Sakhan Ih Kahawknak Ah KA/KNDF 10 Thi – Kaya ramkulh Bawlakhe myone Thailand le Myanmar ramri ih ralhrang sakhan cu February 27 lamah Kaya ralkap KA le Kaya miphun humhimtu KNDF in an rak kap ih, ralhrang sakhan an la thei nan, ralhrang in tlunzuang raldo in bomb an thlak ciamco tikah KA le KNDF sungtel 10 an thih phah ti’n Central Kereni tuanvo neitu cun March 9 lawngah mipi theihternak an nei.
Tuanvo neitu pakhat cun “Ralhrang sakhan cu kan la thei nan, ralhrang lamin tlunzuang raldonak 5 an hmang ciamco ih in kap ,bomb in thlak ciamco tikah KA le KNDF sungtel 10 an thi ih, miraltha 3 khal hriamhma naatuk an ngah. Sakhan kan lak fel hnuah ralhrang sakhan sungih ralthuampi kan thiar laiah ralhrang cun tlunzuang raldonak in bomb in thlak.
“Ralthuampi a rit tuk tikah duh vekin kan cangvai thei lo. Hriamhma ngah bese tuk 3 an um ih sizung ah tuamhlawm rero lai an si. Culo midang 15 khal hriamhma tenau an ngah. Miraltha 10 kan thlahliammi pawl cu KA sungtel 8 le kNDF sungtel 2 an si. Miraltha pawl cu March 6 ah kan vuiliam zo. Ralhrang sakhan cun ralthuampi pakhat, RPG zun7,meithal zun8 le cerek pawl kan laksak thei a si,” ti’n a sim.
Burma Act Thu Ah US le CRPH Be Aw – US in Burca Act hmangih Myanmar mipi le pawlkom pawl bomnak an pek dingmi thuhla thawn pehparaw in CRPH Chairman AUng Kyi Ngyut le US ramdang palai thuron petu Derek Chollet tei pahnih tongaw in thurel tlangnak an nei.
US palai le CRPH Chairman cu March 9 ah tongaw an si ih, Burma Act a takin pitlin a si theinak dingah thurel tlangnak an nei. US cun 2023 kum sung hrang ramdang sumpai an hman dingmi ah Burma Act timi an rak telh ih cumi ahcun Myanmar mipi le dothlengnak tuahtu pawlkom pawl hrang bomnak phunphun a um.
CRPH cun “Ram buainak ih raltlan pawl a takin bomnak pek an si theinak dingah,NUG cozah siseh tlangpar ralthuamkai tlunah CRPH khal telin dothlengnak hrang tulsammi bomnak pek an si theinak dingah, Myanmar mipi in Democracy hrang theitawk an zuam reronak ah an hrang tangkai zetmi bomnak pek a si taktak theinak dingah tivek pawl cu rel a si,” tin thu an suah.
Burma Act hmangih US relcatmi pawl cu “Zalennak hrang zuamtu Myanmar mipi pawl kan dinpi vivo ding. Ralhrang uknak do rerotu NUG, NUCC, CRPH le CDM pawlih zuamnak khal kan theihpi vivo ding. Mipi hrilmi in cozah an tuan theinak ding le tlangpar miphun pawlin Federal Democracy a takih an ngah theinak dingah theitawk kan suahpi ding. Ralhrang dinpitu China le Russia in mawhphurhnak la ngam dingin kan nor ding. Ram buainak ruangih raltlan pawl bomnak kan pe vivo ding. Ram buai ruangih kaihmi thawngtla pawl a suah theinak ding khal tan kan la vivo ding.
“Ramsung ramleng ih Myanmar raltlan pawl a takih bomnak an ngah theinak dingah theitawk kan zuam vivo ding. Ralhrang le an tuanpi pawl khal hremnak kan pe vivo ding. Ralhrang hremnak kan pekmi cu kum 8 tiang daih a si ih, hremnak phelhsal dingin President hnen thlen a tul. Ralhrang in ralthuam an ngah theilonak dingah theitawk kan suah ding. Ralhrang uknak do rerotu PDF le tlangpar ralthuamkai pawl cu ralthuam silo, thiamnak le santhar thilri tha pawl thawn kan bawm ding. Tuih kan relmi pawl hi 2023 in 2027 tiang sumpai hman dingmi cazin ah telh thluh a si,” tin thu an rak suah zo.
China In Anmah Ngainep Lo Dingin US Theihter – US Hourse Speaker le Taiwan president an tongaw ding tin thu a suak ih China lam cun ziangruangah nan tongaw tum, simfiangnak nei uh tin Taiwan an rak phut.
China cun Taiwan hnenah US palai thawn tonawk an tumnak san simfiang dingin an phut nan, Taiwan lamin zianghman simfiangnak neih an tum lo. Cutikah China cu US parah an thinheng zetih anmah ngainep men lo dingin US an theihter.
China cun “Kan ram le miphun humhim dingin kan cahnak le kan neihmi ralthuam pawl hi ngainep men hlah uh. Ziangahtile, kan ram le miphun humhimnak hrang ziang khal kan tuah ding. Kan ram sungah buainak ah ramdang telhlah uh,” China ramdang palai a tongsuak.
US, CHina le Taiwan pawl hi caan reizet sung buai rero zo an si ih, tutiang cu a takin an kap aw hrih lo. Nikhat khat ahcun an kap aw leh ko ding titu cu an tam. ZIangahtile, an buainak a rei ih, ralthuam phorhsuaktu an um leh ko ding tin mi tamsawn cun an sim.
Leave a Reply