CDM Hmin Cazin Ih Tel Pawl Ramleng Suah An Kham

CDM Hmin Cazin Ih Tel Pawl Ramleng Suah An Kham – Ralhrang ralkap cun Yangon Airport ah ramdang zam ding pohpoh an cek ciamco ih, CDM tuah zokhal ramdang an zamter lo ih, an kai. Kaihmi lakah sualnak nei cu ralhrang mihremnak hmunah an kuat hngal ih, CDM tuah men cu sumpai tampi an dil tin a tongtu pawl cun an sim.

Thuhla theitu cun “Tu ahcun Yangon Airport ah ceknak thar an nei ih, cumi ceknak ahcun ramsung hmun tinkim ih CDM tuah hmin cazin le hmatpungtin an rak nei thluh. Cutikah CDM tuah hmin cazin ih tel pawl cu Airport in ramleng feh a ol nawn lo. CDM tuah khalah ram buainak ah ziangtin a tel timi cu a zoh uluk cuang.

“An ceknak computer sungah ziangkim an rak nei thluh zo. CDM tuah pawl ih hmin, nulepa hmin, suahni thla , hmatpungtin le umnak khua le hmun tiang an rak nei thluh. CDM tuah menmen ansile thla 2 hrang covid 19 sumpai cawimi na pe hrih maw tin an sut ih, sumpai tampi kuantermi an um. CDM tuah tlunah dothlengnak ih tel pawl cu ralhrang mihremnak hmunah an kuat cih. Vanzam a zam ding tiang an cek ih, tu ih cozah hnatuan pawl hmin cazin khal an nei thluh ih, an cek thotho a si,” tin a sim.

Umdan cu ralhrang pawlin CDM tuah hmin cazin an neih thluh tlunah tu ih cozah hnatuan pawl ih hmin cazin an cek cih ih, cozah hnatuan lakin thupten ramdang tlan tum khal an kham thotho in a lang. Curuangah, ralhrang hnuai ih cozah hnatuan pawl khal an duhduh in ramleng an suak thei nawn lo ih, an hmailam a pit lawlaw.

CDM tuah pakhat cun “CDM ka ti ih, ramdang feh dingin Passport ka tuah ve. Passport cabu cu ka ngah ih, curuangah ramdang ka feh thei khal ka zum aw. Asinan, ramdang ka feh thei lo. Airport ah in rak cekih, CDM cazin pawl an rak nei thluh tikah in kai. Bangkok feh tum ka si ih, CDM cazin ih ka hmin an hmuh veten ka passport in laksak ih, ralhrang mihremnak hmunah in kuat hngal.

“Keimah lawng ka silo ih, ramdang suak tum CDM tuah an kaihmi an tam thlang. Cozah sumpai kan rak cawimi pawl cozah hlunin in ngaitham nan, ralhrang pawl cun in kuanter. Cumi kan kuan thluh hnu khalah nan hna nan kaisal ding in ti. A pahnih in kan el asile thubuai kan lo tuahsak ding tin in hro. Curuangah, duhhril ding dang kan nei lo ih, cozah sumpai kan cawimi cu kan pe ko ding tin lethmat kan ngan. Tutuang cu ralhrang hnuaiah ka lutsal hrih lo.

“Harhdamnak zungih hnatuan pakhat tla cu na hna tuan caan kim hlanah na suak tin ting 100 an kuanter. Anih cun hna ah ka lutsal ko ding tin a sim nan, ting 100 cu a dil thotho. Curuangah, CDM tuah zokhal a hlan vek a si nawn lo, Passport cun ramdang suah a theih nawn lo tluk a siko. Vanthat ah pakhat hnih rak feh thei khal an ummen thei nan, a tamsawn cu Airport ah in kai. CDM cazin an nei thluh ih, ramleng suak ding pohpoh an cek thlang a si,” tin a sim.

Ralhrang Anmah Le Mah An Kap Aw – Mandalay ramthen Maya Aungmi meisa cetih duty hnatua ralhrang senthum pahnih tongkam an el ih, meithal an phorhsuak tikah ralhrang senthum Kyaw Myo Tun a thih phah tin ralhrang thu a suak.

October 9, sun nazi 2:20 hrawngah senthum Kyaw Myo Htun le Senthum Myat Noe Aung tongkam el aw in an kap aw ih, senthum Kyaw Myo Tun sawn a hmunah a thi.

Thuhla theitu cun “Senthum Kyaw Myo Thun sawn hi upa sawn a si ih, tongkam an elawk tikah nauta sawn senthum Myat Noe Aung in Senthum Kyaw Myo Tun a kap that. Tu ahcun senthum Myat Noe Aung cu a ralkap tuanpi a kah that ruangah an kai ih, an khum hrih. Senthum Kyaw Myo Tun ih ruang cu ralhrang hmunpi sungah vuiliam men tum. A sungte pawl cu hmundang ih um an si ih,tutiang cu a sungte pawl khal an simthei hrih lo a si,” tin a sim.

Ralhrang in rampi thuneihnak an lak hnuah anmah ralhrang le ralhrang karlak ah buainak a thleng tam ih, an kap that aw rero zo. Asinan, a tamsawn cu ralhrang pawlin thuhla an suakter duh lo ih, mipi theih lomi khal a rak um. Thuhla darhsuak pawl cu kiangkap mipi theih ban cin le ralhrang sungih mipi lamtang pawl relsuah lawngin a si.

AA le Ralhrang An Kap Aw Peh – Rakhine ramkulh Myuak Oo myone le Maungtaw ah AA le ralhrang an do aw peh ih, doawknak a sosang tin khuami pawl cun an sim.

October 9 khalah Myauk Oo myone ah AA le ralhrang an rak kap aw zo ih, naivai siloin ralthuampi an hmang ciamco tin khuami pawl cunan sim.

Khuami pakhat cun “Zan nazi 7 hrawngin an kapaw thok. Ralthuampi le ralthuamte khal an hmang. Zinglam nazi 4 hrawng tiang puak awn phunphun kan thei. Tuitum cu ralthuampi le ralthuamte in an kap aw ciamco nan, mipi umnak khua sungah ralthuam a tla hrih buang lo. Ralthuampi vei 3 hrawng a puak kan thei,” tin a sim.

October 10 zing ahcun AA le ralhrang pawl cu Maungtaw myone ramri sakhan ah an kapaw ih, AA in ralhrang sakhan lak an tum ruangah doawknak a sosang tin khuami pawl cun an sim.

Khuami pakhat cun “AA in ramri ih ralhrang sakhan la tumin an kap. Thenkhat cun AA lamin ralhrang sakhan an lafel zo tin simtu tla an um nan, AA lam thusuak a um hrih lo tikah felfai in rel a theih lo. Doawknak hmun cu hmundang ih ralhrang pawlin ralthuampi in an rak kap ciamco ve. Doawknak a sosang tukih, thi le hriamhma ngah tivek cu kannih mipi in kan thei ban ve lo a si,” tin a sim.

Ralhrang in rampi thuneihnak an lak hnuah AA le ralhrang pawl an do aw cih hngal lo ih, hmunram cuh aw in Rakhine ramkulh sungah uktu , thuneihtu si an rak tum veve. A tawp ahcun AA lam duhdan ralhrang lamin rem an tisak lo tikah an kai aw, an hro aw ih, tu ahcun a takin an kap aw rero zo. AA le ralhrang doawknak ruangah Rakhine ramkulh le Paletwa peng sung ahcun raltlan an tam deuhdeuh tin buaipitu pawl cun an sim.

RCSS In Tlangpar Ralthuamkai Pawl Biak An Duh – Ralhrang ralkap thawn vei hnih rak tongaw zo Shan ralthuamkai pakhat RCSS cun tlangpar ralthuamkai dang pawl biak an duh thu an simthei ih, ralhrang khal remnak tuahpi, tlangpar ralthuamkai khal remnak tuahpi tivekin cangvaih an tum a bang.

RCSS cun “A tufang Kan ram buainak ruangah ramsung ramleng ah raltlan an tam deuhdeuh ih, kan ram sipuazi dinhmun khal a tlase deuhdeuh. Thlairah le thlaihnah pawl khal man an nei nawn lo ih, eiin le sinfen kan harsat tlunah duhvekin khualtlawn sukso a theih nawn lo ih, mipi kan harsa deuhdeuh.

“Hivek dinhmun ah kannih Shan ralthuamkai RCSS cun a tonten tongaw ih, a biakten be aw in remnak tuah duhtu kan si ih, cuvek cu kan fehpi. Tonawk le biakawk in ram buainak ah remnak a umthei kan zum ih, cumi cu kan lamzin zawhmi a si.

“Curuangah kannih RCSS cun October 10 in 2023 February 10 tiang ramsung hmun tinkim ih tlangpar ralthuamkai pawl thawn remawknak tuah ih, tonawk kan duh. Kannih RCSS cun pawlkom zaten kan tongaw ih, thutha kan rel lawngah mipi lungrualnak le Federal Democracy uknak kan ngah thei ding timi kan zum a si,” tin thu an suah.

Shan ralthuamkai RCSS hi anmah Shan miphun thotho SSPP thawn khalin do aw phahphah an si ih, ralhrang thawn remawknak nei dingin an be aw rero zo. Cumi hnuah tlangpar ralthuamkai dang pawl khal remnak tuahpi tum an si.

Russia Ruangah Ukraine Mipi 17 Thi – Russia cun an ramsung Crimea ih lilawnpi a puak hnuah Ukraine ram sungih Zaporizhzhia khua an kap ve ih,mi 17 an thih phah tin Ukraine cun thu an suah.

Zarhte ni ah Russia ram sung Crimea ih lilawnpi a rak puak ih, Ukraine lamin an kap si ding tin thu a suak. Cumi hnuah Russia pawl cun Ukraine khawpi Zaporizhzhia cu Missile in an kap ciamco hngal ih, mipi 17 an thi zo tin Ukraine lam cun an sim.

Ukraine president Zelenskyi cun “Russia lamin mipi umnak khawpi an kap ih mi 17 an thih phah. Mithi an tam tlunah hriamhma ngah 49 tluk an um. Hivek cu suanhmang le dankalh cangvaihnak a si ih, an tuahmi parah tuanvo la ngam ding an si,” tin a sim.

Russia in Zaporizhzhia khua Missile ih an kah ciamco ruangah khawpi sungin inn hrekkhat a siat phah ih, innpi 50 tluk umnak tlak nawn loin a siat. Zaporizhzhia khawpi ih a hlan khalah Russia pawlin an rak kap rero zo ih, umnak khal a tlak nawn lo tin an sim.