A tufang hi China ramdang palai Myanmar ih a umlai caan fang a si ih, ralhrang ramdang palai thawn khalin an be aw zo.
China ramdang palai Wang Yi le Ralhrang ramdang palai Wana Maung Lwin tei pahnih an tonawknak ahcun China ramdang palai cun ralhrang palai hnenaah ram buainak ih tel zaten thurelpi dingin a simthei.
Hivek cu ralhrang le ASEAn remawknak 5 sung khalah tel a sinan, ralhrang lamin an thlun duh lo. Tu ah ralhrang rualpi tha China rori in ralhrang hnenah ram buainak ih tel zaten be dingin thu an theihtermi cu ralhrang lamin an thlun pei maw tikhal theih a si cuang lo.
China ramdang palai Wang Yi cun ralhrang ramdang palai Wana Maung Lwin hnenah “Kannih China cun Myanmar ram buainak ah teltu zaten thawn thureltlangnak nei uhla kan duh. Ram buainak fel lohli dingin nan cangvaih ding kan duh. kannih China cun Myanmar ram ah daihnak a um ding kan duh bik a si,” tin a sim.
Ralhrang lam cun China ih thuron pekmi thawn pehpar aw in zianghman an sim hrih lo. Asinan, ralhrang pawl cun NUG, CRPH le PDF pawl thu kan relpi thei lo ih, Daw Aung San Suh Kyi khal thubuai nei lai a si ruangah ramdang palai zohman kan tongter thei lo a si tin thu an suah rero zo.
China ramdang palai le ralhrang palai cu Pagan ah tongaw an si. Mekhuang tivapi thawn pehparaw in ram 6 cu ni 3 sung meeting an neih hnuah China palai le ralhrang palai cu a hranten an tongaw. China cun Myanmar ram buainak ih tel zaten thu nan relpi ih, Myanmar ram buainak a zia-um vivo asile UN le ASEAN pawlkom khalah hmuar nei sawn ih tel thei dingin kan lo bawm ding a si tin ralhrang an tiambet.
Myanmar ih China Embassy cun “China ramdang palai le ASEAN palai cun ralhrang pawl hnenah rampi thuneihnak cu mipi hnenah pesal dingin an forh rero ih, Myanmar rampi a thatnak ding an buaipi rero a si,” tin thu an rak suah ve.
Ralhrang Bawi 3 An Kap That – Karen ramkulh Myawaddy myone Wawlay hmunram ih ralhrang sakhan cuhawknak ah KNU ralkap KNDO cun ralhrang bawi 3 an kap that tin mipi theihternak an nei.
KNDO in ralhrang bawi 3 an kah thatmi pawl cu anmah ralhrang dinpitu pawl cun miraltha , a tawp tiangin raldotu an si tin upatnak an pe ih, ralhrang bawi 3 an thih thu an rak tarlang rero ve.
Wawlay hmunram ih ralhrang sakhan cuhawknak cu June 26 in an rak do aw zo nan, tuini tiang hmunram thianfainak an nei thei hrih lo ih, an do aw peh rero hrih. KNU lamin ralhrang pawl umnak Drone hmangin an zoh tikah ralhrang thi an tam ngaingai ih, an tlu teptep. Asinan, a hmunah feh in an zohfel thei hrih lo ruangah ralhrang thizat cu an fiah thei hrih lo.
Drone thawn an zohfelnak ih an hmuhmi ralhrang thi pawl cu raldo ih relh ralhrang an silo ih, ralhrang thi pawl taktak an si timi cu an umdan in a theihtheih tuk. Hrekkhat ralhrang thi pawl cu ralthuampi ih tlak ruangah thi an si ih, an nen aw teptep ih, hmunkhat ih thi an tam.
Ralhrang sakhan cuh aw ih doawkak ah ralhrang umcia pawl bawm dingih feh ralhrang dang khal KNDO pawlin lamlak ah bomb an rak puah ih, ralhrang 20 tlun an thi tin thu an suah. Doawknak ahcun KNU lam khalin thi an um hnuaihni ve zo.
Biakinn Sungin Jesuh Rat Ding Caan An Hngak – Negeria ram Ondo State sungih biakinn pakhat ah mipi 77 hrawng cun biakinn sungin Jesuh rat ding caan an rak hngak ringring ih, hrekkhat cu thla 3 sung an khum aw zo.
Nigeria palik cun “Biakinn sungih khum aw lakin hrekkhat cu April thla thokin an rak khum aw zo. A san cu Jesuh a ra ding tin simtu an nei ih, an lakah nauhak khal an tel. Nauhak pawl cu tlawng khal kai peh nawn loin Jesuh rat ding an rak hngak ve. Cucu, tu ah kan runsuak hai zo a si,” tin a sim.
Nu pakhat cun a fate tlawngkai inn tlun ti a neih nawn lo ruangah a fate hlo thu cu palik hnenah a theihter ih, palik pawlin an hawl. Neta ah Biakinn ah an umkhawm timi thu a suak ih, palik pawl cun Believers Biakinn sung an dap ciamco ih, mipi 77 umkhawm an hmu.
Cuveten palik pawl cun Pastor David le amah bawmtu an kai cih ih, an runsuahmi mipi 77 pawl khal tuanvo neitu pawl hnenah an ap cih. Pastor le a tuanpi pawlin minung ruk-hlo tumnak an neih le neih lo khal zingzoi an si ding. Ziangahtile, Nigeria ram ah minung rukhlomi tampi an um.
Biakinn ih khum aw pawl thuhla an suh tikah an pastor cun 2022, April thla ah Jesuh a ra ding tin a sim hai ih, April thla ih Jesuh a rat lo tikah 2022 September thla ah Jesuh a ra rori dingin a sim nonsal hai. Cumi ruangah Pastor ih thusim zum pawl cu Biakinn sungin Jesuh rat ding caan rak hngak an si.
Palik pawlin an thuhla theisuak lo hai sehla September thla tiang Biakinn sungah khumawk an tum ih, cumi ah Jesuh a rat cuang lole Pastor in a thlah hai ding maw, a thla a tthawn lala ding timi cu theih a silo.
Leave a Reply