AA In Ralhrang 37 An That

AA In Ralhrang 37 An That – Rakhine ralkap AA cun ralhrang 37 an thah thu mipi theihternak an nei. AA le ralhrang cu Rakhine ramkulh myone tinkim le Chin ramkulh Paletwa peng sungah do aw an si.

Rakhine ramkulh Tan Twin myone le Taung Kuk lamzin karlak ih feh ralhrang ralkap pawl cu November 1 zingah AA pawlin bomb an rak puah ih, ralhrang 13 an thi tin an sim.

Ralhrang mipum 30 hrawng an si ih, Taung Kuk in an suak. Tan Twin le Yangon lamzin an feh zawngah AA lamin bomb an rak puah. Cumi ahcun ralhrang 13 an thi tin an sim.

Khuami pakhat cun “Ralhrang mipum 30 hrawng ke in an feh ih lamzin tluanih khua pawl an luhcilh vivo phah. Khuami thenkhat kaihmi an nei ih, kiangkap khua pawl khal khua ah um ngam loin an tlan thluh. Lamzin ih feh ralhrang pawl bomb puah an si tikah ralhrang 13 an thi tin kan thei. Ralhrang pawlin ralthuampi a kah ciamco ruangah khuami pawl cu khua ah um ngam loin tlan kan si,” tin a sim.

October 26 in October 31 tiang ni 6 sung doawknak khalah ralhrang 24 an thi tin AA cun November 2 zan ah thu an suah.

AA cun “October 26, zanlam nazi 4:10 hrawngah Rathi Tuang myone Chikhali khu kiangah ralhrang thawn kan kap aw ih, ralhrang 4 an thih tlunah meithal zunhnih le ralthuam dang kan laksak. October 27 ,zanlam nazi 3:45 hrawngah Buti Tuang Tuangzua khua kiangah nazi 3 sung ralhrang thawn kan kap aw ih, ralhrang 11 an thih tlunah ralhrang 15 hriamhma an ngah ih, kannih AA lam khal thi kan um.

“October 28 ahcun ralhrang in Chin ramkulh Paletwa myone, Kyawdaw myone le Buti taung myone pawlah raldonak vanzam an hmang. October 29,zinglam nazi 9:13 hrawngah Kyawdaw myone ZUktar khua kiagah ralhrang thawn kan kap aw ih, ralhrang 5 an thi. October 29, zanlam nazi 2:10 hrawngah Paletwa myone Meik Wah khua kiangah ralhrang thawn kan kap aw ih, ralrhang pakhat a thi. October 30 ahcun ralhrang pawlin ralthuampi thawrn in kap ciamco.

“October 31 ah ralhrang pawl cun Paletwa peng sung cu ralthuampi in an kap peh ih, Rakhine ramkulh Maungtaw lamah ralhrang thawn kan kap aw. Sun nazi 2 in zanlam nazi 4 tiang ralhrang thawn kan do aw ih, ralhrang 3 an thi tlunah ralhrang hriamhma ngah 10 hrawng an um. Doawknak ahcun ralhrang hnenin ralthuam laksakmi khal kan nei. Ralhrang in duhduh ih ralthuampi an kah ruangah October thla sungah mipi 6 an thih phah a si,” tin AA cun thu an suah.

November 2 khalah AA le ralhrang pawl Rakhine le Paletwa ah an do aw peh tin AA thuphuangtu Khai Thukkhah cun a sim.

AA thuphuangtu Khai Thukkhah cun “November 2 zingah ralhrang mawtaw bomb kan puah betih ralhrang thi an um nan, a zat in simthei hrih lo. Paletwa khalah ralhrang pawl thawn kan do aw peh. Maungtaw myone ih ralhrang mawtaw bomb kan puahmi ahcun ralhrang 3 an thi tin khuami pawl cun an sim nan,kan ralkap pawlih thu kan ngaicang hrih a si,” tin a sim.

Min Aung Hlaing Ih Inn Kiltu An Kap – Ralhrang ralkap hotu Min Aung HLaing ih Yangon inn kiltu lamzin ih ralhrang gate cu October 31, zan nazi 11:35 hrawngah an kap tin November 2 zingah ralhrang sunglam thu a suak.

Thuhla theitu cun “Tuitum ih ralhrang gate an kahmi cu ralhrang hotu Min Aung HLaing le hotu sang Soe Win tei inn kiltu lamzin ih ralhrang gate a si. Min Aung HLaing inn fehnak dingah gate pahnih a um ih, gate pakhat sawn ih um ralhrang pawl an kap. Cumi ruangah November 1, zan nazi 8 hrawng ihsin Min Aung HLaing ih inn fehnak Inhlia lamzin cu khar dingin thu an suah. Thubuah dan vek asile hotu lam Yangon an rat ahcun zokhal feh an siang nawn lo men ding,” tin a sim.

Min Aung HLaing ih inn fehnak lamzin tluan kiltu ralhrang gate kah a si thu ah ralhrang thi an um maw timi cu fiah theih a silo. A kaptu pawl khal mawtaw in an tlan cih ih ralhrang pawlin an kai ngah lo tin ralhrang sunglam thu a suak.

Thailand Ah Thupte Luh A Har Deuhdeuh – Ralhrang in rampi thuneihnak an lak hnuah Myanmar mino tamzet cu ramsung ah hnatuan ding nei loin an um ih ramdang fehnak ding an hawl. Cumi ahcun Thailand cu thupte fehnak naibik a si tikah thupten Thailand ram sungih lut Myanmar mi tampi an um.

Thupten Thailand ram ih lut Myanmar mipawl cu Thailand palik pawlin an kai rero ih, thupten Thailand ram sung luh a harsa deuhdeuh tin an sim.

Thailand ih Myamar mipawl buaipitu pawlkom cun “Ralhrang in rampi thuneihnak an lak hnuah thupten Thailand ram sungih lut Myanmar mi lakin kaihmi thawng 80 kiangkap an um zo. A thok ahcun olsam deuh in thupten Thailand ram sungah an rak lut thei nan, a tufang cu Thailand palik pawlin nasaten ramri ceknak an nei ih, thupten Thailand ram sungih luh a harsa deuhdeuh.

“Thupten Thailand ram sungih lut dingin puaisa hnenah ting tingtel an pe. Ting 13 in ting 30 tiang pe an um. Thenkhat cu Thailand ihsin thupten Malaysia feh tum bet an si. Kaihmi pawl cu kum 1 sung thawnginn sungih an khum hnuah Myanmar lamah an kuat kirsal theu. Cumi ding khalah ram pahnih remawknak a tul vivo a si,” tin a sim.

S.Korea le N.Korea In Missile An Kapsuak – Korea ram pahnih an doawk hnuah N.Korea cun ramri lanin November 2 zingah Missile an kap suak ciamco.

N.Korea ih kahsuakmi MIssile cu S,Korea khawpi Seol kiang peng 37 hrawngah a tla ih,S.Korea lam khalin ralrinpeknak ah Missile pathum an kap suak ve. N.Korea lam cun Missile 20 hrawng an kapsuak tin S.Korea lam cun an sim.

N.Korea lamin ramri lanin S.Korea lamih Missile an kah ciamco tikah S.Korea lam khalin Missile an rak kapsuak ve ih, ram pahnih karlak boruak a se deuhdeuh. S.Korea lam cun N.Korea lam cangvaih dan cu kan thungrul sal rori ding tin an sim.

Ram pahnih boruak a se deuhdeuh ih, buainak picang sawn a thleng vivo thei in a lang. American le S.Korea in raldo zirtlangnak an neih tikah N.Korea lamin an rak zoh men thei lo ih, Missile an rak kapsuak ciamco zo.

Ram pahnih buainak ah N.Korea cun American khal an tih lo thu an rak ausuahpi zo. S.Korea , Japan le American pawl cu ram pahnih buainak ah lamtang zetin an lang ih,China le Russia khal N.Korea dinpitu ah rel an si.