Ralhrang ralkap in an kaihmi sungah Daw Aung San Suh Kyi ih inn pakhat cu ramdang ih um a upa Aung San Oo in a rak cuh buai ih, ralhrang Court lamin an cohlan sak bangin Court ah an rel thok zo.
Yangon ramthen Bahan myone ih Daw Suh Kyi ih inn cu a upa Aung San Oo in daan hmangin a cuhmi a si ih, June 27,2022 in ralhrang Court ah an rel thok. Aung San Oo ih sihni rel dan vek asile thubuai cu thla 3 sungah relfel ding a si ti’n a sim.
American ih um Aung San Oo cun 2000 lam ihsin Bahan ih Daw Suh Kyi ih inn a rak cuh zo ih, 2016 kum ah Court cun inn le hmuan then aw dingin lai a rak rel sak. Tu ahcun Aung San Oo in inn le hmuan zuarin aman zem aw dingin Court ah thubuai a thehlut sal.
Innpi cu 1947 kum ih Bochuk Aung San a thih hnuah a nupi Daw Khin Kyi ih ro comi a si ih, 1988 kum, December thla ih Daw Khin Kyi a thih ikah Daw Aung San Suh Kyi cu innpi luahtu a si. Innpi ahcun Daw Aung San Suh Kyi in NLD party a rak din ih, 1990 kum rampi hrilawknak ah nehnak an rak co.
Cumi hnuah Daw Suh Kyi cu ralhrang pawlin an kai ih, innpi sungah kum 15 zik kiltu nei in an rak ret. Daw Suh Kyi thla zalen a si tikah ralbawi Than Shwe sanlai ah a innpi sangka cun ram thuhla relnak a rei ih, a innpi cu leitlun ah theih a hlawh deuhdeuh. US president hlun Obama le a kuthnuai pawl khal Yangon Bahan myone ih Daw Suh Kyi inn ahcun an rak feh ve.
Bahan myone ih Daw Suh Kyi ih inn cu US dollar 90 Million a man tin a cuhtu lam Aung San Oo sihni cun a rel ih, cuzat a man taktak pei maw ti cu felfai in theih a silo.
Tu ah Daw Suh Kyi cu thawnginn sungih an khum zo ruangah zoin Daw Suh Kyi ih inn thubuai a tawlrelpi tikhal theih a si hrih lo ih, Media lam khalin Daw Suh Kyi ih inn thubuai ah Daw Suh Kyi lamih dingtu sihni biak ding an thei hrih lo.
Mi tamsawn cun a phen ah ralhrang pawl an um ko ding, Daw Suh Kyi ih upa an forh ih, hivek in thubuai a tuahsalmi siko ding, curuangah Court cun Daw Suh Kyi ih inn cu a upa duhdan bangin zuar siannak a pe dingih, Daw Suh Kyi cu inn nei loin tuah an tum siko ding, Lole a pai’ ro sunralter an tum siko ding tin ralhrang an rak puh ve.
Myanmar danthiam pakhat cun “Zokhal ramdangmi sinak nei zotu in Myanmar ih a neihsiah thuhla ah thu a nei nawn lo ih, thubuai a tuah thei lo timi daan a um. Asinan, tu ahcun American ih um in Yangon ih a naunu inn cu daan vekin a cuh thei tikah a mak tuk lawlaw. Thuthup a um timi a fiang tuk.
“A hramthok ah ralhrang pawl an si ih, thubuai cohlangtu Court khal ralhrang pawl tih ah rak cohlang an si. Hivek a si ahcun anmah ralhrang pawl ih duhdan vekin lai an rel dingih, Daw Suh Kyi tisiat vivo an tumnak hlawhtlin an tum ding. Myanmar rampi daan in mulemal khal a nei nawn lo a si,” tin a sim ve.
Ralhrang In PDF Pawl An Lem Nonsal – Ralhrang ralkap cun dothlengnak ralthuamkai PDF pawl cu buai rero loin an hnenah pe aw dingin an lem rero sal ih,lamzin phunphun an dap.
Ralhrang ralkap cun JUne 12 in June 28 tiang ramsung thuneihnak an neihmi ah PDF pawl lemnak ca an suah non rero ih, June 15 ihsin khawpi sungah capi in an tar vivo thok. Khawpi hrekkha ahcun ralhrang pawl mawtaw in an vak ih, PDF pawl pe aw dingin an au.
Mandalay ih um pakhat cun “2008 daan vekin rampi hrilawknak kan tuah ding. Cumi ahcun a nehtu hnenah thuneihnak kan pesal ding. Curuangah, PDF pawl ralthuam ret uhla kan hnenah pe aw uh tin lamzin tluanah an au vivo. Cuvek ih autu pawl cu dung le hmai in ralhrang mawtaw cun an thlun ih an kil thepthep a si,” tin a sim.
Sagaing PDF hotu cun “Tuhrih tiang thuhla kan theih dan vek asile ralhrang in hivek in PDF pawl sawmnak an neih ruangah pe aw an um hrih lo. Anmah ralhrang lam sawn in kan hnenih pe aw, CDM tuah tampi an um sawn. Ralthuam retin ralhrang hnenah pekawk tumnak kan nei lo lawlaw. Kannih duhmi cu ralhrang uknak hloral ko do ih, Federal Democracy uknak din ding a si,” tin a sim.
Kalay PDF hotu pakhat cun “Ka zum dan ahcun rampi huapih ralhrang do a si tikah ralhrang pawl an thazang a cau tuk thlangin ka hmu. Duh vekin rampi huap an uk thei dah lo ding timi an theih ruangah tuvek in PDF pawl an lem rero siko tin kan ruat. Ziangtlukin in sawm hai khal sehla kannih cu kan tumnak lamzin kan feh vivo ding a si,” ti’n a sim.
Ralhrang thuphuangtu Zaw Min Tun cun “Tlangpar ralthuamkai pawl le a tufang ih dinsuahmi CRPH, NUG le PDF pawl ih tumtahmi a bangaw lo. Tlangpar ralthuamkai pawl cun ziangtik hmanah an hmunram sungih um tlawnginn , sizung le cozah inn tivek an siat dah lo. A um pang asikhalle rel ding a vang zet ding.
“CRPH, NUG le PDF pawl ih tumtahmi cu ziang a si tikhal rel a theih lo. Tlawng saya/mah pawl an that ih, phungki tiang an hlah lo. Sizung le sikhan khal an siatsuah. Curuangah PDF pawl be uh, thurelpi uh in ti rerotu pawl kha anmah PDF pawl ih tuahmi zoh hmaisa uh, nan hmu lo mawsi tin thusuhnak ka tuah duh.
“2020, November thla ih rampi hrilawk lai ihsin dik lo a um, relrem uhsi tin kan rak ti rero ih, ramleng tiang kan theihter. A tul asile hlutdaw ah kan rel mai ding titiang in kan sim hai ko. Asinan, an duh lo ih, ralthuamkai in kanmah in dokalh a si,” tin a sim.
NUG cozah in vuanci pakhat Naing Htu Aung cun “Ralhrang ralkap in ralthuamkai a phunphun thleidang zetin an zohnak a rei tuk zo. Tu khalah dothlengnak ralkap pawl lakah khat le khat rem aw lo dingin thu tampi an suah. Ralhrang lamin Politics ihsin suah an tum lo ih, thuneihnak lak vivo an tum asile ziangtik hmanah Myanmar ram a dai dah nawn lo ding a si,” tin a sim.
Ralhrang ralkap cun 2023 ah rampi hrilawknak tuah an tum ih, cumi ahcun anmah lal thei dan ding khua an khang cia zo tin Politics thiam pawl cun an sim.
Ralhrang Court Pawl Bomb An Puah Thok – Justice lady Mission cun dik lo zetin Daw Suh Kyi thubuai tuahsak a si ruangah ralhrang Court pawl bomb an puah thok thu an aiawh in Yangon mipi ralkap cun thu an suah.
June 27 ahcun S.Okalapah, Mayankung le Dagon myone pawl ih thuthennak innpi sungah bomb an deng lut ih, hmailam khalah ralhrang Court pawlah bomb an puah vivo ding thu mipi an theihter.
Justice laday Mission cun ralhrang Court ah bomb an puah vivo ding nan, mipi tuar ding zawngin cangvaih an tum lo thu an thusuah ahcun an tarlang tel. Tuhrih ahcun Yangon ramthen sungih thuthennak innpi pawl ah bomb puah vivo an tum.
Hivek in thuthennak innpi ih bomb puah vivo an tumnak san cu dik lo zetin mipi an kaih ruangah, dik lo zetin thuthennak an tuah ruangah le dik lo zetin Daw Suh Kyi hremnak an pek rero ruangah a si tin an tarlang.
Ralhrang ralkap cun rampi thuneihnak an lak hnuah amah dokalhtu ti ih an ruahmi mino pawl le hruaitu pawl an kai vivo ih, thubuai an tuahsak hnuah hremnak an pe rero. Hremnak an pekmi lakah damsung thawngtla dingin le thih dan tiang an pekmi a um. Hivek ruangah leitlun danthiam pawl khalin ralhrang an mawhthluk tuk nan, ralhran pawl cu midang tongkam ngai thupi lamin an thuneihnak sawn an feh rero.
Ralhrang In Mipi Ralkap An Dinmi Pitlin An Tum – Ralhrang ralkap hotu Min Aung Hlaing cun kan dung thla lamin a kuthnuai pawl cu ramsung hmun tinkim ah mipi ralkap din dingin an rak fial zo ih, tu ahcun June thlasung rori ah rampi huapin mipi ralkap din fel dingin a theihter.
Ralhrang sungtel pakhat cun “Tui thlasung rori ah mipi ralkap dinfel dingin theihter kan si. Mipi ralkap timi cu khua tinah khua kilhimtu ralkap tinak a si ih, a hlanih Pituhsit vek deuh cu a si. Asinan, tuitum ahcun mipi ralkap tizawngin din ding a si.
‘Tuitum ih mipi ralkap ahcun palik, ralkap in cawl zo, mitat le ralkap uknak duhtu pawl an tel ding. Yangon ramthen sung ahcun June thlasung rori ah dinfel dingin theihter thluh an si zo. Fiang zetin kan rel ding asile veng sung le khua sungah PDF pawl an luh theilonak dingah khamtu ding pawlkom pakhat cu an siko,” tin a sim.
Min Aung Hlaing cun 2022 , March 3 ah rampi huap mipi kilhimtu ding din dingin thu a rak suah ih, a thubuak vekin ralhrang pawl cun rampi huapin mipi kilhimtu ding an din thei lo. Cumi ruangah June thlasung rori ah dinfel dingin a theihter nonsal hai.
Ralhrang in rampi thuneihnak an lak hnuah Pyu Saw Htee le tuitauh timi ralhrang dinpitu pawlkom an um ih, cupawl cu dunglamin ralhrang in an somdawlmi an si. Himi tlunah ralhrang cun mipi vantlang theih in hmun hrekkhat ah pituhsit an nei lai ih, tu ahcun mipi ralkap tizawng in amah dinpitu ding pawlkom an din tummi cu a si.
Ralhrang 4 An That – Makui ramthen Myiang myone Netat khua kiangah Myaing PDF cun ralhrang ralkap pawl bomb an puah ih ,ralhrang 4 an thi tin thu an suah.
June 27, zanlam nazi 5 hrawngah ralhrang mipum 30 hrawng umkhawm cu PDF pawlin bomb an puahmi a si ih, PDF pawl cu himdam ten sung an sip tin an tarlang.
Myaing PDF thilri kuattu cun “Ralhrang pawl bomb kan puah fuh tikah zamrangten phungki tlawngah an lut. Phungki tlawngin an suak maimai nawn lo ih, ret tuk an relh. Neta ah ralhrang 4 an thi timi cu mit hmutu mipi pawl hnenin kan thei ih, ralhrang hriamhma ngah an tam tin mipi cun an sim.
“Ziangahtile ralhrang hriamhma ngah le thi pawl cu phungki tlawng sungah an luhpi ih, mipi hrekkhat rak hmuu an um a si,” tin a sim.
Veng Uktu Inn An Nawkkang – Mandalay ramthen Pyikyi takhon veng uktu inn cu June 28, zinglam nazi 1:30 hrawngah meisa palang in an dengih , inn a kangral thluh.
Mandalay mitat hotu cun “Meisa palang in innpi an dengih, inntek lamin in phone cih. Kannih khal zamrangten kan feh nan, kan va thlen cun inn a rak kangral thluh zo. Anmai inn lawng a kangih, inndang a kangkai lo. Inntek veng uktu cu a thinheng tuk ih, Court ah thubuai a thehlut.
“Kiangkap venghnen pawl rel dan vek asile bike in mi pakhat inn hmaiah a dingih, meisa palang in veng uktu inn cu a deng. Cumi in innkang suak cu a si. Innkang ah bike pahnih le thilri dang khal an kangral thluh a si,” tin a sim.
Russia In Ukraine Bazarpi An Kapsiat – Russia cun Central Ukraine Krenmenchuk khawpi ih Shooping Mall picang tuk pakhat cu June 27 zan ah bomb zamthei in an kapsuak ih , mi 16 an thi.
Ukraine president Zalenskyi cun “Bazar innpi sung ahcun mipum thawng 10 hrawng bazar in an um. Culaifang ah Russia lamin bomb in an kap ih, mi 16 an thi zo. Mi 59 hrawng hriamhma ngah an um ih, hrekkhat cu an bese tuk. Innpi cu a kangse thluh a si,” tin a sim.
Bazar innpi kang cu thianfainak an nei rero lai ih, mithi cazin danglam thei ringring a si thu Ukraine lam cun an sim.
Russia in an duhduhnak hmun Ukraine khawpi siseh mipi innpi tiang an kap nan, leitlun ramdang le pawlkom pawl cu Ukraine bawm in cangvai an um cuang lo. Leitlun ramdang le pawlkom cun Ukraine cu ralthuam le sumpai pe in an bawm rero nan, Russia lam dung an sip duh lo tikah Ukraine cun an tuar tuk thlang.
June 26 khalah Russia cun Ukraine khawpi bik Kyiv cu bomb zamthei Missile 4 in an rak kap zo ih, Kyiv khawpi kaingkap ah bomb zamthei 10 hrawng a tla. Cumi hnuah Russia in Central Ukraine Krenmenchuk khawpi ih Shooping Mall an kapsiat bet.
Tui dinhmun Ukraine le Russia doawknak hmunpi bik cu Ukraine nisuahnak lam Russia ramri Donbas ramthen ah a si ih, doawknak a sosang tuk tin Ukraine president Zalensky cun leitlun a simthei.
Leave a Reply