AA In Ralhrang Sakhan An la – Rakhine ralkap AA cun ralhrang sakhan pakhat an lak fel thu August 31 ah thusuah in mipi theihternak an nei ih, ralthuam tampi an laksak tel tlunah ralhrang thi an tam.
AA cun “August 2 in Rakhine le Bangladesh ramri ih ralhrang sakhan kan do thok zo. Paletwa le Rakhine ramkulh hmundang khalah thla 1 zik ralhrang thawn kan do aw thlang. August 31, zinglam nazi 9:12 hrawngah Bangladesh ramri ih ralhrang sakhan kan la fel thei. Ralhrang sakhan kan lakmi ahcun ralhrang 19 an thi ih, ralthuam tampi kan lasak thei. Kanmah AA lam khalin thi an um.
“Rakhine ramkulh sung doawknak ah Ralhrang ralkap cun nikhat ah ralthuampi 300 le 400 karlak an kapsuak ih, raldonak Helicopter le vanzam tiang an hmang. Cumi ruangah mipi thih phah an um ih, mipi tuar ding zawngih cangvai ralhrang thungrulnak hrang Bangladesh ramri ih ralhrang sakhan la kan si.
“Rakhine ramkulh Mriuk Oo ah ralhrang cun mipi tuar ding zawngin ralthuampi an kap ciamco ih, mipi 3 an thih phah tlunah hriamhma ngah 9 an um ih, cumi thungrulnak hrang ralhrang sakhan kan la. August 31, sun nazi 2:40 hrawng khalah paletwa myone Mik-wah khua dunglam ah ralhrang thawn kan do aw ih, ralhrang 10 an thi. Zanlam nazi 5 tiang ralhrang thawn kan do aw peh. Rakhine miphun le Rakhine ramkulh hrang nunnak hlantu AA miraltha pawl cu upatnak kan pe.
“Ralhrang pawl ralthuam kan laksakmi pawl cu meithal zun 30, ralthuampi kahnak le ralthuampi cerek, meithal cerek tampi, meicet 2 , Battery 1, Invitor pakhat le thildang deuhdeuh pawl an si.
“Ralhrang sakhan kan laksakmi ih thi ralhrang 19 pawl cu Palik bawi Soe Soe paing, palik hotu sangtu Saw We Phyo , ralhrang senkhat Aung Ko Khaing, Aung Lwin Oo, senkhat, Thet Ko Oo,Myo Nge, Tin Myo Lwin, Zaw Naing Oo,Aung Kyaw Twin,ralkap Myo Zaw Oo, San Lin Paing, Sit Ye Naing, Ngein We Nuh, Lwin Ko Tat, Chit Win Myint, Wana Aung, Aung Kyaw Oo, Ni Htun Lin le Shing Kyaw pawl an si,” tin AA cun thu an suah.
AA in sakhan an lak thu mipi an theihter hlanah AA sungtel pakhat cun Sakhan cuh aw ih doawknak ,Rakhine ramkulh sungih, doawknak le paletwa lamih doawknak pawlah ralhrang 40 an thi ih, AA lam 8 kan thi tin Rakhine thuthang a rak simthei hmaisa. Tu ah AA lamin casuah in mipi theithernak an nei ih, AA sungtel pakhat ih relmi thawn a thlau aw tuk lemlo.
YMA In Ritheihsi Nasaten An Do Ding – Myanmar in Mizoram lamih rittheihsi a lut nasat tuk ruangah Central YMA cun nasaten rittheihsi do an tum thu mipi theithernak an nei ih, rittheihsi tham le zuar an kaih tikah an dim lo ding.
Rittheihsi thuhla thawn pehparaw in Central YMA meeting an nei zo ih, meeting ahcun rittheihsi dotu ding pawlkom an dinthar. September 9,2022 ah pawlkom thar hrang hnatuan dingih an lakluhmi pawl lomluhnak an nei ding. Aizawl khawpi sungih vengtin YMA 108 pawl cun palai pakhat ciar an thawh dingih, Aizawl khawpi sungih hnamdang ,daan lo ih sumdawng pawl khal an kai tum.
YMA cu mizoram sungah hminsia hminthatnak tampi nei an si ih, rittheihsi thuhla ah tihnung ngaingai an si. Curuangah Mizoram sungih rittheihsi zuar le tham Myamarmi kan um asile bansan hngal a tha ding, lole an lo kaih pang tikah hremnak a naa tuk dingih, khat le khat vuivaiawknak a suak thei.
Myanmar lam khalin chin ralkap pawl cun Mizoram lamah rittheihsi phur lo dingin Chin mipi an theihter rero zo ih, rittheihsi phur an kaih pang ahcun an dim lo ding thu an rak suah ve zo.
PDF In Leihnuai Ih Do Aw Dingin Ralhrang An Ngiar – A tufang Sagaing ramthen sung doawknak sosang ah ralhrang ralkap pawl cun tlunsang raldonak hlir an hmang thlangih, mipi le PDF lamin an tuar. Curuangah PDF cun ralhrang pawl cu ngam le ngam leihnuai ah do aw dingin an sawm.
Sagaing ramthen Taze myone sungih cangvai Taze PDF cun “Tlunsang raldonak tel loin ke in feh uhla leihnuai ah kan do aw ding. Tlunzam tel loin ke thawn in ra pan uh. Leihnuai doaknak nan tih maw?” tin ralhrang ralkap pawl an simthei.
A hlan khalah Sagaing PDF cun ralhrang ralkap pawl khualeng suak dingin an rak ngiar zo ih, PDF pawl ngiarnak vekin ralhrang pawl cu tutiang an cangvai ngam hrih lo.
Sagaing PDF cun “Khuasung ah mipi tuar ding zawngin doawk a ttul lo,kannih cu mipi tuar ding zawngih doawknak kan duh lo. Curuangah nan ngam taktak asile khualeng ah suak uhla mipi tuar lo dingin zawngin kan do aw ding,” tin ralhrang an rak ngiar zo.
Sagaing ramthen sungah ralhrang pawl bomb puah an tong tam tukih, bomb puak ruangah ralhrang thi an tam tuk zo. Curuangah ralhrang pawl cun Sagaing ramthen sungin khua hnu khua khat an luhcilh ding khalah ke le mawtaw in an feh duh nawn lo ih, tlunzuang an hmang tlangpi thlang.
Ralhrang pawlin tlunzuang an hman tikah mipi ralkap pawlin duh vekin an kap thei lo ih, dung an sip phah ringring. Culawng siloin ralhrang pawl cun tlunsang in mipi umnak khua khal bomb an thlak phah tikah mipi thih le innkang a tam.
Hivek cu Mipi ralkap lamin zohhar, tuarhar an tituk ih, ralhrang pawl cu mipi tuar lo ding zawngin, khualeng suak dingin le tlunzuang hmang loin leihnuai ah do aw dingin an ngiar.
Google In Trump ih App An Pom Duh lo – US president hlun Donald Trump cun 2022, February thla lamah amai bulpak company ih tuahmi Truth Social timi App cu mipi hman theih dingin a rak tlangthan zo ih, Apple Store ah mipi lei tambikmi dinhmun a luah rero.
Asinan, Google Playstore cun Trump ih Truth Social App cu daan a thlun lo tin Google Playstore ah an ret duh ve lo. Ziangahtile, Truth Social ah taksa lam daan pahbalnak le dankalh cangvaihnak thape zawng cangvaihnak a um tin Google cun thu an suah.
Trump cu US president a si nawn lo hnuah Twitter, Facebook, Google Youtube le IG pawlin an social sungah cangvai thei lo dingin an rak phit ih, cumi ruangah Trump cun amai bulpak in Social App a tuah phahmi a si.
Google cun “August 19 ah Truth Social ih daan pahbalmi le rem tulmi pawl cu anmah Truth Social tuanvo neitu pawl hnenah kan rak simthei zo. kan daan thlun lomi an neih ruangah pom lo kan si,” tin thu an suah. Truth Social cun ‘Zianghman daan thlun lomi kan nei lo ih, minung taksa hroawknak le daan pahbalnak thape zawngin cangvaihnak kan nei lo,” tin Google an let ve.
Leave a Reply