Rakhine ramkulh Kyaukdaw khua , myomah palik sakhan ih palik 3 pawl cu June 20 zan nazi 6 hrawngah Rakhine ralkap AA pawlin an kai ih an hruai tin mit hmutu pawl cun an sim.
Myomah palik zung kot ahcun palik bawi, senthum le palik dang pakhat pawl beer an in ih, nuam aw in caan an hmang. Beer an rit hnuah AA ralkap pawlin palik 3 an kai tin an sim.
Mit hmutu pakhat cun “Palik pawl beer an in rero laiah AA pawlin an kai. Palik bawi, senthum le palik dang pakhat tin an zaten palik 3 an si. Myomah palik sakhan kot Beer dawr ih beer an in rero lai kaih an si,” tin Rakhine thuthang a simthei.
Kan dung khalah AA cun Kyauhdaw ih ralhrang ralkap pahnih an rak kai zo ih, cumi ruangah Ralhrang ralkap pawl cun Kyaukdaw khawlal an kai ve ih, thuhla an sut ciamco phah. Myauk Oo khalah AA in ralhrang 2 an rak kai zo ih, Pukna Kyuan khalah AA in ralhrang pakhat an kai.
Hivek ruangah ralhrang cun khuami tamzet an kai ve ih, thusuhnak an nei ciamco. A tufang Rakhine ramkulh sung ahcun AA lamin nasaten ralhrang pawl an kai ih, ralhrang pawl khalin AA le mipi pawl an kai ciamco ve. Hivek a si tikah Rakhine ramkulh sung khalah doawknak picang suak thei ringring a si tin mipi thinphang an tam.
Pyu Saw Htee 6 An Kap That – Mandalay ramthen Myingyan myone ကွေ့ကြီး khua ah fawm hruh PDF pawl hmuaktu Pyu Saw Htee 6 pawl kah that an si tin MRA cun thu an suah.
June 16, zan nazi 10 hrawngah MRA pawl cu ကွေ့ကြီး khua ih Pyu Saw Htee hotu Ung Myint that dingin an feh. Khua pawn an thlen zawngah khua rak kiltu Pyu Saw Htee pawl cun Fawm hruh PDF pawl an rak kap. Cutin , khat le khat an kap aw cih.
Tawkfang cun PDF pawlin Pyu Saw Htee pawl hnenah “Nan khua ah kan ra ih, hivekin maw in mikhual ding tin an hei auh. Cutikah Pyu Saw Htee pawl cun fawm hruh PDF pawl cu ralhrang ah an ruat ih, nanmah ralbawi pawl nan si timi kan theih lo ruangah hokhaw, in ngaithiam uh.
“Hmaiah khawlal suak seh tin an au betih, Pyu Saw Htee hotu Ung Myint, a kuthnuai Aung Lwin, le midang Pyu saw Htee 3 pawl cu ban phar in an suak. Pyu Saw Htee pawl cun duty kan si ih, tipalh thu ah kan lo kap pang tin ngaithiam an dil phah.
Pyu Saw Htee banphar pawl in fawm hruh PDF lam an naih vivo tikah PDF pawlin an rak kap tupto cih ih, relh lai Pyu Saw Htee pawl an suak bet ciamco. Cutikah PDF lam cun bomb an deng hngal ih, Pyu Saw Htee dang pawl cu an tlan thluh tin MRA cun mipi an simthei.
Doawknak ahcun Pyu Saw Htee hotu Ung Myint, Aung Lwin le khawlal tein mi 6 an thi. Hivek ruangah khuami pawl cu ralhrang pawl rat ding tih ah an tlan ih, Pyu Saw Htee thi pawl cu khuami hrekkhat in an vuiliam cih hngal tin an sim.
Myanmar Mipi Hngilh Lo Dingin Pope Francis A Ausuak – RC biaknak hotu Pope Francis cun Myanmar mipi pawl theihhngilh lo dingin leitlun simtheihnak a nei ih, bawmtu nei lo an si tin a sim.
Ralhrang in rampi thuneihnak an lak hnuah Myanmar mipi le pawlkom cun leitlun ramdang le pawlkom hnenah bomnak phunphun an dil nan, ramsung buainak a si tin Myanmar buainak ah zohman an tel duh lo. Hivek a si tikah Myanmar ram buainak cu leitlun theih a hlawh lo deuhdeuh. Cumi ruangah Pope Francis a ausuak.
Pope Francis cun “Myanmar buainak ruangah bawmtu nei lo Myanmar mipi pawl ih aihram thawm cu kei cun ka thei ringring. Myanmar mipi pawl cu ralkap ruangah inn suahsan tampi an um ih, an harsa ngaingai. Curuangah, leitlun in Myanmar mipi pawl theihhngilh men ding kan silo. Zangfah um tuk an si ih, bomnak an tul tuk rori a si,” tin leitlun sawmnak a nei.
UKraine President In A Ralkap Pawl A Veh – Russia in thla 4 zik Ukraine an do hnuah ram pahnih remawknak an nei thei hrih lo ih, an do aw peh rero lai.
A tufang cu Ukraine nisuahnak lamah nasa ten do aw an si ih, Russia cun Ukraine nisuahnak lam lakfel lawlaw an tum. Cucu, Ukraine lamin an duh ve lo ih, theitawk in Russia ralkap pawl an do rero. Tuih dinhmun ih an doawknak hmunpi Ukraine nisuahnak lamah Ukraine president Zalensky khal a feh ve ih, a ralkap pawl a veh.
Ukraine president Zalensky cun “Ukraine ralkap pawl nannih cu miphun le ram hrang miraltha nan si ih, zokhal a lakin nan ttuan lo. Doawknak ahhin nehtu kan si rori ding a si,” tin Ukraine ralkap pawl a hnem.
Russia cun Ukraine nisuahnak lam lalfel an tumih, Ukraine cun an ram an rak humhim rero ve. Doawknak a rei zo ih, khatlam khatlam in an tuar. Asinan, zokhal dungsip le pekawk an tum lo ih, an do vivo hrih dingin a lang.
Leave a Reply