik hmunpi in palik senhnih pakhat cu ralhrang kuthnuai ah hna a tuan paih nawn lo ih CDF Hakha kutah a pe aw ti’n CDF Hakha cun mipi theihternak an nei.

CDF Hakha cun “February 25 ah Chin ramkulh Hakha khawpi sung palik hmunih palik senhnih pakhat cu ralthuam rinsan in thuneihnak latu ralhrang kuthnuai ah hna a tuan paih nawn lo ih dothlengnak ah ka tel ve ding ti’n G3 meithal zun 1 le cerek thawn CDF Hakha kutah CDM a tuah.

“Hi vekin kan hnenih pe aw palik cu lungawi soparten kan rak hmuak ih lungawinak ah ti’n tangka ting 30 kyats kan rak hlan hnuah hmunhim a thlen tiang tuanvo kan laksak. Ralhrang uknak hnuai ih um paih nawn lo zokhal CDM tuah dingin kan lo sawm ih sangka kannih CDF Hakha cun sangka kan lo on ringring tlunah humhim nan thlen tiang tuanvo kan la ding a si,” ti’n thu an suah.

Tayet Chuang myone ih palik pakhat khal ralhrang kuthnuai ah a um paih nawn lo ih bomb le cerek a tlanpi hnuah mipi ralkap kutah a pe aw ve.

Ukraine President In Crimea A Phut – Russia le Ukraine doawknak ah ram tampi cun remnak um dingin theitawk an suah rero nan tuini tiang kap aw lo dingin remawknak zianghman an nei thei lo ih, khatlam khatlam in phutmi an nei veve.

Ukraine president Zelensky cun remnak um ding cun Crimea in pe kirsal haiseh ti’n a phut. Crimea hi Ukraine ram sungih um a si ringring nan, 2014 kum ah Russia in Ukraine ramri an rak nor ih ram pahnih an doawk hnuah Russia cun Ukraine ram Crimea an rak laksak. Russia cun kum 9 sung rori Crimea an co zo ih an ram ret ah an ret zo. Cucu, tu ah Ukraine lamin an dilmi a si ih, Russia in pek an tum ve lo.

Tuitum Russia in Ukraine an domi khalah Russia cun Ukraine hmunram 4 an laksak bet zo. Russia cun Ukraine ram an laksakmi pawl cu Ukraine hnenah pek kirsal tumnak an neih lo. Cumen siloin Ukraine lamin remnak an duh asile ram kan lakmi pawl in cuh buai loin in pe lanta haiseh ti’n Russia lam cun an phut ve. Cutikah ram pahnih hi remawknak an nei thei lo dingin a lang.