China le Myanmar karlak tlangleng zin an tuahmi cu tlangleng a tlan thok zo tin China Embassy cun thu an suah. Tlangleng zin thar an tuahmi cu China in Myanmar lamih thil phurhmi zamrangten thleng thei dingin timi hrang a si thu an sim.
China in Myanmar fehnak tlangleng zin thar an tuahmi cu a hlan hnakin thilri phurh tikah ni 20 tlukin a thleng rang ding tin China lam cun an sim. Tlangleng zin thar an tuahmi cu Shan ramkulh Chinshwe Haung khawpi ah a cawl lawk dingih, Chinshww Huang in Mandalay an feh bet ding. Mandalay ihsin cun mawtawpi thawn a kuat duhnak hmunah an phursuak vivo ding tin China cun an sim.
China le Myanmar fehnak tlangleng zin cu a hlan Myanmar cozah san ah an rak rel cia zomi a si ih, covid 19 natnak ruangah zamrang ten hnatuan thei loin an rak um. Tu ahcun an theh felzo ih, tlangleng khal a tlan thok. Tlangleng cu China ram Yunan ramthen in May 23 ah a suak zo ih , ni 15 hnuah Mandalay a thleng ding tin an sim. Tlangleng cun cet thilri, meisa thilri , bike thilri le mawtaw thilri pawl an phur tin an sim.
Kaya Ih Doawknak Ah Ralhrang 7 An Thi – Kaya ramkulh Demoso myone Daw-ngan kha khua ah ralhrang ralkap le mipi ralkap pawl May 23 le 24 ah an do aw ih, ni 2 sung an doawknak ah ralhrang 7 an thi tin PDF lam cun thu an suah.
May 23, sun nazi 12 hrawngah Daw-ngan kha khua ih umhmun khuar ralhrang ralkap pawl cu Demoso PDF le an tuanpi pawlin an kap ih, minute 30 sung khat le khat an do aw. Doawknak ahcun ralhrang 4 an thi ih,PDF lam 3 hriam an ngah ve.
May 24 ahcun zinglam nazi 9 hrawngah Bomb kam dingih feh ralhrang pawl cu Demoso PDF le an tuanpi pawl in an rak kap ih, ralhrang 3 an thi tin PDF cun thu an suah.
Tek In Nupinu 5 A Deng That – Mandalay ramthen Pio-buai myone Kyauk Chiat khua ah hnakphek phun dingih feh nunau rual cu tek in a deng ngah ih nupinu 5 an thi.
Kyauk Chiat khuami pakhat cun “Zanlam nazi 3 hrawngah a si. Tekin nunau 5 a deng that. Hngakphak khal an phun man hrih lo, zanlam ah lo feh an si ih, lo an thlen hnuah hmunkhat ah an cawl hrih. Mi 8 an tokhawm ih an tonak ah tek a tla. Mi 5 an thi ih, mi 3 cu an him. An umnak thawn sizung a hla tuk ih, duh vekin tuamhlawm man lo an si,” tin a sim.
A tufang Myanmar ram sung hmun hrekkhat ah thli a hrang, ruah a sur ih, tek ih tlak thatmi an um hnuaihni.
Mon ramkulh Pauk myone ahlak khua khalah thlisia a hrangih, inn 100 tlun a siat tlunah kum upa hliam tuar an tam. Minute 45 sung thlisia a hrangih siatsuahmi a tam.
Ahlak khuami pakhat cun “Zanlam ah rinloparal in thlisia a hrangih, mipi hrang ralrin ngaihnak aum nawnlo. Inn 100 tlun a siat ih, inn siat dan cu a bangaw lo. Hrekkhat inn cu luanglu siat, phar hawk , inn sawn , tlu zik tivek an si,” tin a sim.
USDP In UN Ah Zual An Ko Tum – USDP party hotu Than Hty cun ram buainak ruangah USDP party sungtel le USDP tantu pawl thah an si thu ah UN le ASEAN ah zual an kawh ding thu a sim.
USDP Party hotu Than Hty cun “Tutiang ram buai hnuah USDP party sungtel le tantu pawl mipum 1600 thah an si zo. Hivek cu nitin a thlengih, thah an tong rero. Hivek cu ziangruangah a cang ti asile kilhimnak tha kan neih lo ruangah a si.
“Tu ahcun ram buainak ruangah USDP party sungtel le USDP party tantu lakin thah a tuarmi pawl cu anmah hngilhlonak ah lung kan phun sak zo. Cumen ah kan duhtawk lo ih, UN le ASEAN khalah ca kan kuat ding. Hminsin felfai ten kan nei ih, cipciar zetin UN ah ca kan kuat ding.
“Fiahnak tha tuk kan nei ih, cupawl cu palik zung khalah heknak kan nei ding. Ziangruangah hivek pawl tuah kan tum ti asile hrem tulmi pawl hrem an si theinak dingin le diknak a langsuak theinak ding a si,” tin a sim.
Leave a Reply