Cangvai Lo Ih ,Thusuah Men Dothlengnak Pawlkom An Um – Yangon PDF cun tuitum dothlengnak ah a takin leihnuai ah cangvai silo ,Online ah thusuah in rak cangvai rero an um tin mipi simtheihnak an nei ih, cuvek lakin mipi fimkhur dingah an theihter.
Yangon PDF cun “Kanmah vekin ralhrang do dingih dinmi pawlkom tampi an um ve. Kannih khua sungih cangvai pawl cu ralhrang umnak ih cangvai kan si tikah kan himnak kan ngai thupi ih, kan tuarlonak dingah theitawk kan zuam.
“April le May thla hrawngah Special Ninja Force timi pawl cun online ah thu an suah rero ih, mipi lakah an darh nasa. Asinan, an thusuahmi rinhlelh a um ruangah kannih Yangon PDF komkhawm cun an cangvaihnak pawl kan zingzoi ih, a takin rak cangvai lo thusuah rero men an si timi kan fiah zo.
“Cangvaih tikah kan himnak ngai thupi ding a si ih, ziangkim online ih thlah thluh a him lo. A tul lo tiangtiang Online ih thlah a si tikah kan buai phah sawn ih,harsatnak in pe. Curuangah kanmah a takih cangvaitu pawlin thu kan suahmi a silo ahcun online ah duhduh in thu rak suah lo sehla a tha.
“Ziangahtile, online ah duhduh in thu kan tarlang asile a takih cangvaitu mipi ralkap pawl an him lo phah. Curuangah dothlengnak ih teltu nan zaten thuthang dik lo thlah lo dingin, mipi beiseinak dik lo pe lo dingin, a kalhzawngin thu thlah lo dingin kan lo sawm duh a si,” tin yangon PDF komkhawm 5 cun thu an suah.
Lawng Siat Ah Rohingya Ruang 6 An Hmu – Ayeyarwaddy ramthen Kayat Kyikyuan tipi ah kiangkap mipi cun tipar ih lawng siat pakhat an hmuh thu palik an simthei ih, palik lamin an cek tikah Lawng par ahcun Myanmar rammi sinak nei lo ,Rohingya mipum 65 an hmu ih, an lakah mi 6 cu lawng parah thi cia in an rak um.
Mithi 6 lakah nunau pathum le mipa pathum an telih, nungdam in Rohingya mipum 59 an kai. Kaihmi Rohingya mipum 59 lakah mipa 36 an um ih, nunau 29 an um. An zaten tirawl thitha ei lo ,thazang nei lo, cak lo zet hlir an si ih , an harhdamnak cek a si thluh hnuah daan vekin an tlun thu an relcat sak ding tin ralhrang cun thu an suah.
Ralhrang ralkap cun Myanmar ram sungah Rohingya miphun an um lo, Rohingya miphun hmin cun zohman kan pom lo, kan cohlang dah lo ding tin leitlun an simthei ih, Myanmar rammi sinak nei ramdang ih raltlan pawl cu an cohlan thei thu UN an rak simthei zo. Hiti laiin NUG cun Rohingya pawl Myanmar ih an tlun theinak dingah thektawk an zuam rero lai thu Rohingya pawl an rak tiam ve.
Russia le China In Raldo Zirtlangnak An Thok Ding – Russia cun thu an rak suah rero zo bangin China thawn a takin raldo zirtlangnak an neih thu leitlun theihternak an neisal ih, September 1 in 7 tiang ram pahnih raldo zirtlangnak nei ding an si.
Russia le China cun Russia tipi le Japan tipi ramri pawlah raldo zirnak an nei tlang tumih, ralkap thawng 50 hrawng an tel ding tin thu an suah. Raldo zirtlanngk ahcun ralthuam 5000 unit, vanzam 140, lawng 60 tlunah thildang phunphun khal hman an tum.
Russia le China in raldo zirtlangnak an neih tummi ahcun India, Laos, Monglia, Nicaragua le Syria ram pawl khal an tel ding. Raldo zirtlangnak cu Russia in an hoha dingih, mah le mah humhimnak lam nasaten zir an tum tin thusuah ahcun an tarlang.
Tu ah Russia cun Ukraine an kap peh rero lai ih, ralkap ting 1 hrawng lakbet an tum. China cun Taiwan umdan an zohthup ringring ih, China in an suak dah lo ding tin an simthei. India cu leitlun ah palap ram tih relhlawh a si ih, ziangram khal tuanpi vivo thei ram pakhat an si.
Leave a Reply