AA In Ralhrang Sakhan An La – Rakhine ramkulh Maungtaw myone ih ralhrang ramri sakhan cu October 10 zingah AA pawlin an kap ih,sakhan kan lafel thei tin AA cun thu an suah.
Doawknak kiangkap ih um pawl cun doawknak ah ralhrang 30 an thi ih ralhrang thi lakah ralbawi thenkhat an tel, Doawknak ih ralhrang thi an tam tlunah AA cun ralhrang 14 nungdam in an kai tin khuami pawl cun an sim nan, AA in Official in thu an suahmi ahcun ralhrang thi an um ih nungdam in ralhrang 3 kan kai. Ralhrang sakhan kan lafel ih Ralthuam hrekkhat kan laksak thei. Doawknak ah AA lamin Miraltha pakhat cun ram le miphun htang a nunak a hlan a si tin AA cun thu an suah.
AA thuphuangtu Khai Thukkhah cun “October 10, zinglam nazi 4 hrawngah ramri ih ralhrang sakhan kan kap. Doawknak sosang ah ralhrang sakhan kan lafel thei zo ih, ralhrang sakhan in ralthuam tampi khal kan laksak thei. Doawknak ah ralhrang kaihmi khal kan nei a si,” tin Rakhine thuthang a simthei.
Doawknak kiangih um pakhat cun “Ramri kil pawl umnak ralhrang sakhan a si ih, AA le ralhrang doawknak a sosan hnuah ralhrang pawl khal an um ve zo. AA lamin ralhrang sakhan an lakfel hnuah ralhrang pawl cun Helicopter pahnih in AA lakmi an sakhan an pan hngal ih, tlunlam in an kap ciamco. Ralhrang sakhan cu AA lamin an rak ukrang thluh man zo. Doawknak ah AA lam khal thi an um tin kan thei. Ralhrang skhan kang cu a tihnung um ngaingai a si,” tin a sim.
AA cun Muangtaw myone ih ralhrang ralhrang sakhan pawl cu August 30 ah pakhat, September 11 ah pakhat, September 15 ah pakhat tin an rak laksak zo. August thla sungih media an komnak ahcun AA in Maungtaw myone in ralhrang sakhan 11 an laksak zo thu media an rak simthei.
Bomb Cangsuaknak Ah CDF 2 An Thi – Chin ramkulh Thantlang Lungler khua ralhrang sakhan ih bomb an lakmi pawl cu CDF Thantlang in October 10 ni ah nisa an pho ih bomb a puak. Bomb puak ah CDF Thantlang sungtel 4 hriamhma an ngah.
Hriamhma CDF 4 pawl cu Sizung ah zamrangten fehpi an sinan, an lakin pahnih cu sizung thlen man hlanah an nunnak a cem. CDF thi pahnih cu Biak Tha le Tum Bawi Tling an si.
Lungler ralhrang sakhan cu 2021, September 11 ah CDF Thantlang le CNA komkhawm in an rak do ih, sakhan ih um ralhrang pawl an tlan thluh. Cumi ahcun CDF Thantlang pawlin ralhrang tlansanmi bomb an la ih, tuitum ah nisa ah an pho laiah cangsualnak thleng a si.
Russia In Ukraine Khawpi An Kap – Russia cun an ram sungih Lilaw puak thungrulnak hrang tin Ukraine khawpi Kyiv cu Ocotber 10 ah raldonak vanzam in an kap ih ,mipi 10 tlun an thi zo tin Ukraine lam cun thu an suah.
Kan sung zarhte ni ah Russia in 2014 kum ih Ukraine ram an rak laksakmi Crimea ramthen sungih lilawnpi a puak ih, Russia cun Ukraine lam cangvaihnak a si tin Ukraine an puh. Cumi ruangah Russia cun thla reizet sung an rak kah nawn lomi Ukraine khawpi Kyiv an kapsal.
Russia ruangah Ukraine khawpi bik Kyiv cu awmthawm le tap thawm in a khatsal ih, khawpi meisa tamsawn khal a thim. Khawpi sung innpi le thilri khal tampin a siat phah ih, mipi mangbang vansang in an um.
Russia cun thla reizet sung Ukraine khawpi bik Kyiv lam a rak kap nawn lo ih, Ukraine nisuahnak lam Donbas ramthen sung sawn hmunram lak vivo tumin nasaten an do ih, kan dung zarh ah Russia cun Donbas ramthen sungih hmunram 4 cu Russia ram ah an rak phuang zo.
Russia president Putin cun “Ukraine lamin kan ram sung an kap asile an tuar sinsin men ding a si,” tin thu a suah.
Leave a Reply