AA le NUG An Be Aw

Rakhine ralkap AA le NUG cozah cun be aw dingin khat le khat simtheihawknak an neih rero zo bangin may 16 ni ah a takin an be aw ih, ram buainak thuhla an rel.

NUG lamin ramdang vuanci Daw Zin Mar Aung hohami pawlkom an tel ih, AA lamin hotu Tun Myat Naing hohami pawl an tel. Pawlkom pahnih thurelnak ahcun NUG lamin dothlengnak ih an tuahmi pawl, tufang an cangvaihnak tlunah an tumtahmi pawl AA simfiangnak an nei ih, AA lamin tufang ram buainak ih an hmuh dan an sim ve.

AA thuphuangtu Khai Thukkha cun “Kan tonawknak ih kan relmi cu tufang ram buainak ziangtin kan hmu timi relnak kan nei ih, khat le khat kan hmuh dan le pom dan kan ruah aw. Cucu, tuini tonawknak ih kan rel theimi a si hrih. Hivekin NUG thawn kan biakawk ruangah ralhrang lam hro an suang pei maw timi cu anmai cangvaih dan ih zir a si dingih, kannih cun an cangvaih dan ih zir in thungrul kan man ringring a si,” tin a sim.

NUG lam cun AA siseh Rakhine pawlkom thawn ram buainak ah tuantlang an duh thu ca an rak suah rero zo. Tuitum cu pawlkom pahnih an biakawk veikhatnak a si ih, hmailam ah an be aw vivo pei maw timi cu mipi theihternak thusuah an nei hrih lo.