AA In Ralhrang Mawtaw Bomb In An Puah Siat

AA In Ralhrang Mawtaw An Puah Siat – Rakhine ramkulh Ann myone Mini khua kiangah AA cun ralhrang ralkap mawtaw pakhat bomb an puah ih, ralhrang mawtaw a siat tlunah ralhrang thi an um tin an sim.

September 1, zanlam nazi 3 hrawngah Ann myone ih lut ralhrang mawtaw cu Mini khua kiangah AA pawlin bomb an rak puah. AA cun ralhrag mawtaw bomb an puah fuh tukih, mawtaw a kangse thluh. Ralhrang thizat cu kan fiang lo. Mawtaw a siat tuk tikah mithi cu an um rori ding tin mit hmutu pawl cun an sim.

A tufang Rakhine ramkulh sungah AA le ralhrang doawknak a sosang tuk ih, Rakhine ramkulh sungah a hlan bangin raltlan an tam ciamco lala.

Myanmar Aiawh UN Palai Thar An Hril Ding – September thlacem lamah UN sungtel palai pawl tongaw khawm ding an si ih, cumi hlanah UN palai zohfeltu pawl cun Myanmar aiawhtu ding UN palai an hrilfel ding.

2021 September thlacem khalah UN sungtel palai pawl tonawk hlanah Myanmar aiawhtu ding palai hril fel a tulih, tuanvo neitu pawl cun hrilfel loin Myanmar aiawh hrang UN Palai mithar hril ding cu a rak hrial ih, Myanmar aiawh ah UN palai rak tuan rerotu U Kyaw Moe sawn tuanvo an pesal.

Tuitum ahteh UN palai hrilfeltu palai pawl cun Myanmar UN palai hrang mithar an hril pei maw,a hlan bangin mihlun U Kyaw Moe Tun sawn tuanvo an pe bet ding timi cu felfai in theih a si hrih lo. Ralhrang ralkap pawl cun UN ih Myanmar palai hrang an palai an rak thunlut tum rero ve.

Hivek dinhmun ah The Action Network cun UN hnenah Myanmar palai hrang ralhrang lam hril loin U Kyaw Moe Tun sawn hrilsal dingin dilnak an nei zo. Mi tamsawn cun tuitum khalah UN cun Myanmar palai hrang U Kyaw Moe Tun an hmang peh ko ding tin an hmuhdan an rel ve. UN cun U Kyaw Moe Tun cu NUG aiawh siloin Myanmai aiawhtu a rak si cia ruangah cumi fehpi in UN ah Myanmar aiawh palai ah an ra ret hrihmi a si.