CDF Mara le Mara Army Buainak Hrampi

CDF Mara le Mara Army Buainak Hrampi – Ralhrang in rampi thuneihnak an lak hnuah CDF Mara an rak ding ve ih, cumi hnuah a hlanpi ih an rak din dahmi Mara Army timi cu thar thlawhsalin an din ve. Neta ahcun Maraland Defence Force tin hmin an thlengih, hmunram cuh aw in CDF Mara le Mara Army cu vei 3 an kap aw zo.

Hivekin CDF Mara le Mara Army an doawknak san cu Mara Army lamin an thuphuangtu Khaisa thusuh a si ih, bulpak huatawknak ruangah doaw vekin a sim.

Mara Army thuphuangtu Khaisa cun “CDF Mara le Maray buainak hrampi cu bulpak thu ruangah a si. CDF mara ih hotu le Mara Army ih hotu lakah khat le khat zuamawknak a um in a lang. CDF Mara ih dunglam ah Dr.Sasa tivek dothlengnak ih phur thar pawl an si. Mara Army cu kan dinnak a rei tuk zo ih, komkhawm thluh dingin thu kan rel tikah tlunlam hotu pawlin an lungkim lo.

“Hivekin kan buainak khal tlunlam hotu veve pawl ruangah a siko. Tui hnuih kan buai ciamconak san ih lang cu hmaisabik kan buai tumih CDF Mara lam thi pakhat a um tikah a sungte pawl an lungawi thei lo ih,buainak an thar thawhsalin a lang. Khatlam ahcun anmah CDF Mara rak dinpitu an um vivo tikah buainak ih a luarlam sawn ah a feh.

“Tuhrih tiang ahcun vei tampi tongaw dingin kan rel nan, kan tong aw thei hrih lo ih, zianghman remawknak felfai khal kan nei thei hrih lo. Buainak a reh ding cun kan tonawk rori a tul. Tonawk lo cun buainak cemter a theih lo. Kan buai vivo cun a tuartu,a taptu le tlantu kan zatein Mara hlir thotho kan si. Hivek buainak hi Chin ramkulh sungah thleng nawn lo sehla kan duh.

“Tu ahcun kanmahten kan biakawk thei lo ruangah le kan tonawk thei lo ruangah Chin ramkulh sungih um ralthuamkai pawlkom pakhat CJDC in zingzoinak an nei ih, an tawlrel asile a thazet ding. Zingzoinak an neih tikah zalen zetin an zingzoi thei ih, buainak hram an theihsuak a tha. Mara mipi duhdan khal sut sehla, cutin thuhla ziangkim an theihfeng hnuah remnak tuahpi theitu ding an si.

“Chin ramkulh sung hmundang ah kanmah Mara vekin hnamdang tla an buai ciamco pang ding tin tufang cu ka thinphang tuk. Curuangah kannih cun remawknak kan duh, tongaw dingin sangka kan ong, buainak cinfel rori kan duh a si,” tin a sim.

Hakha Ah Komkhawm Zung A Kang – Chin ramkulh Hakha khawpi ih um mipi pawl cun October 18, zinglam nazi 1 hrawngah puak awn phunphun an thei ih, a hnu reilo ah komkhawm zung a kang cih tin an sim.

Hakha ih um pakhat cun “Zinglam nazi 1 hrawngah puak awn phunphun kan thei ih, cumi hnuah komkhawm zung a kang. Ralthuampi puak awn a ring ngaingai ih, inn tivek khal a hnin thei. Khat le khat an kap aw maw? ralhrang pawl anmahten ralthuampi an kap ciamco sipei timi cu a san kan thei lo.

“Komkhawm zung khal a sung lam tiang a kangih, thilri tampi a kangsiat phah men ding. Tu ih komkhawm zungpi cu myone fimzirzung, lah-wah-kah zung le uknak zung le palik zung le sipin zung pawl ih thilri retnak hmun asi.

“Puak awn kan theih hnu reilo ah komkhawm zungpi a kangih,a hnu reilo ah mitat mawtaw khal a thleng cih. Asinan, innpi a rak kangse man zet. Ziangtin a kang timi cu kannih mipi lamin kan thei hrih lo a si,” tin a sim.

UN Palai In Ralhrang Cangvaih Dan A Phuang – Myanmar UN palai U Kyaw Moe Tun cun UN thurelnak ah Myanmar ralhrang pawlih cangvaihnak diktak pawl simnak a nei ih, ralhrang thurelmi hrimhrim zum lo dingin a theihter.

U Kyaw Moe Tun cun “Ralhrang pawlih cangvaihnak taktak cu internet an phit, phone line an phit, duhduh in mipi an kai, thuthanglatu pawl tiang an kai ih,an him lo. Cumen an duhtawk lo ih, anmah ralhrang cun thuphan , thudik lo phunphun an thlah rero men. Ahleice in ramsung ahcun mipi in thudik thei lo dingin anmah ralhrang thuthang lawng TV le cahnah ah suah a si thlang.

“Mipi lamtang thuthang le dik zetih thuthang ngan pohpoh an kaiih, hremnak an pe. Thuthang suahtu 12 khal an kharsak zo ih, thuthanglatu 142 an kai zo. Hivek a si tikah Myanmar ram sungih thilthleng taktak ramleng hrang theih a har thlang. Ziangahtile , ramsung thuthang suak lo dingin ralhrang pawl nasaten an zuam.

“Duhtawk ih mipi an ti duhdahnak le mipi dekcoknak pawl lang thei lo dingin Internet an phit ih, phone line tiang an phit theu. Myanmar mipi in zalen zetin ausuah theinak an nei nawn lo. Kan ram dinhmun cu nan theih dan le na hmuhdan hnakin a rapthlak sawn ih, a sungih um mipi pawl cu an tuar tuk lawlaw. Curuangah ralhrang pawl thu hrimhrim cu zum hram hlah uh,” tin a sim.

Russia In Ukraine Khawpi An Kap – Russsia le Ukraine buainak ah remawknak a um thei hrih lo ih, Russia cun Ukraine khawpi lam an kap peh hrih.

October 17 zingah Russia cun Ukraine Khawpi bik Kyiv cu drone hmangin an kap ih, innpi siat phah le innkang phah a um. Tuitum cu Russia lamin Drone an hman tikah mipi thih phah tivek cu an um lo. Asinan, inn tampi a siat phah ih, kiangkap mipi pawl cu hmunhim ah an tthawnter.

Russia cun October 10 khalah Ukraine khawpi Kyiv cu Missile in an rak kap zo ih, himi tum ahcun mipi 19 an thih phah. Russia president Putin cun “Kan ram an kap ngam ve a si ahcun a thungrulnak an dong hrimhrim ding a si,” tin a sim.

October 8 ah Russia ram Crimea hmunpi lilawnpi a rak puak ih, Russia lam cun Ukraine lam cangvaihnak a si tin an puh. Cumi ihsin Russia cun Ukraine khawpi lam an kapsal. Russia lamin tlunsang raldonak hlir an hman thlang tikah Ukraine cun an tuanpi pawl hnenah tlunsang ralkhamnak pe dingin leitlun an rak dil rero ve.