AA le Ralhrang Boruak A Se Deuhdeuh

Ram buai hnuah do aw ciamco lemlo Rakhine ralkap AA le ralhrang karlak boruak a se deuhdeuh ih, doawknak picang a suak thei men tin Rakhine mipi an thinhar thok.

A thok ah AA hotu Tun Myat Naing in Rakhine ramkulh ralhrang hotu cu a kaa lawngin remdaihnak thurel men lo dingin ralrinnak a pe ih, na umnak hmun tiang kan kap darh thei tin a rak theihter. Cuveten ralhrang lamin AA hotu ih thusimmi cu an let cih hngal ih, khat le khat karlak ah thuhla a suak peh vivo.

Ralhrang thuphuangtu Zaw Min Tun cun “Buainak suakseh tivek deuh in AA lam an cangvai. Kannih cun mipi an tuar ding kan duh lo ruangah, kan dawh rero hrih. Asinan, kan tuar thei lo cin a thlen ahcun ralkap in mawhthluk hlah haiseh,” tin Media a simthei.

Cucu, AA lamin an la naa zetih ralhrang in mipi nuai cimit tumnak tongkam an rel tinak a si. Hivek cu anmah ralhrang mizia a si ih,kan karlak boruak cu thatlam hnakin siatlam kan pan deuhdeuh a si tin AA thuphuangtu Khai Thukkah in media a simthei ve.

AA cun khat le khat an doawk lo sungah Rakhine ram sung thunun thluh an tumih, an uknak feh vivo an tum. Cucu, ralhrang lamin an rak zohmen thei lo ih, Rakhine ramkulh hmun tinkim ah ralkap an ret vivo. Cumi, ruangah khat le khat tongkam in hro aw le el aw thok rero an si ih, an thu a sosang deuhdeuh cu a si.

Be the first to comment

Leave a Reply

Your email address will not be published.


*