NLD Hmun 2 Ah An Then Aw – A tufang NLD sunglam buainak a sosang zetih hmun 2 in an then aw. Ramleng suak NLD pawl cun anmahten Central NLD cangvaitu ti’n NLD CWC timi an din ih, ramsung ih um Central NLD sungtel 4 cu Central NLD sinak in an dawisuak. Ramsung ih NLD pawl khalin ramleng ih tlansuak NLD pawlin zianghman ti thei an nei lo ih, NLD daan ah NLD party sungtel si ding cun ramsung umtu si a tul timi daan a um, curuangah kanmah sawn in Central NLD tuanvo neitu kan sisawn ti’n an sim ve.
Umdan cu ramleng um le ramsung um Central NLD sungtel pawl an buai ih, NLD neitu sinak an cuh aw. Ramleng ih um pawlin Central NLD cu anmai thu ih a um thu an sim ih, ramsung ih um pawl cun Daw Suh Kyi tel loin Central NLD thusuak a um thei lo an ti ve. Ramsung ah Central NLD sungtel 8 umlai in an rel aw ih, ramleng um pawlin Central NLD sinak in an dawi nan, an hna a thak lemlo.
Ramleng ih tlan NLD pawl hi an duh tuk ruangah ramleng tlan an silo ih dothlengnak ih an tel ruangah le NUG ,CRPH ih an luh ruangah an hrang ram sungih um a him lo ih, cumi ruangah ramleng ih tlan an si ve. Cutilai in ramsung ah NLD palai tamzet an um lai ih, annih pawl cu dothlengnak ih an tel lo tikah ralhrang thawn buainak an nei lo ih, tlan tul dinhmun ah an um ve lo.
Myanmar Politics thlirtu U Than Naing cun “Dothlengnak tuah caan ah NLD buainak khal ngai nuam zet pakhat a tling ve. Ramsung le ramleng tin an buai ih, NLD neitu sinak an cuh aw. Ramsung um pawlin NLD party a hloh ding an duh loin a langih, hrilawknak ah an tel lo asikhalle party nunter cu an duh hmel in a lang. Cucu, ramleng ih um pawlin an pompi lo ruangah an karkal ah buainak a suak. Ramleng ih um duhdan pawlin a feh asile mipi in nehnak kan co lo pang cun NLD party cu ralhrang hnuaiah a um nawn lo ding, a cemral ding.
“Ramsung duhdan pawlih a feh asile Party nunter an duh ih hrilawknak cu tel hngal an tum ruangah loin a lang. Neta rampi dinhmun zoh in party hrang khua an khang. Tu ih ruah ding tlakzet le mipi theih cak zetmi pakhat cu khawilamah Daw Suh a tang ding timi a si. Daw Suh a tongsuak thei caan ,lole thawnginn a suak tikah khawilam ah a tang ding timi hin mipi khal tampi an thinlung a danglam phah men ding. Taktak te ih rel ahcun Daw Suh tel loin NLD hi an duhduh in an tuah thei lo ih, dothlengnak tuah caan ah NLD rak buaipi ciamco loin daiten umkhawm men ding an si,” tin a hmuhdan a sim.
CRPh Chairman U Aung Kyi Ngyut cun “Tuih dothlengnak kan tuah timi hi mipi duhdan thawn a mil aw maw? mipi duhdan a si maw? mipi duhdan thawn mil in thuthennak kan tuahmi a si. NLD buainak lawng siloin dothlegnak thawn a mil aw sawn ding ti ih kan ruah ruangah thuthennak tuah kan si,” tin a sim.
Ramleng uh um pawlih dawisuakmi ramsung ih Central NLD sungtel Daw San Dar Min cun “Daw Suh kyi ih sihni thuhla siseh a eiin thuhla siseh tulsammi ziangkim kan buaipinak hi ralhrang tuanpi tinak a silo, lo theih lo ih tuah tulmi a si ruangah kan tuahmi sawn a si,” tin a sim ve.
Myanmar Politics thiam U Ye Tun khalin “NLD ih thuanthu zoh sehla 88 rampi buai hnu khalah midang in NLD thuhla ziangtluk an rel asikhalle Daw Aung San Suh Kyi ih thulawng in NLD a feh thotho. Ziagkim hi Daw Aung San Kyi thu in a feh. Curuagah ka rel duhmi cu Daw Suh tel loin zohman thu an suah thei lo ih a san khal a um lo,” tin a sim ve.
Ralhrang ralkap cun Daw Suh Kyi cu thubuai 19 hmangin kum 33 sung thawngtla dingin hremnak an pe zo ih, President Win Myint cu thubuai 8 hmangin kum 12 sung thawngtla dingin hremnak an pe zo. Cutikah Daw Suh Kyi suah hnu lawngah NLD thuhla a fel thei dingin a lang.
Ralhrang In 2025 Tiang Thuneihnak Fehpi An Tum – Ralhrang ralkap cun 2023 kum sungah rampi hrilawknak kan tuah ding ti’n an rak aupi rero nan, tu ahcun mipum siarnak felfai kan neih thei hrih lo ruangah 2024, October 1 in 15 sungah rampi huap mipi siarnak felfai kan nei dingih cumi hnu lawngah vote pe theitu ram mipi an fiang ding,Cuile hrilawknak tawlrel a si ding ti’n ralhrang vuanci Myintg Kyaing cun Global New Light of Myanmar a sim.
Ralhrang ralkap cun tui kum thokah rampi huap mipum siarnak an rak nei nan, duh vekin an siar thei lo ih hmun malte lawng mipum siarnak an nei thei. Mipum siarnak nei ralhrang palai pawl cu mipi ralkap pawlin theitawkin an hnaihnok ih kah thatmi khal an tam.
Ralhrang cun mipum siarnak an neih fel hnu lawngah rampi hrilawknak tuah an tum. KUm thok khalah Min Aung Hlaing cun rampi dinhmun a fel hrih lo, a buai tuk lai ih hrilawknak tuah thei kan si hrih lo tin a sim. Ralhrang in 2024 ah mipi siarnak an nei thei asile 2025 lam lawngah hrilawknak tuah an tumin a lang. 2024 ah mipi siarnak an nei thei cuang lo asile thuneihnak an fehpi vivo men khal a si thei.
NiWin hnenin Than Shwe a lal rei sawn ih, Min Aung Hlaing hi Than Shwe hnakin a lal rei sawn men ding titu khal tampi an um zo. Min Aung Hlaing hi a lungruh zetih a lal theinak ding lawnglawng ruattu le khawkhangtu a si. Mipi ralkap lamin ralkap an thianfai hlan sung cu Min Aung Hlaig in a lal theinak a rak ruat ve.
Myanmar ram dinhmun thlirtu pakhat cun “Myanmar ram buainak hi relcia theih pakhat hman a um lo. Kum tampi sung rei thei le Syria ram vek suak thei khal a si. Mipi ralkap pawl dungsip an tum lo ih, ralhrang pawl khal biakremawk an tum ve lo. Cutikah cimit ko doawk lo cun thu a fel thei lo ding tinak a siko. Cimit thluh ko ding an do aw thei pei maw timi cu mah le ruahnak a siko. Karlak ah Myanmar a farah deuhdeuh dingih mipi an harsa deuhdeuh ding. Ralhrang in duhtawkin tlunzuang raldonak an hmang rero nan, ramleng lam an hrol aw thei cuang lo. Cutikah Myanmar ram buainak hi relthiam harzet a si,” tin a sim.
Meithal Keng In Mi 8 Kap That – Germany ram Hamburg khawpi ih Jehovah Witness meeting Hall cu March 10 zan ah meithal keng pakhat in a luhcilh ih duhtawkin mi a kap tikah mi 8 an thi.
Palik lamin zingzoinak an neih tikah mithi 8 lakah meithal hmetpuaktu khal a tel tin an sim. Meithal hmet puaktu hi Jehovah Witness kawhhran member hlun a si ih,ziangruangah meithal a hmet puak timi a san theih a silo.
Thilthleng thawn pehparaw in Kawhhran ah lungawilonak a nei si ding titu an tam nan amah bik a thih ve tikah meithla a hmetpuaknak san bik theih a silo.
Leave a Reply