ASEAN Ramdang Palai Meeting Ah Ralhrang An Sawm Lo

Bomb Cangsualnak Ah CDF 2 An Thi – Chin ramkulh Hakha Khawpi bazarthar vengah mipi cun bomb puak awn an thei ih, an zohfel tikah CDF pakhat bomb cangsualnak in a thi.

Hakha ih um pakhat cun “July 7, zan nazi 9 hrawngah Bazarthar veng lamah bomb puak awn kan thei ih, kannih mipi cun kan zohfel ngam lo. A hnuah ralhrang pawl an ra thlengih bomn puak ih thi mi pakhat ruang an sar. Bomb puak ih thi cu CDF sungtel a si tin ralhrang lamin thu an suah.

“Bomb puaknak hmun ahcun ruang pakhat an sar tlunah AK meithal zunkhat ,cerek bawm le cerek hrekkhat an sar tel. Bomb an kam tummi a puak sualin a lang. Zianghrangah bomb an kam tum timi cu kan thei ve lo. Hrekkhat cun bomb puak ruangah mi pahnih an thi tin an rel nan, ralhrang lam cun ruang pakhat lawng kan sar tin an rel ve. Mi pahnih an thi titu khal an um,” tin a sim.

CDF Thantlang khalin an sungtel pakhat ralram ih a nunnak a cem thu July 7 zan ah mipi theihternak an nei ve.

CDf Thantlang cun “Kan sungtel Salai Hram Cung ( kum 20 ) cu ralhrang pawl doin ram le miphun hrang a nunnak a hlan. Salai Hram Cung ih sungte pawl cu kan tuarpi ngaingai ih, kannih a damlai pawl cun ralhrang uknak kan do vivo ding a si,” tin thu an suah.

Ralhrang In Lamzawhnak Neitu Pawl Mawtaw In An Pah – Yangon ramthen Hlaing myone lamzin ih lamzawh duhphorhnak nei mino pawl cu July 7, zanlam nazi 3 hrawngah mawtaw ih an pah ih, mithi um loin mino pawl cu an tlansuak thluh thei.

Ralhrang in mawtaw ih an pahmi pawl cu yangon dothlengnak pawlkom mino pawl an si ih, lamzawh duhphorhnak nei lakin mi pakhat cu ralhrang pawlin an pah fuh ih, hriamhma naazet a tuar nan, a luat thotho.

Lamzawh duhphorhnak ih tel pakhat cun “Lamzawh duhphorhnak nei in kan vak ih, kan dunglam in mawtaw pakhat cun in pah. Kan lakin mi pakhat fuh zetin a pah ngah nan, kan zaten kan tlan thluh thei. In pahtu mawtaw cu ralhrang in mipi mawtaw vek an hmanmi a si ih, a hnu khalah ralhrang dang pawl cu mipi mawtaw vek hmangin an thleng bet ciamco. Asinan, zohman an kai ngah lo a si,” tin a sim.

Ralhrang Bawi An Kap That – Karen ramkulh Myawaddy myone Wawlay ih sakhan cuhawknak cu ni tampi a si zo nan, doawknak a cemfel thei hrih lo. Ralhrang mipum tamzet le BGF mipum 100 cun Wawlay ih an sakhan lam an pan betih doawknak a sosang hrih tin KNU ralkap Cobra Column cun mipi an theihter.

Cobra Column cun “Ralhrang ralkap tamtuk le BGF 100 hrawng cu Pha-lulay ah an finkhawm aw ih, Wawlay lam in ra pan. Ralhrang pawl cu July 7 ah Wawlay lamzin tluan an thlengih, kannih ralring zetih rak umcia Cohra pawlin kan rak kap. July 8. zinglam nazi 9 tiangah ralhrang bawi pakhat telin ralhrang 5 an thi timi kan fiah thei ih, ralhrang thi le hriamhma ngah an tam.

“Doaw rero lai kan si tikah ralhrang thizat cekci fiah thei dingin kan zuam rero lai. Ralhrang pawl hnenin MA zunkhat, cerek le bomb hrekkhat pawl kan laksak thei ih, kannih lam cu kan him. Ralhrang ralkap cun July 8 zinglam nazi 4 hrawngah raldonak vanzam in Likekaw ih kan umnak hmun in ra kap nan, kannih Cobra lam kan him a si,” tin thu an suah.

Kaya Ah Ralhrang 49 An Thi – Kaya ramkulh le Shan ramri ih zarh khat sung doawknak ah ralhrang 49 an thi tin KNDF cun July 8 zingah mipi theihternak nei in ca an suah.

KNDF cun “July hmaisabik zarh ah Loiko myone le Phekung myone ah ralhrang ralkap pawl thawn nasaten kan do aw. Ralhrang sakhan la tumin kan do tikah ralhrang pawl cun raldonak vanzam le ralthuampi an hmang ciamco.

“July 4 ah phekung ih ralhrag sakhan pahnih la tumin kannih KNDF, KA, PDF Phekung , PDF Moebe le SSRY pawlin ralhrang ralkap kan do. Asinan, ralhrang ralkap in ramthuampi an hmang ciamco ih, mipum tamzet thawn in kulh tikah kanmah lamin miraltha 11 an thi. Sakhan cuh aw ih doawknak ahcun ralhrang 40 kan that ve.

“July 6, zinglam nazi 6 hrawngah Loikaw myone ih ralhrang sakhan kan dosal ih, ralhrang lam cun raldonak vanzam le Helicopter thawn in kap ciamco. Cumi ruangah sakhan lafel man loin zinglam nazi 11:30 hrawngah dung kan sipsal. Sakhan la tumih ralhrang kan donak ahcun ralbawi pakhat a thi.Dung kan sip rualin ralhrang sakhan bawm dingih ra ralhrang pawl cu lamlak ah kan do ih, ralhrang 5 an thi. Doawknak ruangah ralhrang cun khuami pakhat an kap that.

“July 6 ah Nwetaung ih umkhawm ralhrang ralkap pawl kan kap betih, ralhrang 3 an thi. Cumi hnuah Bawlake lamzin ih ralhrang Check gate kan kap betih ,minute 30 sung kan doawknak ah ralhrang thi an um a si,” tin thu an suah.

ASEAn Ramdang Palai Meeting Ah Ralhrang An Sawm Lo – ASEAN sungtel ramdang palai pawl cu july 31 in August 6 tiang meeting nei ding an si ih, meeting ahcun ralhrang ramdang palai Wana Muang Lwin sawm a silo tin meeting kaihruaitu ding Combadia lam cun thu an suah.

ASEAN ramdang palai meeting ahcun ASEAN sungtel zaten sawm an si ih, ralhrang ramdang palai lawng an sawm lo. Myanmar ram aiawh in Politics ih tel lo mi pakhat sawm a sinan, hivek cu ralhrang lamin an pom lo ih, palai a thlah duh cuang lo. Ralhrang cun anmai palai rori meeting ah telter an tum nan, ASEAN lamin an sawm lo.

ASEAN ramdang palai meeting cu 2022, February thla khalah an rak nei zo ih, cumi tum khalah ralhrang palai an rak sawm cuang lo. Meeting kaihruaitu ding Combadia ramdang palai cu ASEAN palai dinhmun in kan dungah Myanmar a tlawngih, ralhrang pawlin an rak mikhual dan ah a lungawi lo.

Cambodia ramdang palai le ASEAN palai tuankhop Prak Sokhonn cun “Myanmar ralkap pawl cangvaih dan ka zoh tikah ASEAN thawn remnak kan neihmi 5 pitlin tumnak an nei hrih lo ih, an khul a fung tuk. Cumi ruangah ASEAN ramdang palai meeting ah sawm lo kan si. Remnak kan tuahmi an pitlin lo ahcun ASEAN meeting ah an tel thei dah lo ding a si,” tin a sim.

Cambodia ramdang palai cu kan dungah Myanmar a tlawngih, ASEAN le ralhrang tuahmi remnak 5 pitlin dan ding ralhrang pawl a relpi tlunah Myanmar mipi harsa bawm dan ding khal an rel. Ralhrang cun ASEAN thawn remnak kan neihmi 5 pitlin dingin kan zuam rero an tinan, a taki hmuh ding pakhat hman a um lo ruangah ASEAN an lungawi thei lo. Cumi ruangah meeting sawm lo phah an si.

Tuitum ih an tuah dingmi ASEAN ramdang palai meeting ahcun ASEAN sungtel ram 10 pawl ih palai sawm thluh an si bangin Australia, Canada, China, EU, India , Japan ,New Zealand, S.Korea ,Bangladesh, N.Korea, Pakistan le Sri Lanka pawl khal sawm an si ih, Myanmar thuhla nasaten rel an tum.

Japan Prime Minister Hlun An Kap – Japan ram Prime Minsiter hlun Abe cu July 8 zinglam nazi 11 hrawngah mipi hmaiih thu a simlai ah mi pakhat in meithal in a kap.

PM hlun Abe cu Japan rampi hrilawknak hrang mipi hmaiah thu a rel ih, thu a rel laifang ah mi pakhat in a kap ih, a awm rori ah a kap ngah. Japan PM hlun kaptu cu kilhimtu pawlin an kai cih.

Abe cu 2006 kum ah Japan Prime Minister rak tuan zo a si ih, cumi lai ahcun Japan ram thuanthu ah Prime Minister nauhak bik a rak si. Tuitum ah rampi hrilawknak hrang vote hawl in mipi pawl thusim a si ih, a thusimmi ngaitu mipi lakin mi pakhat cun a kap.

Buaipitu pakhat cun “Abe kaptu cu an kai ngah zo ih, thuhla an sut rero lai. Amah Abe khal sizung ah tuamhlawm rero lai a si ih,biak a theih hrih lo. A nungdam rori ding tikhalin rel a theih lo. Theitawk in kan buaipi rero lai a si,” tin a sim.

Sri Lanka In Russia Bomnak An Dil – Sumpai thu ah nasaten buai Sri Lanka president Rajapaksa cun an ram ih datsi le Yinan an ngah theinak dingah Russia president Putin cu lamzin hawlsak dingin bomnak a dil.

Sri Lanka president cun “Russia president Putin thawn kan be aw thei ih,kan ramih ttul tukmi datsi le yinan lakluh thei dan in tawlrelpi dingin bomnak ka dil. Culo ram pahnih pehtlaihawknak thuhla ah a phunphun in tuantlang kan man thu khal ka simthei a si,” tin a mipi pawl a simthei.

Sri Lanka ram cun buainak nasaten an tuar ih, an ram sungah datsi le yinan hman ding nei loin an um. Hivek ruangah Sri Lanka cun India le China cu anmah bawm dingin zangfah an rak dil zo nan, remnak relfai an nei thei hrih lo. Cumi hnuah Russia hnenah bomnak dil an si.