A tufang ASEAn Chairman Hun Sen cun ralhrang hotu Min Aung Hlaing cu ram buainak ruangah thihdan a takin fehpi lo dingin ca a kuat ih, thihdan pekmi pawl an that taktak pang asile Myanmar ram buainak a sosang sinsin dingih, ASEAN buaipinak khal hmuar a nei lo deuhdeuh ding tin a simthei.
Ralhrang ralkap cun rampi thuneihnak an lak hnuih an kaih lakin mi 4 pawl cu thihdan an pek hnuah a takin that dingin thu an suah zo. Ralhrang in a takin that dingih thu an suahmi 4 lakah NLD palai Phyu Yezar Thaw le 88 tlawngta hotu Jimmy an tel ve ih, culo midang pahnih cu Yangon Hlaing taya vengin mithat thubuai ruangah thihdan pekmi an si.
Ralhrang ralkap cun thihdan an pekmi Jimmy le Phyu Yezar Thaw khal Yangon ih mino pawl kaihruai in ralthuam thawn an cangvai ih, mipi tampi an that zo. Kan kaih lai caan khalah ralthuam tampi thawn kan kai ngah ih, thihdan pekmi cu a takin fehpi ding an si tin thu an suah.
Ralhrang in hivekin thu an suah hnuah ralhrang thufehpi dan thawn pehpar aw in leitlun pawlkom le ramdang pawl an mangbang tukih, ralhrang cu nasa ten an mawhthluk. Asinan, ralhrang cun leitlun pawlkom le ramdang pawl cu Myanmar thuhla ah hrolh aw lo dingin le daan an tuahmi cu Myanmar mipi zaten bangranten an fehpi thu in an let ve.
ASEAn Chairman Hun Sen cun “Mi 4 nan that taktak asile Myanmar ram buainak cu tu hnakin a sosang deuhdeuh dingih, Myanmar ram buainak daiten cinfel kan tummi khal hmuar a nei nawn lo ding. Curuangah, thihdan nan pekmi pawl a takin fehpi nan tummi cu tuah hram hlah uh,” tin Min Aung Hlaing a theihter.
Ralhrang ralkap cun thihdan an pek hnuah that taktak dingih an tlun thu an relcatmi 4 pawl cu thlaithat dingin thawnginn kiltu hnenah an ap thluh zo. Asinan, a ni le caan cu relfel a si hrih lo tin thawnginn kiltu cun a sim ve.
Thawnginn kiltu cun “Tuhrih tiang ahcun tlunlam in thu zianghman kan dong hrih lo. Hrekkhat cun thlahnak caan an hmangter thlang dingih, an that taktak thlang ding tin thuhla a suak nan, cuvek thupek kan dong hrih lo a si,” tin a sim.
Ram Buai Laiah Palepa An Rak Nei Aw – Myanmar ram a buai vutvo ih, mipi ralkap le ralhrang an doawk rero laiah Mon ramkulh ahcun palepa an rak nei aw men.
Mawlamyine khawpi ih um Mg.Aye Chan Ko Ko le Dr.Min Thet Naing tei pahnih cu June 8 ahkhan kaphnih lungkimnak in an rak nei aw ih, puai ropi zet tuah in an lawm. Leitlun ramdang lawngah palepa nulenu nei aw umin kan thei theu nan, Myanmar khalah a takin an nei aw rero zo.
Sawmnak ca an ngan dan vek asile mipa sawn Mg.Aye Chan Ko Ko cu ( kum 25 ) fang lawng a si ih, mipa si cingin nunau tuantu ding Dr.Min Thet Naing cu ( kum 52 ) kim zo a si.
Leitlun a buai ding, ram khat le ram khat an do aw ding, ramsung ah khat le khat an do aw ding, an that aw dingih , thilmak phunphun nan thei ding, nan hmu tin an sim reromi cu a thleng rero a si.
Mipi Le PDF In Fihfir 9 An Kai – Sagaing ramthen Mungzua khawpi ah midawr luhcilh ih thilri firtu misual pawl cu mipi lungrual in an kai ngah ih, PDF hnenah ap loin ralhrang hnenih an ap tikah ralhrang cun dik lo zetin thu an suahsak.
June 10, zinglam nazi 10:30 hrawngah misual 5 cun dawr an suam ih, dawr sungin thilri le sumpai an laksak. Cucu, kiangkap mipi in an theih tikah an kokhawm aw ih,rukru 5 cu an kai ngah. Mipi cun rukru 5 hnenin thilri an rukmi le tangka ting 25 an laksak tin an sim ih, rukru an kaihmi pawl cu palik hnenah an ap.
A hnuah ralhrang pawl cun “Rukru 5 kan kai ngai ih, an hnenin nam 3 le tangka thawng 90 kan hmu tel a si,” tin thu an suah.
Monywa thlanglam khalah thilsia hawl ih vak pawl cun lothlo pawl ih hmanmi tidai zuhnak an rak ruksak ve. Cumi cu PDF pawl in an theih tikah an kai ih an taw ah thawi in nun an sim. Cumi hnuah an thlahsal.
PDF cun rukru 4 pawl cu June 8 ah an kai ih an hrem hnuah neta ah rukru nawn lo dingin thu an tiamter ih, datsi man le bike ke kuai belhnak man an pek hnuah an thlahsal tin Farmers Revolution Force FRF (CHU) cun mipi an theihter.
Ralhrang 9 An Thi – Sagaing ramthen Pale myone sungih doawknak ah ralhrang 9 an thi tin PDF cun mipi an theihter.
June 10, zinglam nazi 11 hrawngah ralhrang fehkhawm cu mipi ralkap in bomb puah in an rak do. Hmaisa sawn ralhrang ralkap mawtaw bomb an puahmi ah ralhrang 7 an thi ih, neta sawn ralrang an do betmi ah ralhrang 2 an thi tin Pale PDF cun thu an suah.
Pale PDF hotu cun “Tucun bomb kamciami tlunah hlaral kap puak thei bomb tivek kan hmang ve thlang. Ralhrang mawtaw fehkhawm cu vei 2 do in kan do ih, ralhrang 9 an thi. Ralhrang nundang pawl cun ralhrang thi pawl cu lamzin sir ah an urkang vivo men. Ralhrang an tam tuk tikah vei 2 kan do hnu cun himdam ten sung kan sipsal a si,” tin a sim.
Leave a Reply