AA, TNLA Le MNDAA Pawlin KNDF An Bawm Ding

Tlangpar ralthuamkai unau 3 ih ti ih hminpe aw AA, MNDAA le TNLA pawl cun kaya mipi hunhimtu KNDF pawl theitawk an bom ding thu ca an suah.

AA, MNDAA le TNLA pawl cun “Ralhrang in 2021, February 1 ah ralhtuam rinsan in rampi thuneihnak an lak tikah tlangpar miphun pawl umnak hmunin ram le miphun humhimtu dingah le ralhrang dotu dingah pawlkom din cio a si ih, theitawk in ralhrang uknak cu do rero lai a si.

“Tlangpar miphum umnak lakin ralhrang do dingih dinmi pawlkom lakah Kaya mipi humhimtu KNDF khal an tel ve. Ralhrang in rampi thuneihnak an lak hnuah dothlengnak hrang dingsuak pawlkom an si. KNDF in theitawk in mipi le ram an humhim reromi khal May 31 ah kum 1 a kim. Miphun , ram le mahte ukawknak hrang rak ding an si.

“KNDF cu Kaya mipi in an dinpi tlunah tlangpar ralthuamkai pawl khalin an rinsan ,thazang an pe ih, kannih tlangpar ralthuamkai unau 3 pawl khalin kan rinsan zetmi an si. Tu ahcun ralhrang do dingih pawlkom an din caan kum 1 a kim fel ih, ralthuamkai pawlkom pakhat si dingin a tulsami ziangkim an neih thluh tlunah raldonak khalah tonteh nei tuk zo an si.

“Kannih tlangpar ralthuamkai unau 3 khalin KNDF pawl ih zuamnak cu upatnak kan pe ih, kan theitawk in kan bawm vivo ding. KNDF ih ral do tum dan, kekar dan ziangkim cu an hlawhtling zetih kannih AA, MNDAA le TNLA pawl cun kum 1 an kimnak cu kan lungawipi tuk a si,” tin thu an suah.

KNDF cu ralhrang ralkap in rampi thuneihnak an lak hnu 2021, May 31 rak dingsuak dothlengnak pawlkom an si ih, pawlkom an din hnuah ralkap tamzet nei in dothlengnak ah muar nei zetih cangvai an si. Kaya ramkulh sung ahcun hmuar nei bikin cangvai an si ih, Kaya ralkap KA thawn khalin lungrual zetih kekar tlang an si.