AA le Ralhrang An Kap Aw

Chinram Khalah Datsi Man A Kai – Chin ramkulh myone tinkim ah datsi man a kai ciamco ve. Bike tatsi liter khat ah 3200 a thlengih lamzin sir dawr ahcun 3500 an ngen.

“A hlanih datsi kan kolmi pawl lawng kan zuar rero hrih. Thlangthar pawl cu zuar ding a um nawn lo. Asinan, tutiang ahcun datsi zuar ding nei lo khop cu kan si hrih lo. Lei ding um lo khopin an pit lo ding kha a thupi hrih a si,” tin dawr neitu pakhat cun an sim.

Hakha ahcun 95 Ron 3250, 92 Ron 3150, datsi menmen 3230 tin an zuar. Chin ramkulh Falam, Hakha le matupi pawlah datsi galan khat thawng 15 hrawng a si ih, mi pakhat in zarh khat galan 2 an hmang tin’ tin an sim.

Matupi ih um pakhat cun “Kannih Matupi ahcun galan 5 , pung aihre kha a khat lo cingin thawng 70 in kan zuar. Kan dung naite ah lamzin a ongih, cumi ruangah datsi a thleng thei. Cutikah pung ih lei an tamsawn a si,” tin a sim.

Ralhrang In Chuangkhuah Khua An Urkang – Sagaing ramthen Kalaymyo thlanglam Chaungkhuah khua cu August 12, zanlam nazi 5 hrawngah ralhrang ralkap pawlin an urkang ih, inn 12 a kangral zo. Ralhrang pawl ruangah khuami pawl cu an tlan thluh hrih.

“August 12 , zinglam ah ralhrang ralkap le Kalay mipi ralkap komkhawm pawl cu Tayakung khua le Chuangkhuah khua karlak ah an kap aw ih, cumi hnuah ralhrang pawl cun Chuangkhuah khua an luhcilh ih, inn hrekkhat an urkang sak.

Khuami pakhat cun “Tuhrih ahcun inn 15 hrawng a kangral zo tin kan thei. An hmuhmi pohpoh an urkang men ih, inn an urkang thei lomi cu sangka an bauhsiat tlunnah innsung thilri khal an siatsak ciamco men. Ralhrang pawl sualzia cu a rapthlak tuk lawlaw. Tu ah khuami pawl cu khua ah kan lut ngam hrih lo ih, a remnak hmunah kan tlan cio. Fur caan a sifawn thenkhat cu bom tultuk an si,” tin a sim.

Kalay PDF cun “August 8 ah Tayakung khua ih um ralhrang pawl le Kalay thialthiam zirnak tlawngih um ralhrang pawl an kom aw ih,ralhrang mipum 150 hrawng cun hmailam an pan. Sun nazi 12 hrawngah Kannih Kalay PDF le CDF KKG in kan rak kap ih, minute 30 sung hrawng kan do aw. Doawknak ah ralhrang 4 hrawng an thi ih, kannih mipi ralkap komkhawm lam cu kan him.

“August 12 zingah Kannih Kalay PDF le CNDF cun Chuangkhuah khua kiangah ralhrang pawl kan kap ih,zanlam nazi 5 tiang kan do aw. Doakwnak ah ralhrang 3 an thi ih, bomb kan puahmi ah ralhrang thi an tam ding. Kannih mipi ralkap komkhawm lam cu thi kan um lo. Zanlam nazi 5 hrawngah ralhrang ralkap cun Chuangkhuah khua an luhcilh ih, khua sungin inn 12 an urkang. Ralhrang pawl cu August 13 ah Chuangkhuah khua in an suak ih, Kalaymyo thlanglam an pan vivo a si,” tin Kalay PDF cun thu an suah.

Tamu Ah Pyu Saw Htee In Mi Pakhat An That – India le Myanmar ramri Tamu myone nanphalung le Mohre kiangah Tamu PDF cun August 12 ah bike pakhat an rak kai ih, an velh ciamco hnuah a bike an laksak.

Pyu Saw Htee pawlin Min Lwin an kaih tikah Min Lwin cun “In zangfah hram uh, himi bike lawngin ka nupi faunau ka cawm ih, ka fale tlawng thlahnak ah ka hmanmi a si,” tin zangfah a dil rero nan, Pyu Saw Htee pawl cun an zangfah duh lo ih, an velh ciamco hnuah a bike an laksak.

Ko Min Lwin cu Pyu Saw Htee pawlih velhnak ah hriamhma naa tuk a tuar ih, ke in inn a thleng thei tento. Inn a thlen hnuah theitawk in an tuamhlawm rero nan, August 12 ah a nunnak a cem. Tumu ah Pyu Saw Htee pawl an sual ngaingai ih, pyu Saw Htee pawl kut ruangah mipi 10 tlun an thi zo tin khuami pawl cun an sim.

Taze Ah Ralhrang 10 An Thi – Sagaing ramthen Tanse myone ih ni 2 sung doawknak ah ralhrang 10 an thi tin Myanmar Defense Force cun August 13 ah thu an suah.

MDF cun “August 8 ah ralhrang ralkap mawtaw 3 ah mipum 100 hrawng to pawl cu Zua-nge lamah an feh tin kan thei. Cutawk ihsin ke in an feh ih, khua tin an luhcilh vivo phah. Ralhrang pawl cun lamzin tluanah mipi inn 8 an urkang phah ih, hmailam an pan vivo.

“August 9 ahcun lamzin tluanih feh vivo ralhrang ralkap pawl cu PDF tatyin 6 pawlin an rak kap ih, ralhrang thi an um. August 10 ah ralhrang ralkap pawl hmailam an pan betih, kannih MDF le Taze PDF tangtlang cun lamzin ah kan rak do. Minute 40 sung doawknak sosang ah ralhrang 10 tlun an thi ih, hriamhma ngah tampi an um.

“Ni 2 sungah hmunram thianfainak nei dingin suak ralhrang pawl cu neh zetin kan rak do thei ih, kannih mipi ralkap lam cu thi um loin himdamten dung kan sip thei a si,” tin thu an suah.

AA le Ralhrang An Kap Aw – Rakhine ramkulh Rati Tuang myone Ching Khali khua le Dungpik khua karlak ah AA le ralhrang pawl August 13 zingah an do aw tin Kiangkap ih um pawl cun RFA an sim. Zinglam nazi 8 hrawngah AA le ralhrang pawl an do aw thokih, khuami pawl cu khua dangah an tlan thluh hrih.

Ching Khali khuami pakhat cun “AA le ralhrang doawknak hmun cu kan khua ah a nai aw tuk. Curuangah kannih khuami pawl cu khua dang hla deuh ah kan tlan thluh. Kan khua kiangah ralhrang pawl an um ih,midang an um lo tikah AA thawn an do aw rori in a lang.

“Doawknak ah Caw khal pakhat an kap ngah ih, a thi, midang hriamhma ngah khal an um. Anmah AA le ralhrang lak khalah thi an um ding tin thuhla kan thei. AA le ralhrang an doawk ruangah lamzinpi ih mawtaw pawl khal hmailam pan ngam loin lamzin ah an cawl hrih thluh. Zinglam nazi 8 hrawng ahcun meithal puak awn kan thei ih, zinglam nazi 9 hnu cun bomb puak awn le ralthuampi puak awn khal kan thei. Doawknak a sosang ngaingai a si,” tin a sim.

Rakhine ih um pakhat cun “Doawknak ah ralhrang lam thi an tam tin thuhla kan thei ih, ralhrang nungdam ih kaihmi khal an nei tin mipi cun thuhla kan thei. Asinan, anmah AA lamih thusuahmi kan hngak hrih. Rati Taung ih ralhrang lawng 2 in ralhrang pawl an suak ih, doawknak hmun lam cu ralthuampi an kap ciamco. Tuitum an doawnak hmun ah ralhrang pawl umhmun an khuar ciamco ih, doawknak um peh vivo thei.

“Tuitum ih an doawknak hmun cu Maungttaw, Rati Taung le Sittwe fehnak lamziinpi tluan a si. Doawknak ruangah caw khal pakhat a thi timi cu felfai zetin kan thei zo. Hrekkhat cun bike mawng pakhat khal ralhrang lamin an kap that tin an rel nan, cumi cu kan fiah thei hrih lo a si,” tin a sim ve.

Naypidaw Hmanah Ralhrang Pawl An Zalen Lo – Ralhrang ralkap in rampi thuneihnak an lak hnuah ramsung hmun tinkim in ralhrang uknak do rero a si ih, khawi hmun khalah ralhrang pawl zalen zetin an vak ngam nawn lo.

Ralhrang hmunpi le Myanmar ram khawpi Naypidaw rori hmanah ralhrang pawl zalen zetin an vak ngam nawn lo ih, an suahvah ding thuhla darhter an duh lo tlunah an vak ding khalah kilhimtu um cia rori dingin an cah.

Naypidaw ih um pakhat cun “Naypidaw cu ralhrang hmunpi a si ih, duh vekin PDF pawl an cangvai thei lo. Mipi khalin Naypidaw ih PDF pawl an duhthu a sam lo. Asinan, theitawk cun an cangvai ve. Tu ahcun Naypidaw ih ralbawi pawl khal zalen zetin an duhnak hmun an vak ngam nawn lo ih, an suak ding asikhalle lamzin pawl thaten kil dingin thu an pe hmaisa ringring. Cumen siloin an suahvah ding thu khal an darhter duh lo ih, a thupthiar hlir in an vak theu a si,” tin a sim.

Naypidaw ih thilcin lam hotu Dr.Aung Kyi pawl thilcinmi pawl hal dingin vahsuah a tumih, zalen zetin a vah ngam lo thu, lamzin pawl thaten kil dingih an duh thu pawl dilnak a nei. Cutluk in mahte vah an huphrup tuk zo cu a si.

Nuclear Innpi Kah A Si Ruangah UN Thinphang – Ukraine nisuah thlanglam ih um Nuclear innpi cu August 12 ah vei 5 kah a si ih, UN an rak thinphang tuk ruangah Nuclear innpi kiangkap ah doawknak um nawn lo dingin le ralkap um nawn lo dingin thurelnak an nei.

Ukraine nisuah thlanglam ih um Zaporizhzhia complex innpi cu Europe ih Nuclear innpi tumbik a si. Zoin Nuclear innpi an kap timi thu ah Russia le Ukraine lam an puh aw. Russia cun ralkap kan thlengawk zik zawngah thleng aw thei lo dingin Ukraine lam an cangvai ih, Nuclear innpi an kap phah tin a sim. Ukraine lam cun Russia lamin an kap tin an sim ve.

Hivek ruangah UN Security Council meeting an nei hngal ih, Nuclear innpi kiang ahcun kap aw lo dingin le zokhal ralkap ret lo dingin kham theinak thusuah tuah an tum. Cumi thusuak tuah thei dingin thurel rero lai an si hrih. Ziangahtile, Nuclear innpi an kahsiat pang cun mipi in an tuar tuk an phang a sibik.

Tu ah Ukraine nisuah thlanglam ih Nuclear innpi cu Russia ralkap pawl kutah a um zo ih, a sungah Ukraine hnatuantu pawl an umlai thung. Ukraine lam cun Russia hnenah Nuclear innpi pesal dingin an dil rero ve.