ASEAN Palai Myanmar A Tlawng

Ralhrang Mawtaw 24 In Chinram An Pan – Ralhrang ralkap mawtaw 24 cun June 29, zinglam 11 hrawngah kalaymyo an suahsan ih, Chin ramkulh an pan.

Ralhrang mawtaw tamsawn cun thilri le eiin an phur ih, rahrang mawtaw 4 cun thing le rua an phur. Culo dang ralhrang mawtaw 3 ahcun a sungah ralhrang pawl an to. Hrekkhat cun ralhrang mipum 100 hrawng an si ding tin an sim ve.

June 27 khalah ralhrang ralkap mawtaw 5 in Kalaymyo in Chin ramkulh an rak pan zo ih, Kalay le Falam karlak Zawngkong khua ah an um hrih tin khuami pawl cun an sim. June 28 khalah Kalay airport ah ralhrang vanzam vei 2 a ttumih, ralhrang pawl a phur. June 26 le 27 khalah Chin ramkulh Hakha khawpi ah ralhrang Helicopter vei 2 a rak tum ve zo.

Mindat Ah Doawknak Sosang – Chin ramkulh Mindat peng sungah ralhrang ralkap le CDF Mindat an do aw tin CDF mindat cun mipi theihternak an nei.

CDF Mindat cun “June 29, zinglam nazi 9 hrawngah Htilin lamin ra ralhrang ralkap le kannih CDF Mindat pawl cu Mindat peng sungah kan do aw. Doawknak ruangah Mindat khua ih ralhrang hmunpi in ralhrang pawl cun Madat khua lam cu ralthuampi in an kap ciamco.

“Shwe Aungtar lamih ra ralhrang ralkap pawl cu hmun 2 ah an then aw ih, Palung Twin khua kiangah kan do aw. Ralhrang dang pawl khal hmailam an pan vivo ih, mipum ziangzat ciah an si ti kan thei hrih lo. Ralhrang pawl kahsuakmi ralthuampi cun Madat khua in mi pakhat a ke bul ko an rak kap ngam zo ih, tuitum ahcun kebul ih nau kum 12 nute cu ralthuampi in a ngah ih, a nunnak a cem.

“CDF Mindat in Khawpi sung doawknak hram an thok dingin mipi lakah thu a lengih, mipi nan khawruah a har timi kan thei. Hivek thu lengvak men buaipi loin CDF Mindat sawn thuhla dik in sut theu dingah mipi kan lo theihter duh a si,” ti’n ca an suah.

Falam khalah an kap aw – Chin ramkulh Falam khawpi khalah khua sungih um mipi pawl cun June 28, zan nazi 11 hrawngah minute 30 sung hrawng meithal puak awn an thei ih, zopawl an kap aw timi lawngte an fiah thei lo.

Ziangahtile, zan a si tikah mipi hrang lengsuak ih va zohfel ding ngam a silo. Falam khawpi sungih um mipi pawl cun Falam khawpi Myomah palik sakhan kiangah meithal puak awn an thei ih, June 29 zing ahcun Myomah palik sakhan dunglam ih mipi inn hrekkhat cerek in a ngahmi sulhnu pawl an hmu. Falam khawpi sungih meithal puak ruangah mithi le hriamhma ngah an um maw timi cu felfai in theih a si hrih lo ih, dothlangnak pawlkom lam khal casuah an um hrih lo.

China Ah Chinpa Ruak An Hlon Men – Kan ram harsatnak ruangah le hnatuan ding um lo ruangah Chinmi tampi cu thupten China ram ah an lutih, a phunphun ah hna an tuan.

China ramsung an umnak ah Chinmi tampi cu a phunphun harsatnak an tongih, hnatuan ding nei lo ih buai khal an rak um ve. Hrekkhat cu China palik tih ah tlan le relh rero phah ih hnatuan an si.

A facebook ah khual vakpa ti ih ret aw khal a damlo ruangah Myanmar tlung ding a si ih, a rualpa cun pumpe aw in Myanmar tiang tlunpi a tum. Asinan, vansiat ah lamlak ah a nunnak a cem ih, mawtaw mawngtu cun phur peh paih nawn loin lamzin zirh a hlon men.

Tu ah Chinpa ruak cu a hnatuannak company lamah tlunpi sal ih, thaten vui a tul nan, amah thluntu a rualpa Biak Za Lal khalin sumpai a rak nei daih lo ruangah China ih um Chinmi pawl hnenah bomnak an dil ih, cutin a hnatuannak company lamah vuiliam ding a si.

Sakhan Cuh Aw Ah Ralhrang 50 An Thi – Karen ramkulh Myawaddy myone Wawlay myone ih ralhrang sakhan cu KNU ralkap le ralhrang ralkap pawl in nasa ten an cuh aw peh ih, June 29 ni tiang an do aw hrih.

Ralhrang sakhan cu KNU ralkap KNLA ,KNDO le PDF pawlin June 26 zan in an do thok zo ih, June 27 ni ah ralhrang pawl dung an sip thluh man nan, KNU lamin sakhan thianfainak an neih man hlanah ralhrang pawl cu anmah bawm dingih ra ralhrang dang pawl thawn mipum tam zetin an sakhan lamah an kirsal.

KNU lam khalin ralhrang sakhan an rak thianfai man lo ih, ralhrang pawl an rak kirsal tikah nasa ten an do aw. Doawknak ah khatlam khatlam in thi an um rero zo. Sakhan cuh aw in ni 4 an do aw thlangih ralhrang lam cun an sakhan humhim tumin raldonak vanzam tiang an hmang zo.

KNDO ralbawi cun “Tu ahcun ralhrang pawl sakhan kan lut thei zo ih, sakhan hrekkhat khal kan urkang zo. Asinan, ralhrang lamin Helicopter le vanzam an hman tikah doawknak a sosang tuk lai. A hleice in ralhrang pawlin tlunsang in ralthuam an thlak ih, ralthuampi thawn in kap ciamco. Raldonak vanzam pahnih khalin vei 10 tluk in kap. Leihnuai ahcun ralhrang pawl an dinhmun a se tuk zo ih, kannih lamin kan thianfai rero phah zo a si,” tin a sim.

Sakhan cuh aw ih doawknak ah ralhrang thi an tam tuk zo nan, KNU lamin a zat an fiah thei hrih lo ih, doawknak ruangah KNLA le KNDO lamin miraltha 8 an thi zo ve. Doawknak ruangah kiangkap khua mipi pawl cu khua ah um ngam loin an tlanih, an tlannak khalah meithal puak awn an theih phah ruangah lo lakah an relh phah rero.

KNU thuthang cun “Ralhrang sakhan cu kan la fel zo nan, thianfainak kan nei thei hrih lo. Tuhrih ahcun thianfainak nei peh ding kan si ruangah, ralhrang thizat le hriamhma ngahzat phuan a har hrih. Asinan, sakhan cuh aw ih, ni 4 sung kan doawknak ah ralhrang 50 tal cu an thi dingah kan ruat. Thianfainak kan neih tikah ralthuam kan lakmi le ralhrang thizat felfai kan theihmi cu kan phuang leh ding a si,” tin a sim.

ASEAN Palai Myanmar A Tlawng – ASEAN pawlkompi in Myanmar palai ih an ruatmi Prak Sokhonn cu June 29 ah Myanmar a tlawng leh ih, ni 5 sung Myanmar ah a caam ding.

kan dung khalah ASEAN palai Prak Sokhonn cu Myanmar ah a rak tlawng zo ih, hmaisa sawn Myanmar ih a tlawn tum ahcun kutlawng in a kirsal. Tuitum ah avei hnihnak Myanmar ram a tlawn caan a si ih, ralhrang pawl a be ding.

Tuitum ih Myanmar ram a tlawn caan ah ASEAN palai cun ASEAn le ralhrang ralkap ih remawknak 5 thuhla a relpi ding tlunah ASEAN in myanmar mipi harsa an bom thei dan ding pawl an rel ding thu ASEAN palai zung cun thu an suah.

ASEAN palai Prak Sokhonn cun tuitum Myanmar a tlawn caan ah Daw Aung San Suh Kyi ton rori a duh nan, ralhrang ralkap pawl cun thubuai nei lai hrimhrim ramdang palai zokhal kan tongter thei nawn lo tin an simfel zo.

ASEAN le ralhrang remawknak ahcun ASEAN palai in Myanmar ramsung a feh tikah a duhmi pohpoh a be thei ding, dothlengnak pawlkom zaten a be thei ding timi a tel nan, ralhrang lam cun cuvek rem an tisal lo ih, ASEAN thawn an remawknak 5 khal tutiang a pitlin duh lo.

Hivek a si hnu ahcun anmah ASEAN sung khalah an thupom dan le ruahdan a bangaw lo cio. A hleice in Myanmar ralhrang parah malaysia an thinheng zetih, NUG palai sawn biak an duh thlang. Cutilai in ASEAN sungtel dang pawl cun ralhrang biak sawn an duh hrih ve.

Tuitum ah ASEAN palai cun ralhrang thawn remnak an neihmi 5 pitlin dan ding le bomnak thu a relpi dingih, remnak 5 thu ahcun ralhrang lam tangdor an tum lo ruangah a duh vekin thil a fehpi thei zum a silo. Bomnak thu khalah ASEAN ih bomnak pawl cu ralhrang in mipi pe duh loin anmah ralhrang in an hmangral thluh ding phangtu tampi an um.

Hivek a si tikah Myanmar ram buainak fel dingin theitawk ih thazang suah ASEAN pawlkompi khal an thluak a buai ngaingai ih, Ziangtin Myanmar ram buainak an tifel thei ding timi thu felfai khal an nei thei hrih lo. Remnak 5 pitlin thei lo ding dinhmunah an um zo nan an feh tum dan lamzin thar an phuang hrih cuang lo cu a si.

China Palai Myanmar A Feh Ding – China ramdang palai Wang Yi cu Mekhuang tivapi sumdawnak thawn pehpar aw in tui zarh sungah Myanmar a tlawng ding tin ralhrang thuphuangtu Zaw Min Tun cun AFP thuthang a simthei.

Ralhrang in rampi thuneihnak an lak hnuah China cun thuneihnak latu ralhrang pawl cu veikhat hman thuneihnak latu tin an mawhpuh hrih lo ih, ziangkim ah an tuanpi sawn. Ralhrang ramdang palai khal China ah a rak tlawng zo ih, tuitum ahcun China ramdang vuanci rori Myanmar ah a feh ding.

Ralhrang in rampi thuneihnak an lak hnuah China cun ralhrang an dinpi ringring nan, Myanmar ah a rak lut dah lo ih, tuitum ahcun leitlun ramdang khal hmaisong loin China palai cu Myanmar feh ding a si. Myanmar a umsung ah zopawl a tong ding, ralhrang hotu Min Aung Hlaing thawn an tong aw pei maw tivek cu theih a si hrih lo.

Putin In Russia Suahsan Ding – Russia In Ukraine an do hnuah a hmaisabiknak hrang Russia president Putin cu khualtlawng in Russia ram a suahsan dingih, Central Asia ih Soviet ram pahnih tlawng ding a si.

President Putin cu Tajikistan le Turkmenistan ram ah tlawng ding a si ih, cumi hnuah Indonesia president Joko Widodo cu Russia khawpi Moscow ah thu a relpi bet ding. Russia president Putin a rualpi tha Tajik president a hmuh hnuah Azerbaijan, Kazakhstan, Iran le Turkmenistan meeting ah a tel ve ding.

Russia president Putin khual a tlawn netabik tum cu 2022, February thla thokah a si ih, China presdient Xi Jinping thawn Beijing khawpi ah an rak tongaw. Cumi tum ahcun Russia le China in tuantlang dan ding a phunphun lungkimnak hminkhen an rak ngan.

Tuitum khalah ram 4 aiawh le Russia president Putin tongaw ding an si ih, an lakah Iran cu leitlun theihhlawh Russia tuanpi ram pakhat an si ve.