Ralhrang Le Pawlkom 5 In Remnak An Tuah – Ralhrang ralkap le tlangpar ralthuamkai pawlkom 5 pawl an tonawk thluh hnuah remawknak an tuah thu theih a si ih, tlangpar ralthuamkai pawlkom 5 cun ralhrang tuah tummi 2023 rampi hrilakwnak an pom thu ralhrang hnenah simthei in hminkhen an ngan.
Ralhrang tongtu le ralhrang thawn remawknak tuah tlangpar ralthuamkai pawlkom 5 pawl cu Rakhine ALP, Karen DKBA, Karen KNLA PC, Lahu LDU le Pa-ai PNLO pawl an si.
Tlangpar ralthuamkai pawlkom 5 lakin palai Zaw Mya Zaya cun “Ralhrang in party tin zalen zetin hrilawknak kan tuah ding tin in tiam, Curuangah kannih khalin Democracy ram pakhat ah party tinkim telnak hrilawknak cu tuah siseh tin kan pom ve. Culawng siloin ram buainak ah khatlam khatlam in biakawknak a um theinak ding khal theitawk kan suah vivo ding.
“Democracy kan duh ih, rampi daihnak , rampi thansohnak , a zalenmi hrilawk pawl tuah kan duh ruangah ralhrang thawn remawknak nei kan si. Cumi tlunah ralhrang lamin 2008 daan rampi lakin pukmah 10 pawl rem dingih in relpimi khal rem kan tisak a si,” tin a sim.
Ralhrang ralkap cun 2023, march thla ah rampi huap hrilawknak tuah rori an tum ih, NUG cozah cun ralhrang pawl hrilawknak tuah thei lo dingin nasaten cangvaih an tum thu an sim ve.
Sumo Mawtaw Let ah Mi 5 An Thi – Mizoram , Aizawl le Zokhawthar karlak ih Sumo mawtaw pakhat let ah mi 5 an thi tin buaipitu pawl cun an sim.
Sumo mawtaw cu Aizawl le Zokhawthar karlak tlan khualtlawng sukso phurtu a si ih, Aizawl in Zokhawthar lam an pan lai December 30 zinglam nazi 4:45 hrawngah Tuivar ti kiangah cangsual in a let. Sumo Mawtaw let ahcun a sungih to 5 an thi ih mi 3 hriamhma naa tuk an tuar. Hriamhma ngah lakah nauhak kum 2 le hrekmi a telih, a nu cu a thi tin an sim. Mithi 4 pawl cu Chinmi an si ih, pakhat cu Melbuk ih um a si.
Mithi pawl cu Lallunghnema ( Melbuk ), Thian Lian Ceu ( Cicai ), Partha ( Kawilam) , Mung Sian Dong ( Pakzang ),Kupa ( Sialtui ) pawl an si ih, hriamhma ngah pawl cu Mangpu ( Sialtui ), Philemona ( Zokhawthar ), Nauhak ( kawilam ) pawl an si. Hriamhma ngah lakah Philemona cu a besiat tuk ruangah Aizawl panpi hngal a si ih, Mangpu le nauhak cu Champhai sizung ah an atmit cih tin buaipitu pawl cun an sim. Mithi lakin Thian LIan Ceu hi sizung lamin Tial Lian Ceu tin an rak ngan sual tiah a sungte pawl cun an sim.
Mizoram, Lamzin pehtlaihnak Vuanci TJ Lalnuntluanga cu buainak hmun le Siizung ih um pawl a vehvai cih ih, buaipitu tlawmngai pawl hnenah sumpai bomnak a pe ih tlunsam pawl a buaipi tin an sim.
Buaipitu pakhat cun “Mawtaw hi Aizawl in Zokhawthar lamih feh an si. An feh laiah mawtaw mawngtu a sing (it that pang ) ih an cangsual in a lang. Khamsang zetin Zin hnuaipi ah an tlan liam ih, an mawtaw khal a siat soprop thluh. Curuangah mithi le hriam tuar pawl khal harsa zetin kan lasuak. Mi 5 an thi ih,mi 3 hriamhma an ngah. Hriamhma ngah pawl khal an bese tukih an dinhmun rel theih a silo,” tin a sim.
Ralhrang In Kum Thar Hrang Yangon An Thlah Zalen – Ralhrang ralkap cun Yangon ramthen sungah zalen zetin kum thar hmuah a si theinak dingah an ti ih, December 31 zan cu zan suahvah ngah lo timi daan a um lo tin mipi an theihter.
Ralhrang ralkap cun “Yangon pituhyin leng ah kum thar hmuahnak hrang Dount Down party ropi zetin tuah a si dingih, Concert khal a um ding. Curuangah December 31, zan nazi 12 ihsin 2023 January 1, zinglam nazi 4 triang zaan suahvah ngah lo timi daan kan bal sung a si,” tin mipi an theihter.
Yangon ih um mino pakhat cun “Kannih mipi cun ralhrang thusuahmi le tuah tummi tivek pawl kan ngaihsak lo. Thuneihnak an duh tuk ruangah ram hruaitu pawl an kai ih, mipi nunnak duhduh in an la rero men. Hivek dinhmun ah ralhrang tuahmi puai ah tel thei kan silo. Ralhrang in mipi inn duhtawkin an nawkkang ih raltlan tam tuk an um. Hivek laiah nuam kan rak tol thei lo.
“Mithat hmang ralhrang pawl cun an duhduh in daan an tuah ih,leitlun ramdang bumnak ah puai an tuah tum tikhal kan thei thluh. Ralhrang tuahmi puai ih tel mipi zokhal diknak duhtu an silo ih anmah ralhrang sungkua le ralhrang lamtang lawng an si ding. Rampi a aihram rero laiah kan nuam thei lo a si,” tin a sim.
Ralhrang in rampi thuneihnak an lak hnuah Yangon ahcun zan nazi 12 in zinglam nazi 4 karlak vahsuah an kham. Cucu, Myanmar ah hlunghlai zetin kumthar kan hmuah timi langter an duh tuk ruangah ramleng bumnak hrang kumthar hmuah zan cu an daan tuahmi khal an bal sung tin mipi cun an sim. Ram a buai hlan ahcun Yangon ah kumthar hmuahnak lunghlai zetin neih ringring a rak si.
Ralhrang 44 An Thi – December 29 ih Myamarrampi huap doawknak thu an suahmi ah ralhrang 40 an thi tin hminsin tuahtu pawl cun an tarlang.
Sagaing ramthen mungzua ah ralhrang Pyu Saw Htee 3 an kap that ih, Mandalay ramthen Tapikcin ih doawknak ah ralhrang 20 an thi. Tanintharyi ramthen Launglung ih doawknak ah ralhrang 2 an thi ih, Mandalay ramthen Mattaya ih doawknak ah PDF 2 an thi. Tanintharyi ramthen Palaw ih doawknak ah ralrhang 10 an thi ih, Sagaing ramthen Sagaing ih doawknak ah ralhrang 2 an thi. Tanintharyi ramthen Tayetchaung ih doawknak ah ralhrang 6 an thi tin hmun tinkim ih PDF pawl cun thu an suah.
PDF pahnih an thih thu ah Mattaya PDF cun “Ralhrang pawlin khua an luhcilh tikah khawsung mipi hrantang an um. Cucu, PDF pahnih in khua mipi hrangtang pawl run tumin khua sungah an va lutih ralhrang pawlin an rak that. Ralhrang pawl khua in an suah hnu lawngah PDF pahnih ih ruang an urkangmi kan hmu fang a si,” tin mipi theihternak an nei.
Mungzua PDF cun “Pyu Saw Htee pawl cu mipi mawtaw vek toin an suak timi kan theih ruangah lamzin in kan rak bawh cia. Ralring zetin Pyu Saw Htee pawl ih tomi mawtaw kan rak kap ih, a sungte ralhrang Pyu Saw Htee 3 an thi. Cekfelnak kan neih rero laiah Pyu Saw Htee tamzet an thleng betih kan himnak hrang dung kan sip a si,” tin mipi an theihter.
Ralhrang In Daw Suh Kyi Kum 33 Sung An Hrem – Ralhrang ralkap cun Daw Suh Kyi cu December 30 zingah thubuai 5 hmangin kum 7 sung thawngtla dingin hremnak an pe betih ,ralhrang in Daw Suh Kyi hremnak an pekmi zaten kum 33 a kim.
Tuitum ah ralhrang in Daw Suh Kyi hremnak an pekmi thubuai 5 cu NLD cozah san ih Helicopter thar leimi le Helicopter sanmi thuhla ah cozah sumpai na eiru tin thubuai an tuahsakmi a si ih, eiruk thubuai 5 hrang kum 7 sung thawngtla dingin hremnak an pe.
Daw Suh Kyi cun Court ah eiruknak zianghman a neih lo thu a sim rero ih, Myanmar rampi vice president Pu Henry Van Thio khalin Court ah Daw Suh Kyi a him ih, Daw Suh Kyi in Helicopter thuhla ah eiruknak zianghman a nei lo tin a sim ve. Asinan, ralhrang ralkap cun Daw Suh Kyi ih thusimmi siseh Vice President Henry Van Thio ih thusimmi khal an zum lo ih, Daw Suh Kyi cu eiruk buai 5 hmangin kum 7 sung thawngtla dingin hremnak an pe.
Ralhrang Court cun “Thubuai 5 sungin thubuai 4 pawl cu thubuai pakhat ah kum 3 sung thawngtla dingin hremnak pek ding a si ih, thubuai pakhat cu kum 4 sung thawngtla dingin hremnak pek dingmi a si. Asinan, thubuai 5 ah kum 7 sung thawngtla dingin hremnak kan pe ih, a kum kan tthumsak sawn a si,”tin an sim.
Ralhrang ralkap cun rampi thuneihnak an lak veten Daw Aung San Suh Kyi an rak kai hngal ih, thubuai 19 an tuahsak. Thubuai 14 pawl hmangin kum 26 sung thawngtla dingin hremnak an pe hmaisa ih ,neta ah thubuai 5 hmangin kum 7 sung thawngtla dingin hremnak an pekmi thawn ralhrang cun Daw Suh Kyi thubuai zaten thubuai 19 hrang kum 33 sung thawngtla dingin hremnak an pe.
Hitin ralhrang in Daw Suh Kyi thubuai an tuahsakmi pawlah hremnak an pe thluh zo ih, an tthumsal pei maw? hremnak pe cingin an thlah zalen pei maw? lole thubuai dang an tuahsak sal pei maw tivek cu felfai in theih a si hrih lo. Ralhrang in ram buai hnuih an kaihmi lakin ramdang pawl cu kum tamzet sung thawngtla dingin hremnak an pek hnu reilo ah an thlah zalen salmi an um ih, an ram ah an kuat cih thung.
Daw Aung San Suh Kyi khalin British miphun pasal ih a neih ruangah ralhrang pawl cun Myanmar rammi ah an pom nawn lo. Curuangah ,NLD cozah san khal Daw Suh Kyi in rampi president a tuan thei lo ih, rampi thuron dinhmun in a rak um.
Thuhla umdan vek asile Daw Suh Kyi in UK tlun a duh asile ralhrang pawl khalin Daw Suh Kyi thla zalen poi an tilo ih, UK ih Daw Suh Kyi tlun a tum lo ahcun ralhrang pawlin Daw Suh KYi thla zalen maimai an tum lo tin simtu an um.
Leave a Reply