Ralhrang ralkap in Daw Suh Kyi an kaih laiah a upa cun Daw Suh Kyi ih inn a rak cuh ve ih, Court ah thubuai a thehlut. Daw Suh ih inn an cuhawkmi cu a pai’ ro cahmi a si.
Yangon ih Daw Suh Inn luahmi cu a upa Aung San Oo in lonsal a tumih Court ah thubuai a thehlut sal zo. Myanmar ram sungih thuthennak sangbik Supreme Court cun Aung San Oo ih heknak an rak cohlan sak ih June 27 ah thubuai an rel thoksal ding.
Innpi cu Daw Aung San Suu Kyi in a pai’ ro a comi a si ih, caan reipi a luahmi inn a si. 2001 ihsin U Aung San Oo cun a pai’ innpi co ve duh ah thubuai a rak thehlut zo ih, innpi man a beisei. Asinan thuthennak zung cun 2016 kum ah innpi cu Daw Aung San Suu Kyi ih luah ding le co ding a siko tin nehnak an rak pe.
Court cun Innhmun eka 2 ih kau, Daw Khin Kyi hmin langnak inn dot hnih le hmunram hrekkhat cu Daw Aung San Suu Kyi in a co dingih, inn dot khat umnak hmunram hrekkhat cu U Aung San Oo in a co ding tin thu an thensak.
Asinan,Court ih thusuak ah Aung San Oo a lungkim thei lo ih,a pai’ ro innpi in sumpai tampi lakluh a beisei. Cumi ruangah thubuai tawlrel rero a si ih, Court phunphun a rak feh rero zo.
Tu-ahcun Aung San Oo in a suahpi le farnu Daw Aung San Suu Kyi ih inn cu ralhrang uknak hnuaiah a cuhsal ih, Myanmar Court sangbik ah thubuai a thlen. Tu ahcun Myanmar Court sangbik in relsak dingin an rak cohlang zo.
U Aung San Oo hi General Aung San le Daw Khin Kyi ih fa upabik a si ih tu-ah kum 79 a hmang rero lai. US ram ih um le US mi sinak nei zo khal asinan, a farnu inn cuh in a buai rero hrih. Ralhrang Court sangbik in ziangtin thu a then ding timi cu mipi hngahmi a si.
Leave a Reply