A Ngaihzawngnu Umpi Thei lo Ruangah A Urkang – Sagaing ramthen Sagaing khawpi ah tlangval pakhat cun hmun kelkawm ah a ngaihzawngnu umpi a tumih a ngaihzawngnu in a rak duh lo ruangah tlakrawh in a lu a sutih,datsi a toih hnuah a urkang.
Vanthat malmak an ti bangin falanu cu lamzin ah a suak ih kiangkap mipi bomnak a dil. Kiangkap mipi pawl cun zamrangten an rak bawm ih, falanu cu a taksa zatek ah 70 tluk a kang nan, a thi lo ih, sizung ah an tuamhlawm rero lai.
Buaipitu pakhat cun “December 5, zan nazi 8 hrawngih thilthleng a si. Tlangval le fala cu phunsang tlawng kulhsung hmun kawmte ah an pahnih te lawngin an tongaw. Tlangval cun a falanu ihpi a tumih a falanu in a rak duh lo. A phunphun in a sawm, a thlem rero nan falanu in a duh lo ruangah a kiangih tlakrawh cun tlangval cun a falnu ih lu a sut.
“Falanu cu a tlu ih,cumi theh ah tlangval cun datsi in a toih bet hnuah fala cu a urkang. Cuveten tlangval cu a tlanhlo cih. Falanu cu lamzin ah a suak ih kiangkap mipi bomnak a dil. Mipi in a run ngah ih a nunnak cu a cem lo. Tu ah sizung ah an tuamhlawm rero lai,” tin a sim.
Ralhrang 3 CDF Kutah An Pe Aw – Chin ramkulh Hakha ih ralhrang 3 pawl cu CDF meithal zunkhat le cerek kengin CDF Senthang kuath an pe aw.
CDF Senthang cun “Ralhrang 3 pawl cu meithal zunkhat le cerek thawn kan hnenah an pe aw. Kan hneih pe aw ralhrang pawl cu kannih CDF Senthang in lungawi soparten kan rak cohlang ih lungawinak ah laksawng kan rak pe. Anmah CDM ralkap 3 khal hmunhim ah kan kuat cih ding a si,” tin thu an suah.
CDF Senthang tuanvo neitu cun “Tuitum kan hnenih pe aw ralhrang 3 pawl thawn kan hnenah ih pe aw ralhrang 15 an um zo. Kan hneih pe aw pawl cu ralhrang ralkap le palik an si. A thenkhat in ralthuam an kengih a then cu kut lawngih pe aw khal an si,” tin a sim.
Chinram Ah Bing Cing An Tam Deuhdeuh – Ralhrang in rampi thuneihnak an lak hnuah Chin ramkulh Tonzang peng sung ahcun bing cing an tam deuhdeuh tin an sim.
Khuami pawl cun “Ralhrang in rampi thuneihnak an lak hnu ahcun mipi kan harsa tukih tlanglo ih vainim cin men lawngin kan daih aw nawn lo, eiin kan khop lo. Cumi ruangah kan harsatnak a ziaum deuh pei tin bing cing kan si. Khuate lamah bing cing tlangpi kan si ih, inn khat ah eka hnih tal cu kan cing. Tuikum lawgah bing cinnak eka 1000 tluk a um.
“Thenkhat cu eka 3 tiang bing cing khal an um. Sumpai neih dan ih zir in kan cingih, sumpai nei tam pawl cun hmunram kaupi ah bing an cing tam. Tonzang peng sung ahcun 1980 hnu lamin bing an rak cing thok. Asinan, neta ahcun bing siloin thildang kan cing sawn nan, ralhrang in rampi thuneihnak an lak tikah kan sumlut a pit thluh ih, cumi ruangah bing cingsal kan si.
“A tufang Tonzang peng sungah bing cing khua 30 hrawng kan um. India lamih bing suang pawlin kan bing cinmi pawl cu Tonzang tiangah rain in lei. Tu ahcun bing hring cuai khat ah ting 20 a man a si ,” tin an sim.
NUG In PDF Hrem Tum – NUG cozah cun Tamu ih naunau pakhat thattu cu PDF pawl an siko nan, kan daan in a duh lo ruangah a teltu le mawhphurhtu pawl cu kan daan vekin hremnak pek an si ding tin ca an suah dumdo men.
NUG casuahmi cu hitin a si, “Sagaing ramthen Tamu khawpi ah PDF pawlin nunau pakhat an thahnak video a darh. An cangvaih dan cu kannih NUG ralkap daan thawn a mil aw lo. Kannih NUG cun thilthleng umdan cipicar kan zingzoi rero zo ih, PDF pawl an tel taktak maw tikhal zingzoi dingin thu kan pe zo.
“Zovek an si khalle an cangvaih dan cu NUG ralkap dan thawn an milawk lo ruangah hremnak pek ding an si. Mipi ralkap zokhal dothlengnak kan tuahmi ah NUG ih tuahmi ralkap daan thlun dingin theihter nan si. Kannih cu mipi humhimtu ding kan si bangin ralhrangt vekih kan cangvaih lo ding a thupi. Daan le dun neilo ralhrang pawlih cangvaih dan tawpter dingin dothlengnak tuah kan sinan, anmah ralhrang vekih kan cangvaih ve lo ding a thupi. Hivek cu neta ah thleng nawn lo dingin kan duh a si,” tin NUG cun ca an suah.
NUG ih casuahmi thawn pehparaw in mipi ruahdan a bang aw lo nasa. Mi tamsawn cun PDF tivek hrem an tul lo, hrem ding cun dalan thattu pohpoh hrem an tul pei cu? Hivekin PDF nan hrem asile PDF an suak thluh ding. Ralhrang le Pyu Saw Htee pawl ih tuahmi rapthlak tuktuk a tam, hrem theih an si cuang lo. Ralhrang lamtang le ralhrang pawl dotu kan si ih, PDF hrem an tul lo titu an tam.
A then cun neta ahcun PDF pawlin mi an thah lai hrimhrim Video la nawn lo sehla ,tuitum ah video latu sawn hrem sehla titu an um ve. A then cun ralhrang vekin cangvai ding kan si lo ih hremnak pek a tul ko titu khal an um ve.
Where Is Messi? Dungthlun Pawl An Tla Vivo – Tuikum 2022 FIFA World Cup ah thilmak danglam zet pakhat a rak um ih, cucu tongkam thlahdah ruangah World Cup in suak vivo pawl an si.
World Cup Group puai thokah Saudi Arabia cun 2-1 in Argentina an neh ih,nasaten Messi an auh. Khawiah Messi a um? Where is Messi? timi catar an kengih TV thusuhnak khalah khawiah Messi a um timi thusuhnak an tuah ciamco. An tongsan ih umzia cu Messi khal a um nan, Saudi Arabia in kan neh, zianghrangah Messi? khawitawk ah Messi nan ret tivek deuh thaw in thusuhnak an nei.
Saudi Arabia mipi pawl cun Messi an deuhsawh hnuah Polland hmaitlan Lewandowski khal an deuhsawh betih Where is Lewandowski? timi catar an kengih Messi cu an ret that zo thu vekin Messi hmin zawn an rin. World Cup group puai pawl lek theh a si tikah Group C in Argentina le Polland sawn in sungsuak an lut ih, Saudi Arabia cu group khal paltlang loin World Cup an suahsan. Group D puai netabik ah Tunisia cun 1-0 in France an neh ih, khawiah si Mbappe? tin Tunisia mipi cun France mithiam an salhsuah ve. Asinan, Group D khatlam puai ah Australia cun 1-0 in Denmark an rak neh ih, France le Australia in sungsuak an lut, Tunisia cu France neh cingin group an paltlang lo.
Group H puai ah S.Korea cun 2-1 in Portugal an neh ve ih, puai theh tikah S.Korea mipi pawl cun khawitawk ah C.Ronaldo a um? Where is C.Ronaldo? tin thuthanglatu pawl an sut ciamco. World Cup group puai pawl lek theh a si ih, S.Korea khal Portugal an neh thei ruangah sungsuak an lut phah nan, sungsuak puai ah Brazil cun 4-1 in S.Korea an rak sopih, S.Korea in World Cup an suahsan.
Sungsuak puai ah ASEA ih tel lakin cangtha zet le thlengsang dingih beiseimi Japan le Croatia an lek ih, puai cem hlanhlanah Japan mipi pawlin Where Is Modric? tin Croatia Captian an deuhsawh. Japan hi caksawn dingah ruah an siih, goal khal an thun hmaisa. Asinan, Croatia lamin an sit goal ve ih, 1-1 in caan a cem. Caan pekbet khalah an neh aw lo ih, penalty an sit. Penalty ah Croatia cun 3-1 in Japan an nehih, Japan pawl cun mithli thawn World Cup an suahsan ve.
Hivek hi a tufang World Cup ih larzet a si ih,pupa pawlin tongkam khatah sepi a man an timi khal tongkamsia siloin tongkam tha hman a thupit zia an rak relmi a si ve. Hmuhsuam nautatawknak tongkam in hlawhtlinnak a thlenpi loin a lang.
Leave a Reply