Kalay Ah Pyu Saw Htee Nute An Kap That – Sagaing ramthen Kalaymyo nisuannak lam Aung Mingala vengih um Pyu Saw Htee tei nupa cu September 17, zanlam nazi 5 hrawngah mipi ralkap pawlin an kap ih, an pa sawn a hmun ah a thi cih. An nu sawn cu September 18, zinglam nazi 7 hrawngah cerek kahnak hriamhma in a thi ve.
U Win Maung cu Pyu Saw Htee sungih a luh hlanah dalan tin a hmin a rak thang cia ih, ralhrang in rampi thuneihnak an lak pekah dothlegnak ih cangvai mino pawl cu ralhrang hnenah a rak hek ringring theu. Cumi hnuah Pyu Saw Htee ah luh lawlaw a si ih, tu ahcun an nupa in Kalay mipi ralkap cun an thianfai zo.
Kalay ih um pakhat cun “Win Maung timi cu Kalay ah mipi in torhmawh zetmi pakhat a si. A hlanah PDF pawl ngiar ringringtu Sein Lin timi a um ih, Sein Lin kuthnuai ah Win Maung a cangvai theu. Sein Lin sawn cu LIVE in PDF pawl rak ngiartu a si ih, PDF lamin an thianfai zo. Tu ah Win Maung khal mipi ralkap lamin an kap that. A nupi khal a pasal hum a tum ruangah an kap ih, cerek hriamhma in a thi ve,” tin a sim.
AA In Ralhrang Sakhan 3 An La – AA cun Rakhine ramkulh sung Bangladesh ramri ih ralhrang sakhan 3 an lalfel zo thu September 18 ah mipi theihternak an nei ih, Paletwa peng sungih ralhrang an do dan thuhla khal an talrang.
AA cun “Paletwa peng sung hmun 3 ah ralhrang ralkap cun tlunzuang raldonak le ralthuam hmangin thla 1 zik in kap thlang. Paletwa peng sungih ralhrang hmun poimawh then pawl kan phitcat thei tikah ralhrang pawlin lamzin onsal an tumih, nasaten ttan an la. Cumi ahcun ralhrang pawlin tlunzuang raldonak le ralthuampi duhtawkin an hmang ringring. Asinan, kannih AA pawl cun theitawk in ralhrang ralkap pawl kan phit thei hrih.
“Rakhine ramkulh Bangladesh ramri ih ralhrang sakhan pakhat cu thla 1 sung zik kan do hnuah August 31 ah kan lafel thei. September 10 khalah ralhrang sakhan pakhat kan la bet. Ralhrang sakhan hmunpi pakhat khal thla 3 sung zik kan do rero hnuah tu ahcun kan lafel thei zo. Hivek ruangah ralhrang pawl cun ramri ih an sakhan tampi an suahsan rero phah.
“Tu khalah ralhrang sakhan hrekkhat kan kulh ih, kan phih thluhmi a um. Cumi ahcun India, Bangladesh le Myanmar ram 3 ramri ih um ralhrang sakhan khat kan phit zo. Khatlam ahcun Paletwa peng ih kan umnak hmun khal ralhrang lamin in nor rero ih, thla 1 zik kan do aw thlang.
September 16 ,zan nazi 8 hrawngah ralhrang ralkap cun duhtawk in Bangladesh ramri ah ralthuampi an kap ciamco ih, nauhak pakhat a thih phah tlunah mi 5 hriamhma ngah an um. Siattong innsang kan tuarpi tukih, mipi thleidang thiam loin atsuah ringring ralhrang ralkap pawlih cangvaihnak kan mawhthluk tuk. Ramri ih an sakhan pawl kan laksak rero tikah ralhrang cun duhtawk in ralthuampi le tlunzuang raldonak an hmang rero. Curuangah mipi pawl an harsa tukih, ralhrang cun ral ih an duai ruangah mipi tuar ding zawngin an cangvai rero thlang a si,”
“September 18, sun nazi 1:48 hrawngah ralhrang ralkap cun Paletwa peng Hna-mah khua kiangih kan umnak hmun cu raldonak vanzam 3 le raldonak Helicopter 2 thawn zanlam nazi 3 tiang in ra kap. Ralhrang ralkap cun tlunsang in bomb vei 11 tluk in thlak ih, minute 30 tluk cawl loin in kap peh. Cumi hnuah raldonak Helicopter in minute 30 sung hrawng in kap bet.
“Ralhrang pawl cun Paletwa peng sungih kan umnak cu ralthuampi le ralthuam phunphun thawn nasaten in kap ih, kannih khalin kan umnak hmupi in ralthuampi kan kapsuak ve. Ralhrang ralkap cun a phunphun in kan umnak hmun in kap ih , lak an tum nan, kannih AA miraltha pawl cun tlansuak men loin ralthat suahin ralhrang pawl an rak kap ih, doawknak a sosang hrih. Raltha zetin ralhrang do rerotu AA miraltha pawl kan upat tuk a si,” tin AA cun September 18 zan ah thu an suah.
Bangladesh ramri sungih ralthuampi a tlak thu ahcun Bangladesh in ralhrang pawl ralrinnak an pe rero zo ih, UN ah kan lo hek ding titiang in an simthei. Cutikah ralhrang pawl cun “Nan lamih ralthuampi tla kha kanmai kahmi a silo ih, AA lamih kahsuakmi a si,” tin ralhrang pawl cun Bangladesh an simthei. Cutikah AA lam daiten an ummen thei lo ih, Bangladesh lamih tla ralthuampi cu ralhrang pawlih kahsuakmi rori a si tin an sim ve.
Taiwan Ih Linghnin Ah Thilsiat Tam – September 18 sun hnuah Taiwan ram Taitung hmunram sungah 6.8 Magnitude tluk hna in ling a hnin non ciamco ih, thilri siat a tam.
Linghnin non ciamco ruangah mawtaw tlu, tlangleng tlu, innpi cim tivek a tam ih, theitawkin runsuah hna an tuan ciamco hngal. Tuhrih tiang ahcun linghin ruangah mi ziangzat an thi timi felfai in an phuang thei hrihlo ih, mithi ,hriamhma ngah le mihlo cu an um rori.
Hivekin Taiwan ram sungih ling a hnin tlunah Japan tipi ih Typhon thlisia khal Taiwan lam a pan tin nikua zohthiam pawlin thu an suak tikah ralringten um dingin mipi an theihter. Japan nikhua zohthiam pawl khalin China tipi lamah thlisia a feh vivo tin an rak phuang ve ih, China le Taiwan cu ramri peh aw an si.
Leave a Reply