Yangon Ah Ralhrang Bawi Nupa An Kap That

Mizoram Ah Chinmi Ritheihsi Phur An Kai – India ram Mizoram State , Chaiphai District Zokhawthar le Melbuk khua karlak ah Mizoram palik le Assam palik pawl cun rittheihsi phur Chinmi pakhat an kai ti’n mipi theihternak an nei.

Rittheihsi phur an kaihmi cu Sagaing ramthen Kalay peng Letpanchaung khua ih um in rel aw Lalzuimawia ( kum 25 ) a si ih, rittheihsi a phurhmi cu bingrang 38gram ih rit , a tufang India tangka in ting 19 man a si.

Mizoram State sung rittheihsi kaitu pawl cun July 11 in July 17 tiang lawngah Mizoram sungah Chinmi rittheihsi phur mi 9 rori an kai ti’n an thusuahmi ahcun an tarlang tel.

Raltlan buaipitu pakhat cun “Tucun Mizoram ih Chinmi raltlan pawl khal hnangamten an um thei nawn lo,ziangahtile Chinmi rittheihsi phur tamtuk kaih an si tikah raltlan pawl dinhmun a hnget nawn lo.

“Myanmar ram buainak ruangah Mizoram lam cun unau sinak suah in Chin raltlan pawl theitawk in tuamhlawm, in ngaihsak, ziangkim in tawlrel sak ih, nasaten raltlan an buaipi. Asinan, tu ahcun Chin ramkulh lamin Mizoram sungih rittheihsi phur an tam tuk ruangah Mizoram mipi lam an lungawi thei nawn lo.

“Hmailam ah Chin raltlan pawl ziang an bang vivo ding tikhal rel a har. Zangfahten Chin raltlan pawl dinhmun theihsak in Mizoram sungah rittheihsi phurh bansan uhsi. Cuti asilole Chin raltlan pawl dinhmun a se thluh thei ih, Mizoram ah Chimi pawl khal kan tleng nawn lo pang ding timi a phan um tuk.

“Tufang cu riahsiat thlakza rori a si, ziangahtile rittheihsi phur Chinmi an kai ti lawnglawng theih a si tikah um a nuam thei lo. Ziangtin rittheihsi phur pawl kan kham thei ding tikhal kan ruah tlang a tul. Tangtlang uhsi, kan dinhmdun humhim cio uhsi,” tin mipi sawmnak a nei.

Mizoram ih rittheihsi phur Chinmi an tam tuk ruangah Chin ralkap komkhawm khalin Chin ramkulh ihsin Mizoram lamah rittheihsi phur lo dingin Chin mipi theihternak an rak nei zo nan, tutiang cu rittheihsi phur pawlin mipi ralkap thusuak siseh, mipi dilnak khal an ngai poimawh lo ih, rittheihsi phur kaih peh rero an si.

Hakha Ih thleng Ralhrang Pawl Hriamhma Tuar An Tam – kalaymyo in Hakha lam feh ralhrang ralkap pawl cu July 17 ah Hakha an thleng fel zo ih, Hakha thleng ralhrang pawl lakah hriamhma ngah 18 tluk an um ih, zamrang zetin Hakha sizung ah an luhpi hngal.

Ralhrang hriamhma ngah 18 lakin pakhat cu sizung ah a thi zo ih, midang ralhrang hriamhma ngah lak khalah bese tuk tampi an um tin an sim. Ralhrang hriamhma ngah pawl cu Hakha an thlen veten Hakha sizungpi ah zamrangten luhpi cih hngal an si.

Falam le Hakha karlak ih doawknak ahcun mipi ralkap lamin miraltha pahnih an thi ve ih, ralhrang thizat hi rel phunphun um lakah mipi ralkap lam cun thu felfai an suah hrih lo. Mipi ralkap lam khalin hriamhma ngah an um hnuaihni nan, a zat ciah tarlang a si hrih lo.

Tamu Ah Pyu Saw Htee Pawlin Mi An Cek – Sagaing ramthen Tamu khawpi Sawbua vengah Pyu Saw Htee pawlin lamzin ih bike mawng lakin mipa pahnih phur aw pawl an kai ih, palik sakhan ah an bike an ret sak vivo tin Tamu ih um pawl cun an sim.

Tamu khawpi Sawbua le zidan vengah Pyu Saw Htee pawl cun lamzin sukso vak bike mawng lakin mipa pahnih phur aw pawl cu an rak dingter ih, an bike an laksak hnuah palik sakhan ah va tlen uh tin an sim vivo.

Tamu ih um pakhat cun “Sawbua veng cu Pyu Saw Htee pawl umnak a si ih, lamzin feh bike mawng lakin mipa pahnih phur aw pawl cu an kai ih, an bike an laksak hnuah palik sakhan ah tlen uh an ti vivo. Palik sakhan thlen tik ahcun bike pakhat ah thawng 30 in an tlenter.

“Bike an kaihmi pawl cu zinglam ah a neitu an phone salih, mi an tlenter. Palik sakhan thlen tikah veng uktu lethmat a tul an ti ih, veng uktu nei lo cu Pyu Saw Htee hotu lethmat dil a tul. Cumi hnuah palik sakhan in thawng 20 mi an dil ih, lethmet petu venglal lole Pyu Saw Htee hotu hnenah thawng 10 pek ve an tul.

“kannih Tamu ahcun bike pakhat ah mi pahnih nan phur aw lo ding timi thusuak a um lo nan,ralhrang le Pyu Saw Htee an tuantlang ih, hivek in anmai thuten an fehpi menmi a si,” tin a sim.

Yangon Ah Ralhrang Bawi An Kap That – Yangon ramthen Hlaing myone veng pahnihnak ih um ralhrang bawi Aung Naing Phyo le a nupi cu July 18 zinglam nazi 9 hrawngah mawtaw mawngih an suahnak ah mawtaw sungah an kap that.

A kiangih um pakhat cun “July 18, zinglam nazi 9 hrawngah a si ih, a thok ahcun dalan an kap that ah kan ruat. Neta ah ralhrang bawi nupa an kap that tin anmah ralhrang lam cun thu an suah ih, kannih khalin ralhrang bawi le a nupi kah that an si thu kan thei ve.

“Ralhrang bawi Aung Naing Phyo sawn cu Mawtaw sungah a thi cih ih, a nupi sawn cu a thaw mallai a umlai an ti lawk nan, a hnu reilo ah a thi ve. Tu ahcun ralhrang bawi nupa an thahnak hmun kiangah ralhrang ralkap le palik pawl an khat thluh zo,” tin a sim.

Yangon mipi ralkap cun “Kan sungtel pawl an him theinak dingah zamrangten mipi theihternak nei thei loin kan um. A thok ahcun kan cangvaih hlanah mipi ralrinnak kan pe hmaisa ciacia ringring nan, thlun duh lo an um ih, cupawl cun ralhrang hnenah thuhla an simthei ringring.

“Curuangah Hledan bazar ih dalan tuan pahnih khal July 4 ah kan rak thianfai zo ih, July 16 khalah ralhrang lamtang veng uktu Maung Latt kan ret tha bet. July 18, tuizing khalah ralhrang bawi pakhat Aung Naing Phyo kan ret tha bet. Hmailam khalah ralhrang kuthnuai ih hnatuan le dalan pawl cu kan ret tha vivo ding a si,” tin a sim.

Pyu Saw Htee 3 An Kap That – Tanintharyi ramthen Myeik myone Tungbiau khua ah inn tin thawng 4 dil vivotu Pyu Saw Htee hotu le a kuthnuai cu July 17 zanlam ah kah that an si.

Khuami pakhat cun “July 17, zan nazi 7 hrawngah a si ih, Pyu Saw Htee hotu le a kuthnuai pakhat cu lamzin ah meithal ih kah an si ih, sizung fehpi an sinan,zan nazi 9 hrawngah an pahnih in an thi. Khua ah ralthuam rinsan in inntin thawng 4 an khongih, mawtaw tiang an lei. Mawtaw sung an umlai ah meithal in vei 6 an kap ih, an kap ngah fuh tuk. A kaptu lam cu himdamten an tlansuak man a si,” tin a sim.

Tanintharyi ramthen Launglung myone Nginmaw khua khalah Pyu Saw Htee le tuitauh sungtel Kyaw Soe timi cu july 17, zan nazi 8:30 hrawngah an kap that. Kyaw Soe cu innsung a umlai rori ah ralthuamkai hrekhat in an luhcilh ih , a inn sungah an kap that.

Launglung ih um pakhat cun “Kyaw Soe cu ralhrang in ralthuam an pekmi a si ih, Pyu Saw Htee le tuitauh pawlkom ah a tel veve. A hnatuanbik cu CDM tuah pawl umnak zingzoi le ralhrang dokalhtu mino pawlih umnak zingzoi a si ih, cutin ralhrang hnenah thuhla a simthei sal theu. Hivek ruangah mipi ralkap lamin an ret tha lawlaw siko,” tin a sim.

Spain , Portugal le France Ah Ramkang A Luar – Spain,Portugal le France ram ih ramkang cu theitawkin an mit rero nan, ramkang ruangah a hlum tukih duh vekin ramkang an kit thei nawn lo tikah ramkang a luar sinsin.

France ram Gironde ramthen sungih ramkang ruangah mipum 14000 pawl cu hmunhim ah tthawn suah zo an si ih, mipum 1200 hrawngin theitawkin ramkang an mit rero phah. France, Portugal le Spain ih ramkang cu zarh khat tlun a si zo ih, ramkang ruangah a lum luar deuhdeuh. France ahcun ramkang ruangah 40 Degree tluk a hlum zo.

Spain ahcun ramkang ruangah thawhlum a luar tuk ve ih, 45.7C a theng zo. Spain ahcun ramkang ruangah a hlum tukih thawhlum thawn pehpar aw in mi 360 an thi zo. Portugal ahcun ramkang ruangah thawhlum a luar tuk ve ih, thawhlum ruangah july 7 in july 13 tiangah mi 239 an thi zo. Mithi tamsawn cu kum upa thawmhlum tuar harsa tipawl an si.

Ghana Ramah Natnak Thar – Ghana ramah Ebola natnak suaktertu Marburg nathrik ruangah mi pahnih an thi zo tin leitlun harhdamnak pawlkom WHO cun thu an suah.

Mithi pahnih cun July thla thok hrawngah Marburg natnak an rak ngah ih, an hrik cekfel a si tikah Marburg rori a si tin an nemhnget. Hivek ruangah mipum 100 hrawng cu a hranten an khum zo.

Ghana ram ih sibawi pakhat cun “Marburg nathrik thahnak sii a suak hrih lo ih, tuih dinhmun ahcun nathrik thahnak phunphun in kan tuamhlawm kual. Tuhrih tiangih kan hmuh dan ahcun tidai tampi in tikah nathrik a karh cak lo. Nathrik cu palap in minung ah kaisawngmi a si ih, minung khat le khat kaisawngawk vivo theih a si.

Marburg natnak cu Africa ram Guinea ah an hmu hmaisa bik ih, Ghana ram cu Marburng nathrik an hmuhnak ram pahnihnak a si. Tutiang ahcun Marburg nathrik hrang sii a um hrih lo ih, vaccine khal a um lo.