Myanmar Buainak Kum 5 Reilai Ding Titu ASEAN Chairman – ASEAN Chairman tuan rero laitu Cambodia Prime Minister Hun Sen cun Myanmar ram buainak hi kum 5 sung a rei lai dingih tifel dan theitu cun tifel mai haiseh tin mipi a simthei.
Tuikum ASEAN Chairman kaitu hi Cambodia an si ih, kum thar in ramdang in ASEAN Chairman an tuan thlang ding. ASEAN hi Myanmar telnak pawlkompi an si ruangah Myanmar ram buainak tifel dingin leitlun pawlkom dang, ramdang le UN tiangih rinsanmi an si.
Rinsan an si vekin ASEAN khalin Myanmar ram buainak tifel dingin theitawk an suah ih, buainak a fel thei pangah tin ralhrang pawl khal remnak 5 an tuahpi. Cumi tlunah Myanmar ram buainak tifel dingin ASEAN Myanmar palai tiang an ruat. Asinan, ralhrang pawl cun ASEAN thawn remnak 5 an neihmi cu a takin pakhat hman an pitlin duh lo ih, ASEAN Myanmar palai khal Myanmar a feh paih nawn lo.
Curuangah, kan kum 1 caan rori ah Myanmar ram buainak kan remfel ding titu Cambodia Prome Minister Hun Sen khal Myanmar ram buainak ah a beidong ngah fel ih, Myanmar ram buainak hi kum 5 a rei lai ding, a tifel dan theitu cun tifel uh tin December 12 ah a tongsuak.
Tu ah ASEAN Chairman tuan rero laitu Cambodia Prime Minister Hun Sen hi ASEAN Chairman a sinak vekin EU pawl thawn tongaw ding ansi ih,Cumi hrang Belgium a feh. Belgium a thlen hnuah Myanmar thuhla an rak sutih, cumi ah Myanmar ram buainak hi kum 5 a reilai ding, a tifel dan theitu cun tifel mai uh tin a tongmi a si.
Hun Sen cun “Myanmar ram buainak tifel dingin a malbik kum 5 a reilai ding tin keimah bulpak cun ka ruat. Myanmar ram buainak tifel theitu cun tifel mai haiseh. ASEAN Chairman ka sinak khal a cem thlang dingih, ASEAN Myanmar palai khal Myanmar feh a tum nawn lo.
“ASEAN Chairman ka silai ah buainak tamzet a um nan, theitawkin kan tuanvo kan hlensuak. ASEAN Chairman ka tuan caan ah Myanmar ram buainak kan tifel thei lo ih, tu ahcun ASEAN Chairman thar si ding Indonesia hnenah Myanmar ram buainak hi kan hlan. ASEAN le US kan tonawk tumah ASEAN Chairman tuan hi meiling kai vek a si tin US president ka rak sim dah. Tu ahcun meiling ka kaihmi cu Indonesia hnenah kan pe thlang ding a si,” tin a sim.
Myanmar ram buainak tifel dingin ASEAN le ralhrang cun remnak 5 an rak tuah ih, cupawl cu dankalh cangvaihnak bansan dingin, remnak hawl dingin, buainak ih tel zate tongaw dingin, bomnak pekmi hnaihnok lo dingin ,ASEAN palai Myanmar ah feh dingin le a duhmi pawl tong dingin timi pawl an si.
ASEAN Myanmar palai ih an ruatmi cu vei 2 Myanmar ah a feh nan,ziangpipa tuah theimi a neih lo tlunah ralhrang in midang an rak tongter duh lo. ASEAN Myanmar palai cun a caan cem hlante ah Myanmar fehsal a tum nan, ralhrang in an kaihmi phunsang tlawngta 7 thihdan an pek ruangah ASEAN Myanmar palai cun remnak kan tuahmi daan nan thlun cuang lo, ralhrang pawl ka lo be paih nawn lo tin Myanmar a feh ding a rak thluh.
Hitin tu ih ASEAN Chiarman le ASEAN Myanmar palai cun Myanmar ram buainak ah tithei an nei nawn lo ih ralhrang khal remnak an tuahpi thei lo. Cutikah kum thar hnuih ASEAN Chairman thar ding Indonesia in ziangtin Myanmar ram buainak an tawlrel tum timi cu UN siseh leitlun ramdang ih thlirmi a si thlang.
Leave a Reply