Ralhrang ralkap in rampi thuneihnak an lak tikah Myanmar mipi lamtang ramleng pawl cun Myanmar ah sum tuahnak zianghman an nei duh nawn lo ih, Myanmar ram an suahsan celcel.
Asinan, China cun Myanmar ram suahsan an tum lo tlunah ramdang suak pawl ih hmun-awl khal luah vivo an tumih, ralhrang thawn nasa ten sum tuahnak ah tuantlang vivo an tum tin Myanmar ram sum tuahnak lam theifiangtu U Than Soe cun a sim.
U Than Soe cun “Kan ram buainak ruangah ramdang company tamzet cun kan ram an suahsan rero zo ih, hmun-awl a tam. Hmun-awl pawl cu ram buainak ngaihsak lo ih, ralhrang dinpitu ramdang pawlin luahkhat vivo an tum. Cucu,sumpai tuahnak lamin kan thlir asile an hrang caantha rori a si ve.
“China in ramleng ih sumpai an tuah dan ah dun le daan an nei ciamco lo. Minung covo le buainak tivek an ruat tel lo. Annih China pawl ih zohmi cu kan ttuan ding, ziangzat kan hlawk ding tivek lawng an zoh. Curuangah, China cun hmun tinkim ah sum tuahnak an neih phah.
“Myanmar ah ziangvek cozah khal ding haisehla China cun Myanmar ram sungih sumpai a tuah thei dan lawng a ruat. Ziangvek cozah an ding timi an buaipi lo ih, an ngaihsak lo. An ram hlawknak ding le sumpai an ngahnak ding lawng an buaipi ih thupi bik ah an ruat.
“Tuvek caan ah ralhrang khalin anmah tuanpi duhtu lawng an zoh ve ih, an lamtang duhzulh vivo an tum ve. Cutikah buainak ngaihsak lo, ramleng lak vivo tum China hrang ahcun Myanmar ram cu an suahsan siang lamlam a si,” tin a sim.
Kan dungah ralhrang lamin ramdang vuanci Wana Maung Lwin khal China ah a feh ih, China thawn tuantlang vivo dan ding an rel. Cumi ahcun China lamin Yuan 650 Million tluk cemin Myanmar an bom ding thu an rak simthei. Hivek a si tikah mipi ralkap pawl cun ramsung ih China thilri hmuahhmuah cu kan siatsak ding tin thu an suah dah ih,cutikah ralhrang thuphuangtu Zaw Min Tun cun “Ramsung ih China thilri siatsuah a si ahcun kannih ralkap in kan hum dingih, theitawk kan suah ding,” tin a rak sim ve zo.
Leave a Reply