Rakhine ralkap AA cun ralhrang ralkap ih umdan le kekar dan mipi an theihter ih, tufang ahcun ralhrang thawn remnak hrang biakawk an tum hrih lo thu an sim.
AA thuphuangtu Khai Thukkhah cun “A tufang ah ralhrang pawl cun leihnuai lamah a phunphun in kan mipi pawl harsatnak pek an tumih, an nor rero. Kanmah AA duhdan ih kan feh tummi khal ralhrang lamin an kham rero. Hivek cu thiltha lam khihhmuhtu a silo.
“leihnuai ah raltho dingin an cangvai rero ih, kaa cun remnak hrang kan be aw ding tin an sim. Curuangah, ralhrang cu zum theih an silo lawlaw. An cangvaih dan cu an kekar tumdan pholangtu khal a si. Curuangah, hivek caan ah remnak hrang ralhrang biak tumnak kan nei hrih lo.
“Ralhrang in mipi an dekcok nawn lo, an nor nawn lo kan duh,cuvek an tuah thei lo ahcun remawknak a um thei dah lo ding. Dik takin kan rel asile ralhrang pawl an umhmun khuarnak an sakhan lawngah um hai sehla buainak ding zianghman a um lo. Cuvek siloin, hmunram in nor vivo tikah remawknak hrang biakawk ding cu a cang hrih lo. Curuangah, leihnuai ih ralhrang pawl cangvaih dan an bansan hmaisa a tul a si,” tin Rakhine thuthang a simthei.
A tufang Rakhine ramkulh sungah AA le ralhrang an kap aw lo nan, AA ih cangvaih tum dan cu ralhrang lamin an kham vivo ih, Rakhine ramkulh hmun tinkim ah ralhrang pawl umhmun an khuar vivo. Culawng siloin AA thawn pehparawknak nei tivek cu ralhrang lamin an kai ih, AA lam an sosang ve thlang. Curuangah, Rakhine khalah doawknak suak thei ringring a si tin an sim.
Karen Ah Ralhrang 88 An Thi – Karen ralkap KNU cun KNU hmunram 5-nak lawngih ni 15 sung ralhrang thawn an doawknak thuhla pawl cu may 17 ah mipi theihternak an nei ih, ralhrang 88 an thi tin thu an suah.
KNU cun “May 1 in 15 tiang KNU hmunram 5-nak sung lawngah ralhrang ralkap thawn vei 186 kan do aw ih doawknak ah ralhrang 88 an thi. Ralhrang hriam tuar 68 khal an um. Ni 15 sungah ralhrang mawtaw 3 kan siatsak thei ih, ralhrang sakhan pakhat khal kan nawkkang thluh. Ni 15 sung doawknak ah kanmah KNU lamin KNLA miraltha 2 kan can ve ih, hriam ngah 2 kan um.
“Doawknak a um tinten ralhrang cun mipi tuar ding zawngin an cangvai ih, mipi inn le mipi umnak ah ralthuampi 728 tluk an kap. Cumi ruangah, mipi pakhat a thih phah ih, mipi hriam ngah 8 an um. Ralhrang pawl cu kan hmunram in suak dingah kan theihter ih, suak duh lo cu kan do vivo ding a si,” tin thu an suah.
May 18 zing khalah KNU cun an tuanpi PDF pawl thawn Karen ramkulh Myawaddy thlanglam ih Tih’bawbu ralhrang sakhan an la fel tin mipi theihternak an nei.
KNU le an tuanpi PDF pawl cun may 17 zan in Tih’bawbu sakhan an do thok zo. Ralhrang lam cun doawknak ah vanzam an hmang phah nan, may 18 ,zinglam nazi 10 hrawng ahcun ralhrang pawl cu an sakhan ah um ngam nawn loin an tlansuak thluh. Cumi hnuah KNU cun Tibawbu ralhang sakhan ah KNU thantar an zar ih, sakhan an lakfel thu mipi an theihter.
Sakhan lak doawknak ah khatlam khatlam in mi ziangzat an thi , ralthuam ziangzat an laksak thei timi cu himi kan ngan tiang KNU lamin an phuang hrih lo ih, neta an phuan tikah kan tarlang leh ding a si.
Leave a Reply