Mipi In Suamhmang Mi 5 An Kai – Sagaing ramthen Tamu khua ah mino pawl cun suamhmang 5 an kai ngah ih ,palik hnenah an ap tin mipi an theihter.
Tamu mino pakhat cun “September 3, zan nazi 10 hrawngah mipi inn bauh tumtu misual 7 rual cu zan ih duty mino pawlin kan kulh ih, mi 5 kan kai ngah. Mi 2 an tlan man. An ke kan vuak kiaksak thluh ding kan ti sinan, kan lakin mi pakhat cun zamrangten palik a rak ko ih, an ke kan vuak kiak hlanah palik pawl an thleng.
“An ke rak vuak kiak man sehla palik pawlin an thlahsal khalle ruk an ru thei nawn lo ding. Asinan, tu ahcun palik pawlin an hruai zo. August 30 zan ah Tamu ih Inn 2 an rak bauhsak zo ih, bike an ruksakmi pahnih khal tuitum ih kan kaihmi pawl kutah a rak um. Tamu ah suamhmang an tam deuhdeuh ih, cumi ruangah mino pawl zanah kan duty theu a si,” tin a sim.
Ralhrang ralkap in rampi thuneihnak an lak hnuah ramsung hmun tinkim ah rukru an tam deuhdeuh ih, langpang zetin mipi thilri ru ngam khal an um thlang. Rukru pawl cu a burin cangvai , ralthuam nei khal an rak um vivo. Khawilam khal ttang lo rukru an um bangin,ralhrang lamtang Pyu Saw Htee pawl khal ruk an ru nasa tin mipi cun an sim.
Ralhrang Ruangah Lo Hnatuan Thei Lo An Um – Sagaing ramthen Kalaymyo thlanglam Tintar khua uksuh pawl ah tidar harsa ih lo hnatuan thei lo an um. Tidai an harsatnak san cu tihna fehnak lamzin ih ralhrang pawl umhmun an khuar ruangah tin mipi cun an sim.
Tintar khuami pakhat cun “Kannih Tintar uksuh pawl cu Nankate tiva hmangin lo hnatuan kan si. Kum dang ahcun tuvek caan hi tidai a tamlai caan a si. Tuikum ahcun Nankate tihna fehnak lamzin ah ralhrang pawl umhmun an khuar zohman tihna kan tuah ngam lo. Cutikah tidai kan ngah tha lo ih, lo hnatuan thei lo an tam.
“Hivek caan ah Pyu Saw Htee pawl an rak cangvai ve ih, Pyu Saw Htee pawl cu tidai an ngah tha tuk. Lo hnatuan thei lo pawl cu hlawh aw dingin ttuan ding an hawl rero. Tintar khua uksuh ah khua 6 kan um ih, kan zaten tidai kan harsa thluh. Ralhrang pawl cun April thla ah kan khua an rak luhcilh zo ih, inn tampi an rak urkang dah. Curuangah, kannih hrang ralhrang umhmun khuarnak kiangih feh cu a him lo tuk a si,” tin a sim.
Kalaymyo sung hmundang khalah ralhrang tih ruangah lo hnatuan thei lo an um hnuaihni tin an rel ih, hrekkhat cu dawm man a khun tuk ruangah lo hnatuan thei lo khal an rak um ve. Ram buainak ruangah ralrhang tih le thinri mankai ruangah lo hnatuan thei lo tiang an um.
An Fapa Ralhrang Dotu Hrang Sui Thilri An Hlan – People Revolution hotu Bojapan cu a nulepa in dothlengnak ih a tel ruangah thazang an pe zetih, dothlengnak hrang a tulsammi leinak ah suithi ,sui hnakaih le suifaute pawl an pe.
Bojapan cun “Ka nulepa hnenah dothlengnak hrang bomnak ka va dil. Cutikah ka nulepa cun an neihawk ni ih an rohlu an ret thatmi Suithi, sui zunghruk, sui faute le sui hnakaih pawl cu dothlengnak hrang tulsamnak ih ka hman dingah in pe thluh. Ka nui’ hna ah sui hnakaih khal um nawn lo khopin dothlengnak hrangah in pe zo ih, tuitum dothlengnak ah dungsip thei ka si nawn lo,” tin a sim.
Mipi ralkap PRA pawl cu Makui ramthen sungah Sagaing ramthen sungah ralhrang do in cangvai an si ih, anmahten ralhrang do caan an neih bangin, mipi ralkap dang thawn kop awin ralhrang an do caan khal a um.
Tuitum dothlengnak ah mipi ralkap tamzet cu an nulepa , an sungte pawl in thazang an pe ngaingai ih, thenkhat cu lo ,inn le neihsiah tiang zuar in fate dothlengnak hrang petu an um. Khua hrekkhat ahcun mipi ralkap hrang sumpai pek ding an nei lo asile an sui thilri khal mipi ralkap hrang an rak pe rero zo.
China Linghnin Ah Mi 30 Tlun An Thi – China ram Sichuan amthen sungih linghnin ruangah mi 30 tlun an thi zo ih, runsuah hnatuan rero lai a si tin China cozah cun thu an suah.
Anmah China lam September 5 zingah linghnin a si ih, Magnitude 6.8 tluk linghnin ah mithi le hriamhma tuar an tam. Inn siat , lamzin siat khal a tam ih, inncim, leimin ih silhmi khal an um.
Sichuan ramthen cozah cun “Linghnin ruangah mi 30 tlun an thi zo ih, runsuah hna theitawkin ttuan rero lai a si hrih. 2017 kum hnuah linghnin naazet kan tuarna a thlengsal ih linghnin ruangah mi tampi hmunhim ah tthawn an si. A thokah mi 20 hrawng an thi tin kan thei nan, theitawk in hawl an si tikah mithi 30 tlun an um zo. Theitawk kan suah hrih ding a si,” tin thu an suah.
Sichuan ramthen cun 2008 kum ah linghnin naatuk an rak tuar zo ih,linghnin ruangah mi thawng 70 an rak thi. Tuitum Sichuan ih linghnin cu Yunnan Shanxi le Guizhou ramthen pawl khalin an rak thei ban.
Leave a Reply