ASEAN In Min Aung Hlaing An Sawm Lo – 2022, November thla ah ASEAN pawlkompi meeting an neisal dingih, cumi ahcun ralhrang hotu Min Aung HLaing an sawm lo tin inntek Cambodia thuthang cun mipi an theihter.
Cambodia ramdang vuanci ih thuphuangtu Chum Sunry cun “Hmaithla ah ASEAN meeting kan neisal dingih,cumi ahcun ASEAN pawlkompi sungtel zaten meeting ah kan sawm thluh nan, Myanmar aiawh cun ram hruaitu sawmmi kan nei lo. Asinan, Myanmar ram aiawh in Politics ih tel lo palai pakhat cu kan sawm a si,” tin media a simthei.
ASEAN meeting ah ralhrang pawl sawm an si dah lo ih, politics ih tel lo palai sawm a si ringring nan, ralhrang pawl cun anmah an feh thei lo cun Politics ih tel Myanmar mi pakhat ASEAN meeting ih tel ding khal rem an tilo ih an thlah duh ve ce lo.
November 8 in 13 tiang tuah dingih ASEAN meeting pi ahcun Myanmar thuhla an rel peh dingih, cumi ah Malaysia cun ralhrang lawng be ringring loin NUG khal be ding kan si timi thubur sal an tum. ASEAN sungtel Malaysia cun ralhrang lawnglawng be loin NUG khal be thlang uhsi tin ASEAN pawlkompi ah thu a bur rero zo.
Ralhrang in rampi thuneihnak an lak hnuah ASEAN cun veikhat te lawng Min Aung Hlaing an rak ko ih, Myanmar ram a that theinak dingah remnak 5 an rak tuahpi. Remnak an tuahpimi cu tuini tiang ralhrang lamin a takin an tuah duh lo tikah ASEAN sungtel tamsawn an lungawi nawn lo ih, tuitum meeting ah felfai zetin ralhrang thuhla rel an tum.
ASEAN pawlkompi ahcun ram 10 an tel ih Brunei, Cambodia, Indonesia, Laos, Malaysia, Myanmar , Phiilippines, Singapore, Thailand le Vietnam ram pawl an si. Pawlkom sungtel lakin Cambodia ram cu tui dinhmin ASEAN pawlkom ih Chairman an si.
Chin Le Sagaing Ah Phone Line Siat – October thla thok ihsin Chin ramkulh sungin hmun hrekkhat le Sagaing ramthen sungin hmun hrekkhat ah phone line a hlo ih, phone hmang thei lo an tam.
Falam ahcun Telenor lo hmuahhmuah phone line dang pawl an phit thluh ih, peng khalah phone line an phit. Tedim ahcun Telenor le MPT an ngah lo ih Ooredoo lawng a ngah ve thung. Sagaing ramthen Kalaymyo khalah MPT le Telenor an hmang thei lo ih, Ooredoo hmang thei an um.
Zingzoitu pakhat cun “Ralhrang pawlin an duh tiktikah phone line an phit theu men ih, a hlan ahcun phone line an phit tikah rapthlak zetin an cangvai theu. Tu cu phone line rori an phihmi a si ih, Chin ramkulh le Sagaing ramthen ahcun a thlatel in Internet hmang thei lo an tam. Tu ahcun Internet lawng siloin phone line tiang duhduh in an phit men a si,” tin a sim.
Falam Ah Thilri Man A Kai Ih, An Lei Khawl – Chin ramkulh Falam khuapi ah fangfai telin eiin man a kai vivo hrih ih mipi tampi cun eiin nei lo ih an um leh ding phangin thil an lei khawl ciamco tin khua sungtih um pawl cun an sim. A hlan cozah san ih fangfai dip khat 47000 kiangkap a simi Ayeyarmin Kawchiat fang phun khal tu ahcun 72000 kyats a man thlang tin an sim.
“Thlakhat hnu thlakhat thilri man a kai vivo. Fangfai man khal a sang vivo ih, nehhnu ah eiin a har thei tin a hlan ih fangfai pi 4, pi 5 kiangkap ih thathiam innsang pawl khalin an neihmi sumpai umsun suah in fangfai dip in an lei ih an khawl ciamco. Siti khal cuvek thotho in lei khawl ciamco a si ko” tin Falam khuapi sungih um nu pakhat cun a sim.
Falam khuapi ih fang le eiin pawl hi Sagaing ramthen, Kalaymyoe ihsin lak a si bik ih thilphur motor pawl zawhmi Kalay le Falam karlak doawknak a um phah theu ruangah feh sukso harsatnak a um theu ih thilri man tla thei loin a kai vivo an zum. Cumi ruangah neihsun tiangin lei khawl aw an si tin Ayeyarwaddy Times cun a tarlang.
Ralhrang In An Sualpi Hnuah A Lu An Tansak – Mandalay ramthen Ngio Oo ah ralhrang ralkap le an tuanpi pawl cun NLD party sungtel 3 an thah tlunah nunau pakhat an kaihmi cu an sualpi ih, a lu an tansak.
Singu khuami Win Aung Moe ( kum 55 ), Ngyin Chan Min ( kum 45 ) le Taw Mi Mi Win ( kum 32 ) pawl cu ralhrang ralkap pawlin an kaih hnuah an that thluh. An lakin Taw Mi Mi Win sawn cu ralhranginan sualpi hnuah a lu a tansak ih, lamzin sir ah an hlon men.
Khuami pakhat cun “Ralhrang le Pyu Saw Htee pawl kan khua sungah an lutih, mi 5 an kai. Zinglam ahcun mipa 3 le nunau pakhat thi cia in an ruang kan hmu. Nunau sawn cu an sualpi hnuah a lu an tansak. Pakhat cu tutiang a ruang kan hmu hrih lo,” tin a sim.
Sezua khua khalah ralhrang pawl an lutih NLD sungtel U Kyaw Win le a fanu an kai. U Kyaw Win sawn cu ralhrang pawlin nam in a hngawng an at tan ih, a fanu sawn cu an thlahsal tin khuami pawl cun an sim.
Min Aung Hlaing Ih President Tuan Tumnak USDP – Ralhrang ralkap hotu Min Aung Hlaing in rampi president a tuan tumnak ah USDP party an thupi zet tin zingzoitu pawl cun an sim.
Tu ah USDP party pawl cu Ocotober 4 in tonkhawmawknak an nei thok ih, an party remthatawknak an nei ding. A tufang hi USDP Chairman bik a dam lo a ruangah a aiawh hrang Khin Yee in USDP party Chairman sinak a kai hrih. Khin Yee cun USDP party chairman sinak lak lawlaw a tum tin thu a suak ih, amah hi ralhrang lamtang le ralhrang in cawl pekte a si.
Ralhrang in 2023 ah rampi hrilawknak tuah an tum ih, an duhdan vekin hrilawknak an tuah ding asikhalle hrilawknak ih nehnak cotu lawngin rampi president an hril thei ding. Cumi ruangah Min Aung HLaing cun USDP party ah ralkap milesa ret ciamco a tum tin ralhrang thuthup a suak. Cutin, hrilawknak ah USDP in nehnak an co asile cumi hmang tangkai in Min Aung Hlaing cun rampi President sinak a beisei.
Tu ah Min Aung Hlaing cun amai thuten rampi president sinak a pe aw ngam hrih lo ih, Myanmar Prime Minister tin hmin a pe aw thung. Thuneihnak atcilhtu Min Aung Hlaing hi Myanmar presideng tuan a duh tukih,President rori si a tum. Curuangah, USDP party fehtlang in rampi president si a tumih, cumi ah a hlawhsam asile a duhdan vek thotho in Than Shwe dungthlun ih rampi president si theinak a hawl vivo ding tin thuhla theitu pawl cun an sim.
Iran Buainak Ah Mi 133 An Thi Thlang – Iran ram ih lamzawh duhphorhnak nei le Iran ralkap buainak ah mipi 133 an thi zo nan, buainak a reh thei hrih lo ih, mipi cun lamzawh duhphorhnak an nei peh rero hrih.
September 13 ah Iran palik pawl cun Iran fala Amini cu Iran nunau ceiawk dan ding vekin na cei aw lo an ti ih, an kai. Fala Amini cu Iran palik kut ah a thi. Himi ruangah Iran mipi pawl an lungawi lo ih, Amini hrem thattu Iran palik pawl cu hremnak pek rori an phut.
Asinan,Iran cozah in mipi dilmi an pitlin sak lo ih, Iran ram hmun tinkim ah lamzawh duhphorhnak nei mipi an tam deuhdeuh. Cutikah Iran ralkap pawl cun lamzawh duhphorhnak nei mipi pawl cu cerek ngai le mithli tlaknak in an kap ciamco ih, tutiangah lamzawh duhphorhnak nei lakin mipi 133 an thi zo ih, Iran palik le ralkap khal thi an um ve tin Iran cozah cun thu an suah.
Tuini tiang Iran buainak a reh thei hrih lo ih, mipi cun lamzawh duhphorhnak an nei peh ringring lai. Iran ralkap pawl khalin lamzawh duhphorhnak nei mipi pawl cu ralthuam hmangin an kham bet rero hrih. Curuangah mithi an pung deuhdeuh dingah ruah a si.
Leave a Reply