AA Le Ralhrang An Ngiar Aw

Myanmar ram a buai hnuah thuhla nei lemlo AA le ralhrang karlak cu a tufang ah a sosang deuhdeuh ih, doawknak suak thei ringring dinhmun ah an um zo.

AA in Rakhine ramkulh sungah an uknak fehpi an tumih,ralhrang lamin an rak kham rero. Cuvek ruangah, khat le khat hro aw phah, el aw phah le ngiar aw an si. AA in Rakhine ramkulh sungih an uknak fehpi an tum ruangah ralhrang cun Rakhine ramkulh sungah ralhrang an rak ret bet ciamco ve. Cumi ruangah an karlak boruak a sosang.

AA hotu Tun Myat Naing cun ramkulh ralhrang bawi a rak hro zo ih, remdaihnak aupi rero hlah uh, nan umnak tiang kan kap darh thluh thei,” tin a rak sim. AA hotu Tun Myat Naing ih tongkam thawn pehpar aw in ralhrang thuphuangtu Zaw Min Tun cu thusuh a si.

Zaw Min Tun cun “AA ih cangvaih dan le tongkam pawl zoh rero tikah doawk ah in ngiar in a lang. Ramkulh ralkap bawi tiang an hro. Rakhine ah an uknak fehpi an tumih, Rohingya pawl tla an leem rero zo. Hminsin kan tuah dan vek asile 2022 kum sungah AA in vei 10 tluk Rohingya pawl an leem zo. Ziang an tuah timi cu kan zoh ringring ko.

“Bulpak thu khal ka rel tel duh. AA hotu Tun Myat Naing ih nupi pa khal a fanu umnak Switzetland ah ka feh duh tin a dil ih, kannih cun minungpi duhdawt zangfah lainak thawn zalen zetin kan rak fehter zo. Hivek cu remdaihnak kan duh ruangah a si.

“Kannih cun Rakhine mipi an harsatlonak dingah le buainak um lo dingih AA ih tongkam le cangvaih dan cu kan dawh tento hrih. Hitluk in hro an suang nan, remnak a um thei pangah tin that kan suah. Asinan, anmah lam zir lo ruangah Rakhine ah doawknak picang a suak asile ralkap in mawhthluk hlah uh,” tin amah thusuttu Media pawl cu may 19 ni ah a simthei.

AA hotu Tun Myat Naing cun “Ralhrang lamih tongkam cu a dan le keel ringring a siko. Misual in tongkam tha an tong dah lo ih, Rakhine ah miphun cimit tumnak sual tuah an tumsal siko. Tulawng ah hivek an tongmi a silo ih, hlan khalah an tong rero zomi a si,” tin a sim.

Kan dungah AA le NUG cozah thureltlangnak an nei ih, a tufang ram buainak thuhla relnak an neih tlunah hmailam ah ziangtin ke kan kartlang thei ding tivek tiang an ruah aw. AA cun NUG palai pawl an tong ih, an be nan, ralrhang hotu Min Aung Hlaing in remnak rel dingin a sawmnak cu an let duh hrih lo. Curuangah, Rakhine ramkulh sungah doawknak picang a suak thei ringring tin an sim.